Husiya 3
3
Bud kwa Husiya ke Gumér bè yóm logi gónón halaw
1Omin Dwata bud mudél ebè Husiya, monen mò du, “Yó ne, Husiya, lemwóti nam e nangay yehenem. Bud hulékem ebéléem ne hol kenbong nawahem balù yóm deng kmungen bè yóm logi hemdóyón du, baluen ke deng ndaen uu. Hol kenbong nawam lómón yóm kbong nawahu yó kem tau Israél, balù yóm deng kebeklil le ebè yó kem dwata kéng ne yóm deng kedsù le ebélê le yó kem dsù alì megélék.”
2Tahu se, yó nmou bè yóm bud kwahu du, wen sfolò limu botù blówón bukay blayu ne wen dô limu abì halay boluyen barli hmungu du. 3Ne yó monu mò du, “Nam na hol hegen he knóem bè ni bè gónô, ne olò tenflokem yóm kehdóyónem. Béi bud hefdóyón bè kihu logi. Béi se tagad stungô béléu.”
4Yó hnigaden yóm udél Husiya ni, nahen hol legen he bè yó kem tau Israél yóm klaen dù tagad tau hol geta bélê le duhen ke ngà tau hol geta mò malak kul. Nahen hol legen he yóm klaen dù bélê le bud demsù ebè Dwata ne laen se dù bud botu hdà le mò gónó le tmaba ebè yó kem dwata kéng gel tnaba le. Laen se bud dù tau blóng ebè Dwata ne balù yó kem dwata lennged, laen dù bud tonem lem blóng le. 5Okóm kogolen bè yó angat le bud semfulék ebè yóm sana kul Dwata hol gónó mogot yó kem tau Israél. Bud le semfulék ebè yóm tau sfu Dabid mò mogot kul. Lemwót bè yóm tey klikò le ke Dwata, angat tódô setbol kkel le bè yóm bud kesfulék le ebéléen, bede angat guta le yó kem hyu angat tóbóngen kul elem hulin kdaw.
Currently Selected:
Husiya 3: tbl
Highlight
Share
Compare
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
