Isikél 17
17
Hlingón bè yóm lewu banug
1Ni se udélen ebéléu yóm sana Dwata hol gónó mogot, monen, 2“Ó Tau Tonok, tulónem yó kem tau Israél nim hlingón nii. 3Hgefetem bélê le nim udél lemwót bè yóm sana Dwata hol dandónen geta, yó monen, ‘Wen sotu tey banug bong sut bè Libanun. Ya tey ktahà hafak nbólen, bede tey segkay yó kem betek bulen. Yó nmoen, nogoten yóm hanga koyu sidar hol tnulunen, 4ominen temfok yóm hol tubeden. Ne nwiten ebè yóm sotu benwu bong hono kem tau swa nô lemen ne bè yó gónón mulu du yóm tubed tenfoken yó.#17:4 Yóm banug tulónen yó, du se Nibukadnisar mogot yóm benwu Babilun. Yóm koyu sidar, hnigaden yó kem sfu yóm tehe Dabid mogot yóm benwu Israél. Yóm koyu sidar hol tnulunen yóm tenfoken tubeden, du se Jihuyakin mogot yóm benwu Juda. Deng sfolò wolu halayen kegenen tau ominen mogot benwu okóm tek tlu bulónen myón. Yóm benwu bong hono tau swa nô lemen, yó se benwu Babilun yóm benwu gónó le e megef ke Jihuyakin.
5Bè yóm benwu gónón ma yóm tubed sidar yó koni, wen sotu hulu lemfà nwahen ne huluhen bè yóm gónón mabù tonok tendo wen élen anì tilob kenoken, lómón yóm koyu mteg kilil él. 6Tódô dmolil bè yó tey lemfà, bede là katen tahà. Yóm lefaen, lemfà etu bè yóm banug ne tey mgemel kdolilen. Ngangen efet mgemel yó kem hangahen ne tey mobung dounen.#17:6 Yóm ngà hulu lemfà hulu yóm banug yó bè Juda, du se Sidikaya mà dì Jihuyakin. Nélék Nibukadnisar mò mogot yóm benwu Juda. Lemwót Nibukadnisar, wen senfasad le Sidikaya, duhen yóm hol kmung Sidikaya béléen.Okóm bud wen sotu banug bong sut bè yó, tey tahà ból hafaken ne tey mfól bulen. Lemwót yóm lemfà yó koni, mom bud lemfà ebè yóm lomi banug sut mni él béléen. 7Okóm bud wen sotu banug bong sut bè yó, tey tahà ból hafaken ne tey mfól bulen. Lemwót yóm lemfà yó koni, mom bud lemfà ebè yóm lomi banug sut mni él béléen. 8Mom yó nmoen igoen tey mabù yóm tonok gónón mteg, lelen tey wen él bè yó anì tilob ktowoken ne mobung dounen ne anì tilob kbunguhen.#17:8 Yóm sotu banug sut yó, du se yóm tau hol geta bè Idyip tô gónó Sidikaya htóbóng. Yóm kefaen ebéléen yóm lemfà yó, hnigaden yóm kni Sidikaya tóbóng bè Idyip anì natuen yóm tau hol geta bè benwu Babilun.
9Ne yó snólók yóm sana Dwata hol dandónen geta, monen, Hyu kô hlowil du yóm lemfà ni? Là hyuhen. Yó angat nmò yóm tanay banug, gotu kenduten mung du dolilen ne gotu tenfoken hangahen anì gotu mékéng yó kem dounen. Tey mahil kemdut du. Anien he ke laen dù tau kemgis kemdut du, duhen ke dê kem tau tmóbóng kemdut. 10Baluen he ke wen bud mulu du, bud mowil kô? Là ne, tódô menes ke nayuf yóm lenos alì kinì lemwót fi dmata kdaw. Angat matay bè yó bè yóm tonok hyu tehe gónón minggel ktowoken.’ ”#17:10 Yóm lenos kinì lemwót fi dmata kdaw yó, hnigaden yóm bud kundug yóm tau hol geta bè Babilun ebè Israél.
Hnigad yóm lewu banug
11Yó bud udélen ebéléu yóm sana Dwata hol gónó mogot, monen, 12“Tulónem yó kem tau là mimón bè Israél, monem mò kul, ‘Là tngón ye du kô hnigad yóm lewu banug yó? Tulónu kuy ne, mon yóm sana Dwata hol dandónen geta. Yó hnigaden, lemwót yóm tau hol geta bè benwu Babilun mógów ebè Jirusalim nan e negef yóm tau hol geta bè yó, gomong yó kem dumu tau wen glalen, gotu nwiten lu ebè Babilun. 13Ominen wen sotu tau sfu tau hol geta bè Israél néléken mò bud hyónen bè yó ne wen senfasad le yóm lewu le, gloken hsafà du yóm tau néléken yó anì hol mung béléen. Gotu bud negefen snéen yó kem genlal gónó le gel galak yó kem tau Israél, 14anì laen dù bud kgis yó kem tau Israél ke tô le bud matù. Tek són bè yóm là kulé Israél du yóm deng senfasad le gónón tolo wen benwu le.
15Okóm yóm tau hol geta bè Israél, mom natuen yóm tau hol geta bè Babilun. Yó nmoen, hógów tau ebè Idyip hefnihen tóbóng ditu, tey kem sendalù wen ne kem kudà hnihen ditu. Kmò kehedemem du, gbek Israél kô mulé du yóm deng senfasad le ne là wen tmafak du? 16Hol mou kun ne, mon yóm sana Dwata hol dandónen geta. Safau hlanu bè yóm là katayu, yóm tau hol geta bè Israél mulé du angat matay bè Babilun, bè kun benwu yóm tau hol geta deng tehe mélék du mò mogot benwu, yóm tau hol geta deng tehe gónón fmasad du yóm kmungen béléen, okóm mom nuléhen. 17Yóm tau hol geta bè Idyip tô snaligen yó ne yó kem tey sendaluen, laen dù lan le tmóbóng yóm benwu Israél ke bud gnida yóm tau hol geta bè Babilun. Angat tey wen hnatay yóm tau hol geta bè Babilun bè yó kem tau menwu bè yó bè Jirusalim. 18Abay se yóm tau hol geta bè Israél, deng nuléhen yóm deng senfasad le igò le deng sesafà. Yó gónóm mon, là kóen na a tô gewà bè yó.
19Duhen yó, yó udél yóm sana Dwata hol dandónen geta, monen, Safau hlanu bè yóm là katayu, angat tnafaku yóm tau hol geta bè Israél lanen mulé yóm deng senfasad me ne lanen deng mulé yóm ksafaen hlanen bè boluyu. 20Angat botu etahen yóm dou huket ne là kóen bud gewà lemen. Angat nwitu etu bè Babilun ne ditu gónóhu kmukum du yóm deng kuléhen yóm fasaden do. 21Kdê yó kem tau alì hulung sfatay bè Israél, angat le gotu matay bè gida ne yó kem dù tau tebel bè yóm syudad bong yó, angat gotu senklahu lu bè klamang benwu. Bè yó he gónó ye temngón du ou yóm sana Dwata hol gónó mogot nim mudél ni.
22Ne yó bud udél yóm sana Dwata hol dandónen geta, monen, Wen sotu ngà tubed angat nwahu bè tnulun yóm sotu koyu sidar alì tahà, ominu mulu du ta yóm bulul alì geta bè Israél. 23Angat baling koyu sidar alì tilob bè kdéen, tey klimbà kem hangahen lelen tey tilob kbunguhen mò bud hulu. Angat le gotu smala tahen yóm kdéen kay onuk koyu, hgolung le laan hangahen. 24Ne angat tngón yóm kdéen koyu ou se yóm sana Dwata hol gónó mogot mofok du yóm koyu tahà anì mowil yóm koyu ukol ne bud tahà se kun. Ou se hlenes du yóm koyu tolo matak ne bud hlowil yóm koyu deng matay. Ou se yóm sana Dwata hol gónó mogot yóm mudél ni. Angat nmou yóm deng monu.’ ”
Currently Selected:
Isikél 17: tbl
Highlight
Share
Compare
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
