Dwata 5
5
Yóm sfolò kem hlau Dwata
(Kehewà 20:1-17)
1Omin Musis gotu htaba yó kem tau Israél ne monen mò kul, “Ó kem tau Israél, hol hnungol ye yó kem hlau Dwata tulónu kuy kemdaw ni. Hol dnalang ye ne hol nimón ye.
2Ditu bè Bulul Sinay, deng wen kesfasad le Dwata yó kem tuha tekuy 3bede là olon du bè yó kem tuha tekuy, bud tekuy gomong snéen yó kem tau tolo mowil ni kmoen ni. 4Bè yó ta yóm bulul yó, tódô suyó bélê ye Dwata lemwót gu lem yóm tey ofi. 5Bè yóm kdaw yó, ou se fen semblóng kuy ebè Dwata mò tmulón du kuy yóm monen, abay se likò ye bè yóm ofi gónón gu mudél ne là kô ye gógów eta yóm bulul. Yó tehe udél Dwata ebélê ye bè yóm kdaw yó, monen,
6‘Ou se yóm sana kuy Dwata hol gónó mogot, yóm deng hewà kuy gu bè Idyip bè yóm benwu gónó ye ghesek.
7Bê ye abay tmaba ebè yó kem dumu dwata, són ebéléu.
8Bê ye abay mò yó kem dwata lennged mkél bè yóm gel ton ye bè longit duhen ke te tonok duhen ke lemwót bè él. 9Bê ye abay mtud bukol bè yóm dwata lenbù duhen ke tmaba ebéléen abay se ou yóm sana kuy Dwata hol gónó mogot. Tey sidek kélés nawahu du ke wen dumu dwata gónó ye e tmaba. Tnafaku yó kem tau kembê dou, gomong megtafak snéen yóm tanay lugod le efet kól bè gfaten.#5:9 Yó gónó le megtafak yó kem ngà le lan le gbót bè yóm sidek gel nmò yó kem tuha le.Okóm bè yó kem tau kembong nawa do ne mimón yó kem dou hlau hegfanu bélê le yóm kbong nawahu kul efet kól bè hilu libu bud lugod le. 10Okóm bè yó kem tau kembong nawa do ne mimón yó kem dou hlau hegfanu bélê le yóm kbong nawahu kul efet kól bè hilu libu bud lugod le.
11Bê ye tódô fà moluy du yóm dou boluy. Yakà ou du yóm sana kuy Dwata hol gónó mogot. Tnafaku yóm tau tódô faen moluy du yóm dou boluy.
12Hol hetfing ye yóm Kdaw Kehegnô ne hol béen abay wen nulé ye bè yó kem dou hlolò kuy bè yóm kdaw yó. Ou se yóm sana kuy Dwata hol gónó mogot fen hlolò du kuy nim ni. 13Wen nem kdaw ye mò nmò 14okóm bè yóm ghituhen kdaw, yó se yóm Kdaw Kehegnô hetfing ye ebéléu. Bè yóm kdaw yó, béen abay wen bélê ye mò nmò, balù uu ne yó kem ngaem ne yó kem hesekem ne yó kem ógófem duhen ke yó kem tau milo nô bè yóm kuy benwu, hol bê le abay mò nmò. Yó kem hesekem, hol le hegnô lómón yóm kóm kehegnô. 15Hentulón ye nawa tehe ye ghesek bè Idyip se kuy. Yóm kehewà ye gu bè yóm benwu yó lemwót béléu yóm sana kuy Dwata hol gónó mogot, ne mlan bè yóm tey kegbeku ne kgisu. Yó se gónóhu hol hlolò du kuy yóm hlau bè Kdaw Kehegnô.
16Hol nadat ye mà ye ne yê ye. Ou se yóm sana kuy Dwata hol gónó mogot fen hmau du kuy nim ni anì hyu kógów klowil ye ne anì tahà ktau ye ta yóm tonok blayu kuy.
17Bê ye abay monok.
18Bê ye abay mdà yehen.
19Bê ye abay mnagaw.
20Bê ye abay tnifù kéng kem dumu ye.
21Hol bê ye abay nófô yehen kem dumu ye. Bê ye abay nófô gónóen duhen ke tonoken duhen ke kem heseken duhen ke kem safien duhen ke kem kudaen duhen ke yó kem dumu nfunen.’
22Ni se yóm sfolò kem hlau hlolò Dwata kuy bè yóm tehe kesbung ye bè bulul Sinay. Tódô mudél ebélê ye gu lem yóm dilóf ofi ne lobun mfól ne tey mfasang yóm kudélen yó. Ni se yóm hlau hloloen kuy, laen dù dumuhen. Ominen smulat du ta yóm lewu kem botu kufil yóm hlauhen yó ne oguhen dou. 23Bè yóm tehe tódô ketfengen ofi yóm Bulul Sinay, tódô gungol ye yóm udél Dwata gu lem yóm tey mget kifu, lemwót yó kem tau malak kuy bè ket ból ye mógów ebéléu 24ne mon le mò dou, ‘Deng hton Dwata kum, yóm sana kut Dwata hol gónó mogot, yóm tey keslinangen ne yóm tey kegetahen bè yóm kungol me du yóm udélen gu lem yóm dilóf ofi. Deng tngón me kemdaw ni gbek tau mowil anien ke deng mudél ebéléen Dwata. 25Okóm ni tey sidek klikò me du yóm ofi yó tódô gotu genlaen mi. Tódô eles gnóm me gotu me matay ke bud gungol me udél yóm sana kut Dwata hol gónó mogot. 26Laen kô dù tau bud mowil ke gungolen udél yóm Dwata laen tul katayen gu lem tum dilóf ofi, lómón yóm deng gungol me. 27Duhen ni, Musis, budi mulék ebè Dwata ne hol hnungolem yóm kdê tulónen kóm, yóm sana kut Dwata hol gónó mogot. Ominem bud mulék ebélê me ne tulónem kum yóm kdê tulónen kóm. Hnungol me uu ne nimón me.’
28Timbow gungol Dwata yóm kóyô ye yó, yó monen mò dou, ‘Deng gungolu udél ni kem tau nii ne tahu se yóm mon le yó. 29Yake senflós lómón ni dé kmò kegnóm le du. Yake senflós le likò béléu ne nimón le yóm kdê dou hlau kul. Ke yó nmò le angat hyu kógów klowil le dalang se yó kem semfu gu bélê le efet kól bè laen dù tul sónen. 30Tu ne, Musis, muléki ebélê le nam e bud hulék lu ebè kamfù le. 31Okóm kóm, budi mulék ebéléu bè ni, naw na gotu tulón kóm yóm kdê hlauhu kul ne yó kem hlolou kul. Tolokem yóm kdéen tau Israél anì yó, nimón le sok le nô ta yóm tonok blayu kul.’ Tu se,” mon Musis, “yóm tehe udél Dwata ebéléu.
32Ne ni, kem tau Israél, hol nimón ye yó kem hlauhen kuy yóm sana kuy Dwata hol gónó mogot. Hol béen abay wen glafang ye bè yó kem hlauhen kuy. 33Gotu nimón ye yóm kdéen anì hyu kógów klowil ye ne hlós knô ye ta yóm tonok móyón nfun ye.”
Currently Selected:
Dwata 5: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
