Amus 9
9
Kehton Dwata bè Amus
1Ominu mton ke Dwata mdà klohok yóm gónó demsù. Dóken ou, monen, “Hgel bnogulem ta yó kem hehek Gónóu anì kmingò yó kem tgelen. Lenusokem yó kem htegen anì tbó yóm ketefen eta kulu yó kem tau nô laanen. Ke wen dù tau mowil, gotu bud hfatayu lu bè gida. Balù sotu ke wen glóy bélê le, ne là se wen gewà.
2Baluen he ke ngang le mokol sol mò gónó le hebnos efet kól ditu tlaan bè benwu yó kem matay, olo ke là angat gotu bud nukalu kul eta. Baluen ke mkaf le etta bè longit, olo ke là angat bud gotu nwitu kul elaan. 3Baluen he ke hebnos le te tfusù Bulul Karmél, olo ke là angat hnebelu kul ne kenfóu lu. Baluen he ke hebnos le ditu tlaan bè sokol mohin, olo ke là angat dóku yóm ulal bong lem mohin mò mékét kul. 4Baluen he ke negef kem hohon le lu ebè benwu mayuk, olo ke là angat hfatayu kul bè yó bè sudeng. Deng alì nô bè nawahu ne yóm keglau kul, là kóe móyô bud tmóbóng kul.”
5Yóm Dwata laen dù là gbeken du, baluen ke olon temdól yóm tonok, tódô mnà ne gotu le langag kdê yó kem tau nô tahen. Lemwót bè yóm linol, tódô lemnok eta yóm klamangen tonok lómón Él Nayl bè Idyip ke bangen dmunuk, ne tódô bud mnà elaan. 6Yó kem sodò seel yóm Gónô Dwata nô ditu ta bè longit, bede yóm tgel yóm Gónóen hdaen te tonok. Yóm él mohin, olohen tmaba du henbalingen kulón ete tonok. Dwata se kun boluy.
7Yó udél Dwata, monen, “Ó kem tau Israél, ofo kuy mon du kô ke hol bong mu ye béléu senta yó kem tau Ityupya? Yóm kwitu kuy hewà gu bè Idyip, ofo kuy mon du ke là deng nmou du bè dumu benwu? Yó kem tau Flistin, deng nwitu lu hewà gu bè Krit. Dalang se yó kem tau Aramiyan, deng bud nwitu lu hewà gu bè Kir.
8Ou se yóm Dwata hol dandónen geta. Là kô kó matahu du yóm alì kegsalà yó kem tau bè benwu Israél. Yó kmou kul, angat gotu genlau lu. Okóm là sulék genlau kul yó du kem sfu Jakub, yakà deng fasadu du béléen. 9Yakà deng monu du angat gotu hefsideku yó kem tólóng benwu yó kem tau Israél, lómó kmou kul, lómón yóm halay tneef anì mkó kafahen. Okóm balù sbotù halay hyu ke btang ebè tonok. 10Tódô kdê yó kem tauhu tendo gel mò salà, angat le gotu matay bè sudeng. Lu se yó kem gel mon du, ‘Là kô wen gbunù tekuy.’ ”
Kfasad Dwata yóm bud kehguléken yóm benwu Israél
11Yó udél Dwata, monen, “Bè yóm kdaw yó, angat bud hen-gulék hdau yóm tehe kun nogot Dabid. Yóm kmoen ni, yóm benwu nogot Dabid yó, hol lómón ke yóm gónô deng gbà, okóm angat bud hdau yó kem bengen ne bud huléku yóm tehe tey keklóónen. 12Ne bud gfun yó kem tau Israél yó kem dù tau tebel bè Idom dalang se yó kem tau bè klamangen benwu gel mit du yóm dou boluy. Ou se yóm sana Dwata hol gónó mogot yóm mudél ni ne angat dnohò nmou nim ni.”#9:12 Senfalahem Kul Nmò 15:12–21. Yó gónó Jim mon du nim ni anì henmóyô yó kem Ju yó kem tau là Ju le ke mung le bè yóm kul sembahan.
13“Angat kól yóm kdawen,” mon Dwata, “angat tey bong halay nuta le kkólen bè yó kem grép, angat tey kbungu le. Hanà tolo lel le muta deng sana bud kól bè yóm kdaw le mulu. Ominen yó kem bulul lemnek bè Israél, tódô hono lefà grép tahen, ya tey knóm yó kem tifas nwa le bè yó ne tey kwenen hol lómón ke tódô mlel gu lem yó kem bulul lemnek. 14Yó kem dou tau deng tehe negef le mayuk, angat bud nwitu lu mulék ebè yóm kul tonok. Bud hdà le yó kem syudad le deng gbà ne bud le menwu du. Ne bud le mulu grép bè yó ne bud ginum le tifas le. Ne bud le mò hulu bè yó ne bud gken le yó kem bunguhen. 15Yó kem dou tau, lómón ke bud huluhu lu ta yóm tonok deng tehe blayu kul ne là kô wen bud kemdut kul bè yó. Ou se yóm sana kuy Dwata hol gónó mogot mon du nim ni.”
Currently Selected:
Amus 9: tbl
Highlight
Share
Compare
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
