Amus 8
8
Yóm bungu koyu deng mélél hton Dwata ke Amus
1Bud wen htonen dou yóm Dwata hol dandónen geta. Htonen do yóm abì hnok bungu koyu mélél nô lemen. 2Snólók Dwata ou, monen, “Amus, tedu de tonem?”
Bnalau se, monu, “Abì hnok bungu koyu deng mélél.”
Omin Dwata bud mon du mò dou, “Yóm bungu koyu deng mélél ni, hnigaden yó kem dou tau Israél deng tey tógó tmafak kul. Là bud gnolunu du ne yóm ktafaku kul. 3Bè yóm kdaw yó, yóm kesngal le lem Gónô Dwata angat baling ngawóy le. Tódô hgasà tau matay bè gida. Tódô bot le lu bè lewà yóm syudad, balù sekteb ke wen mudél. Ou se yóm Dwata hol dandónen geta nim mudél ni.”
4Ni mò hol hnungol ye, yu kem tau gel hemgnok yó kem tau élél ne gembà klowil yó kem tau laen dù kwa le lem nim benwu ni. 5Gel hendem ye, “Hyu ke géhél deng yóm kestifun tekuy bè yóm lomi bulón ni anì géhél tekuy bud hembalù halay. Hyu ke géhél deng yóm Kdaw Kehegnô anì géhél tekuy bud hembalù. Omin tekuy hol hebtes du yóm hbalù tekuy ne gmantang tekuy bè yóm gantang kmulang ne tmimbang tekuy bè yóm timbang lemugì. 6Hebtes tekuy yóm halay wen bolen kafa. Nmò tekuy hesek yóm tau mutóng là gbeken mayad, yóm tau mutóng tek sbotù blówón bukay ne snilas.”
7Deng safà Dwata yóm Dwata gónó le gsalù yó kem tau Israél, monen, “Là kóen mkó bè nawaw yó kem sidek gel nmò le. 8Angat megsinsig yóm benwu le lemwót bè yóm sidek gel nmò le ne gotu le langag yó kem tau menwu tahen. Lemwót bè yóm tey linol, tódô lemnok eta yóm tonok bè klamangen benwu le, lómón yóm Él Nayl bè Idyip ke bangen dmunuk. Bè yóm bud kegsinsig yóm tonok yó, ominen bud mnà elaan. 9Bè yóm kdaw yó,” mon yóm Dwata hol dandónen geta, “hesdefu kdaw anien ke tolo gtungó ne hkifuhu talak tonok anien ke tolo kemdaw. 10Yóm gel kehligal ye mken bè dou Gónô, angat henbalingu klangag ye ne yóm gel kehligal ye semngal, henbalingu kik ye. Lemwót bè klangag ye gónó ye lemsek nes sakù ne gotu tenbulud ye wek ye, lómón yó kem tuha nodung le yóm tek sotu ngà le logi. Ya tey sidek khééten yóm kdaw yó.”
11Yó bud udél yóm Dwata hol dandónen geta, monen, “Là gbeken du ke là dohoen yóm kdaw kehbelu bitil bong lem nim benwu ni. Là kô bitil bè ken du ne là kô bè kleeng du, okóm bitil ye bè udél Dwata. 12Angat le gotu lóngón yó kem tau, tendo nebel le udél Dwata, lenwót le bè Mohin Héét mebel efet kól bè Mohin Miditiranyan, omin le lemibut lenwót le fi debwak kól fi dmata kdaw, okóm là kô ton le du. 13Bè yóm kdaw yó, balù kem libun lomi lemnok alì knóón kkólen bè yó kem logi lomi lemnok alì kemgis, gotu le lenmek bè kleeng le yóm udél Dwata. 14Yó kem tau gel smafà hlan le bè boluy yó kem dwata lennged bè Samarya, yóm gel mon du, ‘Hlanu bè kun klowil yóm dwata Dan,’ duhen ke mon le, ‘Hlanu bè kun klowil yóm dwata Birsiba,’ yó kem tau gel mon du yó angat le gotu masà, là kô le bud gebtik.”
Currently Selected:
Amus 8: tbl
Highlight
Share
Compare
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
