Amus 3
3
1Ó kem tau Israél, yóm sotu kmuleng deng tehe nwit Dwata hewà gu bè Idyip, hol hnungol ye yóm udélen ebélê ye, yó monen, 2“Bè kdê yó kem kmuleng talak tonok tek sónen yu yóm dou nélék. Yó gónóm mon là kô gbeku du ke là tnafaku kuy bè kdê yó kem sidek gel nmò ye.”
3Gbek le slomong mógów kô yóm lewu kem tau ke là deng eles sentngón le du gna yóm gónó le e solu? 4Gel mngel gu lem dlag kô yóm liyun ke là deng tonen du yóm kenfóen? Ne yóm ngà liyun, gbeken mngaw lem solen kô ke là deng wen kenfóen? 5Bkó holot kô yóm onuk koyu ke laen dù fanen? Gbeken tódô bkó hkawang kô yóm holot ke laen dù bkóhen? 6Wen kô là likoen ke gungol le yóm féw gel huni le ke wen gida sut bè benwu le? Wen kô hlayam gefet lem syudad ke là lemwóten bè Dwata?
7Okóm yóm Dwata hol dandónen geta, là kô wen tagad nmoen lem blóng ye ke là nan ne eles hegfan du bè yó kem tugoden, duhen yó kem tóbóng lówóhen yóm angat nmoen.
8Ke mngel yóm liyun, tau du de tô là likoen? Ke mudél yóm Dwata hol dandónen geta, tau du se là tmugod du yóm udélen?
Kegtuled yóm syudad Samarya
9Ni mò eles heglalag ye bè yó kem tau malak bè Idyip ne bè syudad Asdod,#3:9 Yóm syudad Asdod, hol yê yó kem syudad lem benwu Flistya. Neyóm syudad Samarya, hol yê yó kem syudad lem benwu Israél. mon ye mò kul, “Hol ye stifun bè yó kem bulul bè Samarya, tenngel ye yóm tey kesbewegen bè yóm benwu yó ne yóm tey kmò le sidek lemen yó kem tau Israél bè yó.”
10Yó udél Dwata, monen, “Ni kem dou tau ni, là hulung le mò du yóm tedeng. Deng tódô hennok le yóm gónô bong yóm kimu hennagaw le ne hnugus le. 11Yó gónóm mon,” udél yóm Dwata hol dandónen geta, “angat gotu snibut yó kem hohon le yóm tonok le ne gotu genbà le yó kem tô seng le ne gotu nled le yó kem kimu henyu le lem yó kem gónó le gel heklung.”
12Yó bud udél Dwata, monen, “Lómón yóm tau semgyok ubiha, bè yóm ubihahen deng nsék liyun tek lewu tihen ne sfu yóm sotu klinguhen bud gafiten du. Lómón yó se là kwen guta yó kem tau Israél gewà bè Samarya, olo tek bangkù deng gbà nwit le ne sufà gónó tungô. 13Ni mò hol hnungol ye ne hol heglalag ye bè yó kem sfu Jakub,” udél yóm sana Dwata hol gónó mogot, yóm Dwata laen dù là gbeken du. 14“Bè yóm kdaw bang ktafaku yó kem tau Israél bè yó kem sidek deng gel nmò le, angat gotu genbau yó kem gónó le gel demsù bè Bétél.#3:14a Bè yó bè Bétél gónó Jirubuam tehe hmò yóm ngà safì blówón mò tnaba yó kem tau Israél anì là bud le mógów ebè Jirusalim na a demsù ebè Dwata ditu. Kogolen bè yó bud dê he nmò le bè klamang Samarya. Yó kem hanga yóm gónó le gel demsù, angat gotu kenleng ne gotu btang ebè tonok.#3:14b Yó hlolò le yó kem tau Israél, ke ktes hohonen yóm sotu tau anì hnatayen, yó nmoen mlóy ebè yóm gónó gel demsù anì mogot bè yóm hanga yóm gónó gel demsù yó. Ke ni se nmoen, là kô ghatay hohonen du.Angat gotu genbau yó kem tey gónô tilob hdà yó kem tau wen kendengen le, yóm gónô gónó le nô bè yóm bulónen tnaw ne yóm gónô gónó le nô bè yóm bulónen kinì. Gotu genbau yó kem gónô alì tilob klóónen. Kdê yó kem gónô lembang deng hdà le, angat gotu genbau. Ou se Dwata nim mudél ni. 15Angat gotu genbau yó kem tey gónô tilob hdà yó kem tau wen kendengen le, yóm gónô gónó le nô bè yóm bulónen tnaw ne yóm gónô gónó le nô bè yóm bulónen kinì. Gotu genbau yó kem gónô alì tilob klóónen. Kdê yó kem gónô lembang deng hdà le, angat gotu genbau. Ou se Dwata nim mudél ni.”
Currently Selected:
Amus 3: tbl
Highlight
Share
Compare
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
