Amus 2
2
Yóm udél Dwata eta benwu Muab
1Yó bud udél Dwata, monen, “Deng tendo sensulit le mò sidek yó kem tau bè Muab, là kô gbeku du ke là tnafaku kul. Gotu genbà le yóm lebeng yóm tau hol geta bè Idom ne gotu dnutung le kem tiolen efet baling kohù. 2Yó gónóm mon angat wen tey ofi hwitu ebè Muab ne gotu kenen yó kem gónó le gel heklung bè yóm syudad le boluyen Kiryut. Ne gotu le matay yó kem tau Muab bè yóm igò le mungol hensag yó kem sendalù hohon le ne igò le mungol uni féw bong mò semtifun kem sendalù le.#2:2 Yóm féw huni le yó, nmò le lemwót gu bè hanga safì duhen ke bè hanga kambing logi.Ne genlau yóm tau hol geta bélê le gomong yóm kdê genlalen. Ou se Dwata nim mudél ni. 3Ne genlau yóm tau hol geta bélê le gomong yóm kdê genlalen. Ou se Dwata nim mudél ni.”
Yóm udél Dwata eta benwu Juda
4Yó bud udél Dwata, monen, “Deng tendo sensulit le mò sidek yó kem tau bè Juda, là kô gbeku du ke là tnafaku kul. Deng kenbê le yóm hlauhu kul, là kô nimón le du. Deng nwiten lu tlas yó kem dwata kéng tehe hentahu yó kem fù le ekni. 5Yó gónóm mon angat wen tey ofi hwitu ebè Juda ne gotu kenen yóm kdê gónó le gel heklung bè Jirusalim.”
Yóm udél Dwata eta benwu Israél
6Yó bud udél Dwata, monen, “Deng tendo sensulit le mò sidek yó kem tau bè Israél, là kô gbeku du ke là tnafaku kul. Deng mom hbalù le mò hesek yó kem tau tedeng kmò le, luluk le lu bè filak ne yó kem tau élél deng luluk le lu bè snilas. 7Gotu ndà le lem kfung yó kem tau laen dù bang tmóbóng kul. Là kô nmò le du yóm kukum tedeng bè yó kem tau gel hen-gnok le. Botong le tódô lewu maen ne yóm ngaen logi gel semtungô yóm sotu libun, yóm alì sidek béléu, alì henyak le yóm dou boluy. 8Bè yóm gel ktaba le ebè yó kem dwata le, deng le mom tungô klohok yó kem gónó gel demsù, igam le yóm nes sandà le bélê le yó kem tau élél. Mom ninum le lem gónô dwata lennged yóm tifas grép nwa le gu bè yó kem tau mutóng filak bélê le.
9Lómón yó se yóm là kimón le do yó kem dou tau, igoen ou yóm tehe tmóbóng kul. Gu laan le là deng kól bè yóm benwu blayu kul yó kem dou tau, ou se tehe gemlà kul yó kem tau Amurayt nô bè yó, kem tau alì tahà lómó ktahà le koyu sidar ne lómón ke lu yóm koyu alì mtétél bè kdéen. Okóm sulék genlau lu. 10Ou se tehe hewà kuy gu bè Idyip ne fat folò halayu malak kuy gu lem yóm benwu laen hol wen tauhen ne hfunu kuy yóm tonok yó kem tau Amurayt. 11Wen bè yó kem ngà ye logi néléku mò baling tugodu ne wen se bè yó kem lomi lemnok bélê le néléku nmou tau Nasirit.#2:11 Yó lanen yóm udél Nasirit, “deng htólóng.” Yóm tau deng fasaden ke Dwata yóm kbalingen tau Nasirit, gomong fasaden ke Dwata snéen yóm là kinumen tifas grép ne yóm là keheklengen du weken. Yóm kbaling le tau Nasirit ni, wen se hlós mò du efet katayen ne wen se olon hilu halay. Ó kem tau Israél, tahu kô nim monu ni?” mon Dwata. 12“Okóm deng mom hinum ye yóm tau Nasirit yóm tifas grép ne deng mom mon ye bè yó kem tugodu bê le abay tugod yóm htugodu kul.
13Duhen ni, yó angat nmou bélê ye dkenu yu bè tonok lómón yóm klitun alì blat halay lulónen, tey kesgéhéken. 14Balù yó kem tau alì hlóng mlóy bélê ye, là kô le angat gewà. Yó kem tau alì kemgis bélê ye, deng le mom baling lenmek. Ne yó kem sendalù deng hónô sfatay, balù kul knô là kô gbek le lemwà du. 15Yó kem tau alì hulung gemtì, angat le mlóy ne yó kem sendalù alì hlóng klóy le, là kô le dog gewà. Balù yó kem sendalù myón kudà, là kô gbek le lemwà kul knô. 16Bè yóm kdaw yó balù yó kem sendalù alì lóbô, sana gotu klóy le botong gtebel le yó kem ngom le sfatay. Ou se Dwata nim mudél ni.”
Currently Selected:
Amus 2: tbl
Highlight
Share
Compare
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
