Kul Nmò 22

1“Yu kem dumuhu setwoli ne kem mau,” mon Pol, “hol hnungol ye balau du yóm tô nmò ye béléu ni.” 2Timbow gungol le mudél bè udél Hibru, tódô le gotu neb. Yó mon Pol, 3“Tauhe Ju se dou, lemwóte bè syudad Tarsus, yóm benwu snakuf Silisya. Okóm mnagie bè ni bè Jirusalim, yó sem Gamaliyél yóm tehe tmolok dou. Tey mget ktoloken du dou yóm hlau Musis, yóm sana hlau yó kem fù tekuy ekni. Tey mget se yóm dou klolò ke Dwata lómón se yóm kuy yóm kdê ye mdà bè ni nii. 4Tey tehe gel kehsideku yó kem tau lemolò yóm lan deng lolou ni, kóyóu ke gotu hnatayu lu. Gotu kenfóu lu, libun duhen logi, ne tenesu lu lem blanggù. 5Baluen ke snólók ye yóm hol geta bè yó kem gel demsù ebè Dwata, dalang se yó kem geta mogot kukum lem blóng tekuy, ke kéngu nim monu ni. Bè yóm tehe kógówu ebè syudad Damaskus, wen sulat hnihu bélê le mò nitu ebè yó kem dumu le bè yó mò sulatu kemfô kdéen tau hemtahu bè yó. Tahu se, mógówe ebè Damaskus anì kenfóu lu, ne anì nfétu lu, ne nwitu lu ebè ni bè Jirusalim anì tnafak lu.”

Ktulón Pol yóm kbut kehtahuhen bè Jisas

(Kul Nmò 9:1-19; 26:12-18)

6“Bè yóm kógów me yó,” mon Pol, “deng me moni bè Damaskus ne, deng dô móyón talak kemdaw, tódô gloufu se yóm tey layag temsang gu bè longit. 7Ne tódóe gdouf bè tonok, sen-geng gungolu se yóm mudél, monen, ‘Ó Sol, Sole, moen de ke alì hnayamen ou?’

8Yó balau du, monu, ‘Mau kóm de?’ Bud monen se, ‘Ou se yóm Jisas lemwót bè Nasarit, yóm tendo hnayamem.’ 9Yó kem dumuhu mung do,” mon Pol, “ton le se kul yóm tey layag temsang gu bè longit, okóm là kô gungol le du kul yóm mudél ebéléu.

10Ominu bud mon du, ‘Tedu se tô nmou du?’ Bud monen se kun, ‘Mdai, ne hlósi ebè Damaskus. Ditu he gónóm temngón du yóm nmò deng olu Dwata etahem.’

11Tahu se, mdae, okóm là kóe bud mton lemwót bè yóm tey layag yó koni. Tek sensalak le ou yó kem dumuhu hlós etu bè Damaskus.

12Wen sotu tau bè yóm syudad yó boluyen Ananiyas. Yóm tau ni, tey tedeng kloloen du yóm hlau tekuy, ne tey kadat le du yó kem dumuhen Ju nô bè yó. 13Yóm knóu bè yó, tódô mógów ebéléu, mdà klohoku, monen mò do, ‘Ó Woli Sol, ni budi mton.’ Tahu se, tódô sen-gengu se bud mton, ne temngele ebéléen.

14Bud monen mò do, ‘Deng néléken uu yóm sana kul Dwata yó kem tehe fù tekuy anì tngónem yóm hol kun kóyô, ne anì tonem Jisas, yóm alì tedeng kmoen deng hógówen, ne anì gungolem udélen ebéléem. 15Yakà uu du fen gemtanud du bè kdéen tau yóm deng tonem ne yóm deng gungolem. 16Na,’ monen, ‘béi tlek hanggà. Géhéli hbabtays, ne mnihi bè Dwata anì hol kóhen béléem yó kem salaem.’ ”

Khógów Dwata ke Pol ebè yó kem tau là Ju le

17“Bè yóm deng bud kuléku ebè Jirusalim,” mon Pol, “sotu kdaw mnihe lem Gónô Dwata. Bè yóm igou mni, tódô hegfan béléu Jisas, yóm hol gónó mogot. 18Yó monen mò dou, monen, ‘Géhél tnagakem Jirusalim ne, abay se henda yó kem tau ke tô tulónem o bè ni.’

19Ne yó monu mò du, ‘Deng gotu tngón yó kem tau bè ni, yóm tehe gel nmou. Deng tódô ketu yó kem kul gónó gel stifun yó kem Ju, gel kemfô yó kem tau hemtahu béléem ne hensideku lu. 20Ne sotuhen, bè yóm khatay le ke Stéfén, yóm tau tehe gel tmulón kóm, nóe bè yó, ne tey kehyu nawaw du yóm khatay le du yó. Hyu ou mentey kgal yó kem tau semtudà du botu.’

21Bud mon yóm gónóhu mogot mò dou, ‘Lemwóti ne, abay se mayuk gónóhu e hógów kóm elem blóng yó kem tau là Ju le.’ ”

22Tódô le gotu neb yó kem tau hmungol ke Pol efet gmonen yóm khógów Dwata du elem blóng yó kem tau là Ju le. Bè yóm kungol le du yóm yó, tódô le gotu segeng hetê, mon le, “Bê ye htahà klowilen. Hnatay ye dé. Bê ye hlowil tau ke lómónen yó.” 23Ya tey sidek khetê le, gotu diwel le eta kem nes le, lel kfung gotu sohul le.

24Omin yóm kmandér mdók yó kem sendaluhen anì nit le Pol husek elem kamfù le. “Hol nfes ye,” monen, “anì tulónen yóm hol duón le du yó kem dumuhen Ju.” 25Tahu se, nfét le Pol anì hyu kfes le du. Bè yóm tolo kfét le du, mudél Pol ebè yóm kfitan mdà bè yó, monen, “Là mulé ye udin kô ke kendel tódô nfes ye yóm tau Rom ke là deng tngón ye du salaen?”

26Timbow gungol yóm kfitan yóm udél Pol, tódô mógów ebè yóm kmandér, monen, “Ten-gamahem kmoem du yóm tau yó, yakà tauhen Rom.”

27Ominen kendel mógów ebè Pol yóm kmandér, monen mò du, “Tahuhi tau Rom kô?”

Mon Pol, “Tahuhe tau Rom se dou.”

28Mon yóm kmandér, “Tauhe Rom snéen dou, bede tek benlihu yóm kbalingu tau Rom, ne tey mebtes keblihu du.”

“Okóm dou,” mon Pol, “tódô lemwót bè ksutu yóm ktauhu Rom.”

29Tódô sentagak le bè yó Pol yó kem tau tô mfes du. Balù yóm kmandér, tey klikoen se kun, abay se tau Rom Pol, ne du hfét du kdina.

Kehdà le ke Pol bè solu yó kem tau hol geta mogot kukum

30Bong yóm kmandér, kóyóen ke hol tngónen yóm alì duón le ke Pol yó kem dumuhen Ju. Yó gónóm mon, bè yóm deng hayahen bè yó, hkóhen yóm kdina fét Pol, ne gotu htabahen yó kem tau hol geta bè yó kem tau demsù ebè Dwata, dalang se yó kem tau hol geta mogot kukum lem blóng yó kem Ju. Ominen hangay ke Pol, ne hdaen bè solu le.

Currently Selected:

Kul Nmò 22: tbl

Highlight

Copy

Compare