Kul Nmò 16

Kmung Timuti kul le Pol ne Silas

1Bè yóm kul kógów le Pol lewu le Silas, mlan le bè syudad Dérbi ne Listra. Ne bè yó bè Listra, wen sotu tau hemtahu bè Jisas bè yó boluyen Timuti. Hemtahu snéen yóm yéen. Libun Ju se kun, ne tau Grik yóm maen. 2Yó kem tau hemtahu bè yó bè Listra ne bè Ikunyum, tey gel kdóyón le du yóm kmò Timuti. 3Móyô Pol ke niten Timuti bè yóm kógów le. Yó nmoen, nan tnulì anì là kenbê le du yó kem Ju ke gbol lem blóng le. Abay se tódô kdê le bè yó, gotu tngón le tau Grik yóm maen. 4Tahu se, mung Timuti. Tódô ket benwu lan le sal gel hetngón le bè yó kem tau hemtahu yóm hlolò yó kem tau tehe hógów Jisas nô bè Jirusalim dalang se yó kem tuha gel malak bè yó. Sal gel hget le bélê le yóm kehlolò le du kul yó kem hlolò le kul yó. 5Tahu se, tey wen gónón temnù kehtahu le yó kem tau hemtahu. Tódô ket kdaw sónmoen tendo temnù tau hemtahu bè Jisas.

Yóm hegfan Dwata bè Pol bè yóm benwu bè kilil mohin boluyen Truas

6Bè yóm kógów le Pol, tódô lengeb le prubinsya Frigya ne Glasya. Tô le móyô hlós mool ebè prubinsya Asya, okóm là bayaen kul yóm Tulus Dwata. 7Tikóng le kól bè kilil yóm prubinsya Misya, bud le tô móyô hlós subô ebè prubinsya Bitinya, bud là bayaen kul yóm Tulus Jisas. 8Tódô le hlós mlan elem Misya efet le kól bè Truas, yóm syudad bè kilil mohin.

9Bè yóm kifu yó, wen hegfan Dwata bè Pol bè knahen, yóm sotu tau lemwót bè prubinsya Masdunya. Yó henkoduhen bè Pol, monen, “Holi mifal kum edini bè Masdunya nam e tnóbóng mi.” 10Tahu se. Lemwót bè yóm kna Pol, tódô me kendel htifes lemwót ebè Masdunya. Tódô dilô me yóm kun kóyô Dwata ke na me e hetngón yóm Tulón Hyu ebè yó kem tau bè yó.

Ktolok Pol bè Flipay

11Kewót me bè Truas smakay me kafal, mifal me etu ebè yóm sotu hungul benwu udì boluyen Samutris. Hayahen bè yó bud me smakay kafal etu bè yóm benwu boluyen Nyafulis. Kmó me bè yó, 12ne tódô me tmonok subô ebè syudad Flipay, yóm benwu snakuf Masdunya, okóm tey dê tau Rom nô bè yó snéen. Na me na legen udì bè yó.

13Timbow deng hto yóm Kdaw Kehegnô, mógów me ebè yóm él bè kilil yóm benwu yó. Hendem me déke bè yó gónó le gel stifun mni bè Dwata yó kem Ju menwu bè yó. Yóm kkól me bè yó, tódô glo me yó kem libun deng gna kól bè yó, omin me myón na a nit me lu stulón. 14Yó boluy yóm sotu libun hmungol kum Lidya, lemwót bè syudad Tyatira. Yó nmoen, gel hembalù nes ginggung alì mebtes. Hemtahu bè Dwata se kun. Bè yóm igoen hmungol ke Pol, Dwata fen heglileb du béléen yóm hnungolen, ne hentahuhen. 15Bè yóm deng kehtahuhen, ominen hbabtays, gomong se yó kem fes lówóhen. Kogol yóm kehbabtaysen, tinoken mi ebè gónóen, ne monen mò kum, “Deng tngón ye se yóm dou kehtahu bè Jisas. Yake na ye nô bélê me bè ni.” Ne tahu se, nimón me.

Kegkukub le Pol bè Flipay

16Sotu kdaw bè yó, yóm igò me tolo mógów ebè yóm gónó me gel stifun mni bè Dwata, geslong me yóm sotu ngà libun klifen, okóm wen lamaten. Tey filak gel guta yóm tau gónón geklifen, abay se wen kegbeken tmulón yóm angat sut elem haya lemwót bè yóm gel malak du. 17Bè yóm igò me mógów, tódô mensag huli kum, yó udélen, monen, “Ni se kem tau tóbóng lówó yóm Dwata hol geta bè kdéen. Yó nógów le ni,” monen, “na le e tulón kuy yóm gónó ye gewà gu lem hatay.”

18Hilu kdawen tendo gel semsulit du yóm monen yó efet tmakas Pol. Tódô beklil ebéléen, monen ebè yóm busaw malak du, “Lemwót bè kun boluy Jisas Krays, mdóhi béléen yóm ngà libun nalakem ni.” Tahu se, sen-gengen se tódô mdó béléen yóm busaw malak du.

19Timbow tngón yó kem tau mfun du yóm ngà libun ni yóm klaen dù bud lan le gemwa filak béléen, tódô kenfô le Pol ne Silas, nit le lu ebè yó kem tau genlal gel kmukum bélê le. 20Hdà le lu bè solu yó kem tau mogot kukum bélê le lemwót bè Rom, ne mon le mò kul, “Ni kem tau Ju ni, sónmò le hmala yó kem tau bè yóm syudad tekuy. 21Gel tolok le yóm tólóng adat igoen là hyu bè yóm kut udin. Tau me Rom se kum, là hyuhen bélê me yó kem adat gel tolok le.”

22Balù yó kem dumu tau bè yó, gotu gbót lenbut le Pol ne Silas se kul. Lemwót yó kem tau mogot kukum, wen tau dók le mò mlus nes le Pol anì hfes le lu. Ne tahu se, tey kabid kfes le kul. 23Deng kabid kfes le kul, omin le tmenes kul lem blanggù. Mon le bè yóm tau mentey blanggù, “Hol hgetem yóm bak tikeben.” 24Tahu se. Suen lu bè yóm hol són dfél lem blanggù, ne gotu lok le lem kfal nsol ti le.

25Tikóng deng dô sóól buteng, mni le bè Dwata le Pol lewu le Silas, lel le semngal yóm sngal dmóyón ke Dwata. Hnungol le lu snéen yó kem dumu tau bnanggù bè yó. 26Yóm igò le semngal, tódô mbel yóm tey linol bong. Tódô msinsig yóm blanggù gónó le nô, tódô gotu lemungkà yó kem tikeben ne tódô gotu bkas snéen yó kem kdina fét le yó kem tau bnanggù. 27Tódô gebtik se yóm tau mentey blanggù. Tikóng tonen yó kem tikeb blanggù gotu lemungkà, ofo kun ke deng le gotu mlóy yó kem tau bnanggù. Yó gónón dmilot sudengen, tódô tô hnatayen knóen. 28Okóm kendel hetê ebéléen Pol, monen, “Bê. Béem nmò yó. Tolo me nô bè ni he kdê me.”

29Ominen kendel tmaba mni solok yóm tau mentey blanggù, tódô kendel mógów ebè le Pol lewu le Silas, tódô hegluduk bè solu le, lelen tódô setbol kkelen. 30Ominen mit kul hewà, monen, “Ó kem Sér, tedu se tô nmou du anì gewae gu lem hatay?”

31Mon le Pol se mò du, “Hol hentahuhem Jisas, yóm hol gónó mogot, ne angati gewà, dalang se yó kem fes lówóhem.” 32Ne hlós gotu tulón le du yóm udél Dwata dalang se ebè yó kem dumu tau bè gónóen. 33Bè yóm uras kifu yó, yó nmò yóm tau mentey blanggù yó koni, gotu noloben halì le Pol lewu le Silas. Ne kendel tódô hbabtays yóm tau yó dalang se yó kem fes lówóhen. 34Ominen mit kul le Pol elem gónóen, ne henkenen lu. Ya tey kehligal le yóm kdê le, abay se deng le gotu hemtahu bè Dwata.

35Timbow hlafus bè yó, lemwót yó kem tau Rom mogot kukum, wen kem fulis dók le ebè yóm tau mentey blanggù anì hewaen le Pol. 36Tahu se. Mon yóm tau mentey blanggù mò ke Pol, monen, “Wen udél hwit yó kem tau mogot kukum anì hewau yu kun. Yó ne, yake hewà ye ne. Dwata he hol henek nawa ye.”

37Okóm yó mon Pol mò yó kem fulis, “Deng nfes le mi lem blóng yó kem tau igò le là deng smólók kum ke tedu salà me. Lel me tau Rom he kum. Ne deng tenes le mi lem blanggù. Ne ni kendel bud tô lifut hewà le mi. Là. Là tagad me hewà he. Tódô lu dé mógów edini yó kem tau Rom mogot kukum yó. Lu dé hewà kum.”

38Omin le lemwót yó kem fulis na le e tulón yó kem tau Rom mogot kukum yóm udél Pol. Ya tey sidek klikò le yóm kungol le kul tau le Rom le Pol. 39Omin le tódô gotu mógów ebélê le lem blanggù, na le e mni seflifót bélê le. Omin le mit kul hewà gu lem blanggù, ne hni le bélê le anì géhél tnagak le yóm benwu yó. 40Tahu se, lemwót le Pol lewu le Silas, hlós le ebè gónô Lidya. Sentifun le yó kem dumu le hemtahu bè yó, bud genduf le lu bè kehtahu le, omin le yó bud lemwót.

Currently Selected:

Kul Nmò 16: tbl

Highlight

Copy

Compare