Kul Nmò 14

Ktolok le bè Ikunyum

1Bè yóm kkól le Pol bè syudad Ikunyum, bud senged se gfà le. Tódô le hlós ebè yóm kul gónó gel stifun yó kem Ju ne tey mtukul yóm ktolok le bè yó. Tey genged tau hemtahu bè Jisas, kem tau Ju dalang se kem tau là Ju le. 2Okóm wen se kem Ju hemda du yóm ktolok le. Yó nmò le, dê sidek tulón le yó kem tau là Ju le anì lenbut le yó kem tau hemtahu bè Jisas. 3Bong na le legen le Pol bè yó. Là kô wen klikò le tmulón du yóm tulón hyu gbak ebè Jisas yóm gónó le mogot. Tey kehdilô Jisas du bè yó kem tau hmungol kul yóm hol ktahuhen yóm hyu gel tulón le, hlanen bè yó kem hentaw ton gel hmoen kul le Pol. 4Baling mesgólól nawa yó kem tau nô bè yóm syudad yó. Wen se gfi bè yó kem Ju, ne wen se gfi bè le Pol.

5Ngangen efet wen tô atul nmò le yó kem tau hemda yó. Wen se bélê le Ju, wen se là Ju le, ne mung kul yó kem tau gónó le galak. Yó tô atul le, mebel le lan le tô hemsidek kul le Pol, tô hnatay sentudà le lu botu. 6Bè yóm kungol le Pol du yóm yó, kendel le mlóy ebè syudad Listra ne bè Dérbi, kem benwu bè prubinsya Likunya, ne ebè yó kem dumu benwu hmilol du. 7Ne bè yó bud gónó le hetngón du yóm Tulón Hyu.

Ktolok le bè benwu Listra ne bè Dérbi

8Bè yó bè Listra, wen sotu tau kihod nô du, kihod lemwót bè ksuten, là kóen gógów. 9Myón bè yó se kun ne hmungol yóm ktolok Pol. Tódô dilô Pol béléen yóm kehtahuhen du yóm kegbek Jisas mkó yóm desen. Yó nmò Pol, tódô hmunu temngel ebéléen, 10ne ominen hgel udélen, monen, “Mdai ne, Wè.” Ne tahu se, tódô hebetik mdà yóm tau yó, ne tódô gógów se.

11Timbow ton yó kem tau yóm nmò Pol yó, botong le gotu gehensag, mudél le bè kul udél yó kem tau bè Likunya, mon le, “Deng le mnaul elaan yó kem dwata tekuy, hlingu le bè tau.” 12Yó tô boluy le kul le Pol boluy yó kem dwata le. Boluy le ke Barnabas, Sus. Ne fen boluy le ke Pol, Hérmis, abay se du fen gel mudél ebélê le. 13Uma moni bè lewà yóm benwu yó yóm gónô Sus. Yó nmò yóm tau fen gel demsù ebéléen, wen kem safì tudu nwiten deng hniegen bulók, hdaen bè bak sut yóm benwu yó mò dsù le ebè le Pol.

14Timbow gungol Barnabas ne Pol yóm tô nmò le yó, botong geksê le nes le. Tódô le mlóy etu bè yóm gónó le deng stifun yó kem tau, 15tódô hendlà hgel le udél le, mon le, “Ó kem tau, moen de ke ni tô nmò ye? Olo me tau lómón kuy. Nim nógów me edini ni, na me e tulón kuy yóm Tulón Hyu anì gkogol ye ni kem dwata kéng laen dù genbek le, ne beklil ye ebè yóm Dwata mowil, yóm tehe dmimun longit ne tonok ne mohin ne kdéen ton. 16Bè yóm tehe yu ekni,” mon Pol, “tódô bayà Dwata yó kem tau te tonok, balù kihu kul knóyô nmò. 17Okóm lemwót bè kbuten, sal gel wen gónón hegfan du bè tau yóm hyu gel nmoen anì dilô tekuy. Du se fen gel hkulón ne gel htowok yó kem hulu tekuy anì mungu le bè yóm kul bulón gel kbungu. Du se mò du anì là élél tekuy ken, ne anì wen gónó tekuy gel hligal.” 18Balù yóm tey kbólów le Pol kul, bede tek udì duen gónó le là demsù ebélê le yó kem tey tau wen yó.

19Là legenen bè yó, wen kem Ju lemwót bè yóm sotu Antyok snakuf Pisidya, ne bè Ikunyum. Yó nógów le, na le e nofong yó kem tau bè yó anì lenbut le Pol. Tahu se. Yó nmò le, deng mom sentudà le lu botu le Pol, ne tódô sendyol le lu ebè lewà yóm benwu yó, ofo kul mon du ke deng matay ne. 20Okóm mógów le ebéléen yó kem dumuhen hemtahu, gotu snibut le. Ne tódô bud btik lem blóng le Pol, mung kul mulék elem yóm benwu yó koni. Timbow hayahen bè yó, bud le lemwót lewu le Barnabas, mógów le ebè yóm benwu boluyen Dérbi.

Kulék le ebè yóm sotu Antyok tehe gónó le gu lemwót

21Yóm kkól le Pol ne Barnabas bè Dérbi, tódô bud tulón le se yóm Tulón Hyu nwit le. Ne tey dê se kem tau bè yó baling tau lemolò ke Jisas. Omin le yó bud mulék ebè Listra ne bè Ikunyum ne bè yóm Antyok snakuf Pisidya. 22Ten-gel le nawa yó kem tau hemtahu, ne tey kegduf le kul anì là gkó le du yóm deng ksalig le ke Jisas. Yó mon le, “Nan dê he mgel glan tekuy ke tô tekuy gmung bè yóm kogot Dwata tau.” 23Tódô ket yó kem benwu gónó le tehe tmolok, sal gel wen kem tau tuha nélék le mò fen malak yó kem tau hemtahu bè yó. Sok deng gel kélék le kul, glok le fasting, ne mni le bélê le bè Dwata, ne hogot le lu bè Jisas, yóm gónó le mogot deng snalig le. 24Bud kewót le Pol bè yó, mlan le bè prubinsya Pisidya efet le kól ebè prubinsya Pamfilya. 25Bud le slob tmolok udél Dwata bè syudad Pérga, omin le hlós ebè syudad Atalya.

26Bè yó gónó le smakay kafal hlós lan le mulék ebè Antyok, yóm syudad gónó le tehe gu lemwót. Yó kem tau hemtahu bè yó, lu se tehe hfogot kul le Pol bè Dwata bè yóm nmò deng sigang Dwata ta le. Ne ni se kehdeng le du yóm tehe hmoen kul yó. 27Bè yóm deng kkól le bè Antyok, gotu sentifun le yó kem tau hemtahu, ne gotu tulón le kul se yóm deng nmò Dwata hlanen bélê le. Gotu tulón le yóm nmò Dwata mò gónó le hemtahu bè Jisas se kul yó kem tau là Ju le. 28Na le bong legen bè yó he lem blóng yó kem dumu le hemtahu bè yó.

Currently Selected:

Kul Nmò 14: tbl

Highlight

Copy

Compare