2 Tutul Israél 5
5
Kwit le du ebè Gónô Dwata yóm Slungan Fasad
(1 Bok Kem Tau Hol Geta 8:1-9)
1Timbow deng gotu deng Selumun yóm kdê nmò bè kehdaen yóm Gónô Dwata, ominen mit du elemen yóm kdê kimu deng tehe eles hetfing maen Dabid ebè Dwata, gomong yó kem tahu blówón ne blówón bukay ne yóm kdê ngom ken wen mu le du bè Gónô Dwata. Yó kem yó, gotu hsuen bè yóm dfél deng eles hetfing le mò gónó le hemsù yó kem kimu mebtes bè Gónô Dwata.
2Omin Selumun gotu htaba kul ebè Jirusalim yóm kdéen tuha malak bè Israél, yó kem tuha malak bè ket ból le ne bè ket tbong le. Yó gónón htaba kul anì nangay le bè syudad Dabid yóm syudad gel mon le Sayun, yóm Slungan Dwata yóm Slungan gónón nô yóm tehe senfasad le Dwata yó kem tau Israél, ne eted le ebè yóm Gónô Dwata lomi hdaen. 3Tahu se, gotu le stifun ebè yóm tau hol geta bè yóm kdaw Kehligal le bè Slung bè yóm ghituhen bulón. 4Timbow le gotu stifun, lemwót yó kem sfu Libay, nwa le yóm Slungan Dwata 5mung du yóm tolda ne yóm kdê ngom nô lemen. Gotu nwit le ebè Gónô Dwata yóm kdéen. Yó mit du, són yó kem sfu Libay gel blóng ebè Dwata. Lemwót yó kem tau gel blóng ebè Dwata ne yó kem sfu Libay lu se mit du ebè Gónô Dwata yóm Slungan Dwata yó. 6Lemwót Selumun yóm tau hol geta ne kdê yó kem tau Israél, gotu le hedsù ubiha ne safì bè solu yóm Slungan Dwata. Ya tey kwenen yóm hedsù le, là kô gbekem msó kul.
7Omin yó kem tau gel blóng ebè Dwata mit du ebè Gónô Dwata yóm Slungan Dwata yó, ne ditu hol lem yóm Dfél hol gónón nô Dwata gónó le hemsù du. Sù le laan yóm hafak yóm lewu lennged hógów Dwata deng nmò le, boluyen sirubim. 8Lemwót yóm ból hafak le, gnolungen ta yóm Slungan Dwata, ne gomong gnolungen snéen yó kem koyu gónó le tmihang du, lómón ke ketefen. 9Tey tahà yó kem koyu yó, botong gfan yó kem tukô le ke wen tau mdà bè bak dól bè yóm tanay dfél lem Gónô Dwata, yóm bnoluy le Dfél hetfing ebè Dwata. Okóm ke mdà le bè lewaen, là kô ton le du. (Yóm tihang yó, tolo nô bè yó efet yóm kmoen ni.) 10Laen kô dumu nô lemen yóm Slungan Dwata yó, tek són yóm lewu kem botu kufil tehe sù Musis lemen bè Bulul Sinay bè yóm tehe kesfasad le Dwata yó kem tau Israél bè yóm kehewà le gu bè Idyip.
11Omin le hewà gu lem yóm Dfél hetfing ebè Dwata yó kem tau gel blóng ebè Dwata. Tódô kdê yó kem tau gel blóng ebè Dwata nô bè yó, deng gotu hfólós le knô le, kem tau mò nmò bè yóm kdaw yó, duhen ke là kul kdaw kmò nmò du, gotu hólós le knô le. 12Yó kem sfu Libay hulung semngal, le Asaf ne Himan ne Jidutun, ne kem ngà le logi ne kem dumu le setwoli logi, gotu le mnes bukay tahà, mdà le fi dmata kdaw bè kilil yóm gónó le gel demsù, sendofì le yó kem simbal nogot le, ne huni le yóm lewu kay kenbit le. Slomong bélê le yóm lematu lewu folò kem tau blóng ebè Dwata fen mféw. 13Yó kem tau mféw ne yó kem tau semngal, tódô le segeng dmóyón ke Dwata ne slamat le béléen. Segeng kul yó kem dumu tau mféw ne yó kem tau semdofì simbal, ne yó kem dumu gel huni le. Hgel le sngal le ne dóyón le Dwata, mon le,
“Tey hyu yóm Dwata.
Yóm kun kbong nawa là kóen monol ne laen kô dù tul sónen.”
Bè yóm kmò le du yó, tódô tfeng lobun lem yóm Gónô Dwata. 14Là kô gbek le bud mò du yóm gel nmò le lemen yó kem tau gel blóng ebè Dwata, abay se deng tódô tfeng yóm tey keslinang Dwata lem yóm kun Gónô.
Currently Selected:
2 Tutul Israél 5: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
