2 Tutul Israél 36
36
Kogot Jihuhas yóm benwu Juda
(2 Bok Kem Tau Hol Geta 23:30-35)
1Yó nmò yó kem tau Israél, nmò le Jihuhas ngà Jusaya logi mò tles tau hol geta bè Jirusalim. 2Deng lewu folò tlu ne halay Jihuhas yóm kbalingen tau hol geta. Okóm tek tlu bulónen mogot benwu ne bè Jirusalim gónón nô. 3Hdó Niku yóm tau hol geta bè Idyip. Yó hbayad Niku yóm benwu Juda mò bwis le, botong tlu libu fat latu kilu blówón bukay ne tlu folò fat kilu tahu blówón. 4Yó nmò yóm tau hol geta bè Idyip, nmoen Ilyakim yóm dumun setwoli Jihuhas, mò tau hol geta bè Juda ne bè Jirusalim. Tenlesen boluy Ilyakim, tlesen du Jihuyakim. Fen nwit Niku Jihuhas ebè Idyip, ditu gónón heblanggù du.
Kogot Jihuyakim yóm benwu Juda
(2 Bok Kem Tau Hol Geta 23:36—24:7)
5Deng lewu folò limu ne halay Jihuyakim yóm kbalingen tau hol geta. Yó kegenen mogot benwu, sfolò sotu halay ne bè Jirusalim gónón nô. Yóm gel nmò Jihuyakim, tey sidek bè kton Dwata du yóm sana kun Dwata hol gónó mogot. 6Lemwót Nibukadnisar yóm tau hol geta bè Babilun nundugen Jirusalim, ne nleden. Yó nmò Nibukadnisar bè Jihuyakim, nféten kedina ne nwiten ebè Babilun. 7Wen kem ngom mebtes nwa Nibukadnisar lem yóm Gónô Dwata, ne suen bè gónô bongen bè Babilun. 8Yó kem dumu nmò Jihuyakim bè yóm kogoten benwu ne yó kem alì kenbê deng nmoen, ne yó kem dumu sidek gel nmoen, deng gotu snulat bè yóm bok boluyen, Tutul yó kem Tau Geta bè Israél ne bè Juda. Yó bud tles mogot benwu, yóm ngaen logi boluyen Jihuyakin.
Kogot Jihuyakin bè Juda
(2 Bok Kem Tau Hol Geta 24:8-17)
9Yóm kbut Jihuyakin mogot benwu, hanà sfolò wolu he halayen, okóm tek tlu bulón bud sfolò kdawen mogot benwu ne bè Jirusalim gónón nô. Yó kem gel nmò Jihuyakin, hono sidek bè kton Dwata du. 10Bè hanà kbut yóm halay tmodol, hfangay Nibukadnisar Jihuyakin ne nwit le ebè Babilun. Bè yóm kdaw yó, tey dê kimu legen alì mebtes nô lem Gónô Dwata negef le ebè Babilun. Omin Nibukadnisar mélék ke Sidikaya yóm mà dì Jihuyakin, mò tles tau hol geta bè Juda ne bè Jirusalim.
Kogot Sidikaya yóm benwu Juda ne yóm kegbà Jirusalim
(2 Bok Kem Tau Hol Geta 24:18-20; Jirimaya 52:1-3)
11Yóm kbut Sidikaya mogot benwu, hanà lewu folò sotu he halayen, ne yó kegenen mogot benwu, sfolò sotu halay ne bè Jirusalim gónón nô. 12Deng mom nmò Sidikaya yóm hono sidek bè kton Dwata du, yóm kun Dwata hol gónó mogot, ne là hnungolen du yóm udél hwit Dwata ebéléen hlanen bè Jirimaya yóm tau tugod Dwata, ne là kóen móyô heglaan béléen. 13Sotuhen, mom natuen Nibukadnisar yóm tau hol geta bè Babilun, igoen tehe hsafà du hlanen bè boluy Dwata anì là smonolen. Tey mgel kuluhen nim Sidikaya ni, là kóen móyô semfulék ebè Dwata yóm sana kul Dwata hol gónó mogot yó kem tau Israél.
14Lelen yó he, lemwót yó kem geta bè yó kem gel blóng ebè Dwata dalang se yó kem tau, là kô le bud hteneb lemolò ke Dwata yóm kdê le. Deng mom lolò le yó kem sidek alì kenbê gel nmò yó kem tau hmilol kul bè yóm klolò le yóm kul dwata. Bè yóm kmò le du yóm yó, deng mom nmò le yóm là mólósen lem yóm Gónô Dwata bè Jirusalim yóm Gónô deng tehe hfólós Dwata mò kun.
15Yó nmò Dwata yóm kul Dwata hol gónó mogot yó kem tehe fù le, wen kem tugoden senflós hógówen elem blóng le mò eles hetgama kul, abay se là móyóen gemlà kul, dalang se yóm Gónô gónóhen nô lem blóng le, là móyóen ke gebà. 16Okóm deng mom hennê le yó kem tugod Dwata yó kem tau, là kô hnungol le kul, mom knuli le lu, efet là bud gbek Dwata hembala nawan, ne laen kô dù bud lan le gewà bè yóm kebuten kul.
Kegbà Jirusalim
17Yó gónóm mon, hlus Dwata yóm tau hol geta bè Babilun mò mundug kul. Yó nmò yóm tau hol geta yó, gotu hfatayen yó kem logi lomi lemnok bélê le. Baluen ke deng le mlóy elem Gónô Dwata, sana gotu khatayen kul lemen. Laen kô dù tau knodu le lenwóten bè kem ngà kkólen bè yó kem deng tuha, kem logi ne kem libun, kem tau wen des le ne kem tau tilob klówó le, gotu hfatayen lu. Tódô lus Dwata lu yóm kdê le elem hólól yóm tau hol geta yó. 18Gotu nuku yóm tau hol geta bè Babilun kdê yó kem ngom mebtes wen mu le du lem yóm Gónô Dwata. Nukuhen snéen yó kem dumu kimu mebtes henyu le lemen kkólen bè yóm kimu mebtes yóm tau hol geta bélê le, ne kul kimu mebtes yó kem tau genlal bè yó. Tódô gotu nwiten bè yóm kuléken ebè Babilun yóm kdê deng nukuhen yó. 19Gotu htemen yóm Gónô Dwata ne yóm syudad Jirusalim, gomong yó kem gónô bong bè yó, mung du yó kem kendengen le. Gotu hegbaen snéen yóm beng hmilol yóm syudad Jirusalim. 20Lemwót yó kem dù mowil, gotu negefen lu ebè benwuhen bè Babilun. Henbalingen lu mò heseken ne mò hesek yó kem ngaen. Ngang le ghesek efet sut yóm tau hol geta boluyen Sirus lemwót bè benwu Pérsya tles bud mogot yóm benwu Babilun. 21Duhen yó, deng dohò yóm tehe udél htugod Dwata ke Jirimaya, yóm monen, “Botong hitu folò halay kegenen laen kô dù tauhen yóm benwu yó kem tau Israél lemwót bè yóm là klolò le du yóm hlolò Dwata kul bè yóm ket gehituhen halay là kmò le hulu.”#36:21 Yó hlolò Dwata kul, bè ket gehituhen halay, là tagad le mò hulu anì nahen na bud mulék hyu yóm tonok le. Okóm là kô dog lolò le du, ne yó gónó Dwata hbayad du kul yóm là kimón le. Botong hitu folò halayen laen dù tauhen yóm benwu yó, laen kô dù hulu tmowok tahen.
Khulék Sirus kul ebè benwu le yó kem tau Israél deng negef
(Isra 1:1-4)
22Bè yóm hol tanay halay kogot Sirus yóm benwu Pérsya,#36:22 Yóm Sirus mogot bè benwu Pérsya yó, bud nogoten snéen yóm benwu Babilun tehe gónó le e megef yó kem tau Israél. hdohò Dwata yóm tehe eles htulónen yóm sotu tehe tugoden ekni boluyen Jirimaya. Yó nmò Dwata, wen hfedemen ke Sirus yóm tau hol geta anì wen snulaten mò hwiten ebè klamang yóm benwu snakufen. Yó kóyô Sirus bè nim sulaten ni ke hgel le semfala du bè gónón wen bè klamang yóm benwu nogoten. Yó nô lem yóm sulaten, monen, 23“Ni se udél Sirus ebélê ye, yóm tau hol geta bè Pérsya. Yóm sana Dwata hol gónó mogot yóm Dwata nô bè longit, deng gotu hkamalen dou yóm klamang benwu. Deng fen sigangen tahu bud hefdà du yóm kun Gónô bè Jirusalim yóm syudad glem lem Juda. Duhen ni, yóm kdê ye kem kun tau Dwata tehe negef, hol ye bud mulék ne ebè yóm kuy benwu anì na ye e bud hdà yóm kun Gónô Dwata bè yó. Yó hem sana kuy Dwata hol gónó mogot tendo nô bélê ye.” Yó se yóm udél snulat Sirus.
Currently Selected:
2 Tutul Israél 36: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
