2 Tutul Israél 35
35
Kehligal Jusaya yóm Kdaw Khius
(2 Bok Kem Tau Hol Geta 23:21-23)
1Heglalag Jusaya bè yóm kdéen tau yóm bud kehligal le yóm Kdaw Khius bè Jirusalim. Nétê le yóm ngà ubiha gel nétê le bè yóm Kdaw Khius bè yóm gesfoloen fat kdaw bè yóm tanay bulón. 2Hmò Jusaya yó kem tau gel blóng ebè Dwata yóm kul nmò bè yó lem Gónô Dwata, ne tey ketgelen kul bè yóm kmò le nmò bè yó. 3Yó monen mò yó kem sfu Libay deng hetfing le tmolok yó kem tau Israél, “Yóm Slungan Dwata, là bud sentihang ye du ne, deng nô lem yóm Gónô Dwata hdà Selumun ngà Dabid yóm tau hol geta bè Israél. Yó nmò ye, tódô hotu ye nawa ye mò nmò bè yóm sana kuy Dwata hol gónó mogot ne bè yó kem kun tau Israél. 4Nmò ye yóm kuy gel nmò lem Gónô Dwata hlan ye bè yóm lumbuk gónó ye gu tembong. Hol lolò ye yóm tehe hlolò Dabid yóm tau hol geta bè Israél deng snulaten bè bok, dalang se yóm hlolò yóm ngaen Selumun deng snulaten bè bok. 5Nô ye bè yóm kuy gónó gel mdà lem Gónô Dwata, ne hol tnóbóng ye yó kem fes lówó gsigang bélê ye bè yóm kwit le du elem Gónô Dwata yóm dsù le ebè Dwata. 6Hnatay ye yóm ngà ubiha gel nétê ye bè Kdaw Khius, hólós ye knô ye, ne eles ye htifes tmóbóng bè yó kem dumu ye angat sut bè yó. Hol lolò ye yóm hlolò Dwata kuy hlanen bè Musis.”
7Omin Jusaya bemlay tlu folò libu ngà ubiha ne ngà kambing, ne tlu libu safì mò dsù blayen bè yó kem tau bè Kdaw Khius. 8Yó kem genlalen, bud lemwót lem but blutut le se kul yó kem kul blay ebè yó kem tau, ne ebè yó kem tau gel blóng ebè Dwata ne bè yó kem sfu Libay. Bong kul le Hilkaya ne Sikaraya ne Jihiyél kem genlal fen mogot yóm Gónô Dwata, yó kul blay ebè yó kem tau blóng ebè Dwata mò dsù bè Kdaw Khius, botong lewu libu bud nem latu ngà ubiha ne ngà kambing, ne tlu latu safì tudu. 9Dalang se yó kem geta bè yó kem sfu Libay, Kunanaya mung du yó kem twolihen le Simaya ne Nitanél ne Hasabaya ne Jiyél ne Jusabad, yó kul blay ebè yó kem sfu Libay mò dsù le bè Kdaw Khius, limu libu ngà ubiha ne ngà kambing, ne bud limu latu safì tudu.
10Tikóng deng kehtifes le du yóm kdéen bè Kdaw Khius, lemwót yó kem tau gel blóng ebè Dwata ne yó kem sfu Libay, mdà le bè yóm kul gónó mdà lem Gónô Dwata hlan le bè bung yóm kul gónó gu tembong, ulit le bè yóm hloloen kul yóm tau hol geta bélê le. 11Omin kem sfu Libay hmatay yó kem ngà ubiha ne kem kambing gel dsù le bè yóm Kdaw Khius, ne nwit le litô le bè yó kem tau gel blóng ebè Dwata. Yóm litô yó, hetsik yó kem tau gel blóng ebè Dwata ta yóm gónó demsù yóm igò le tmétê yó kem ógóf yó kem sfu Libay. 12Eles htólóng le se yóm dsù hkekeb le ebè Dwata anì nólól le bè yó kem tau bede hlan le bè ket lumbuk fes lówó le yóm kólól le du mò dsù le ebè Dwata, ulit le bè yóm deng snulat bè bok Musis. Senged se bud nmò le bè yóm safì tudu. 13Omin le tmétê du lenbotù yó kem ubiha dsù bè Kdaw Khius yó, ulit le bè yóm hlolò le. Ne wen yóm utón dsù le ebè Dwata htólóng le, ne tnógó le lem tahu kuleng ne lem kuleng tonok ne lem kuleng kalà, ne kendel nólól le bè yó kem tau mò ken le.
14Ke deng deng kmò le du yó kem sfu Libay yóm yó, omin le hemtifes yóm mò kul ken ne ken yó kem tau gel blóng ebè Dwata, abay se yó kem tau gel blóng ebè Dwata sfu Aron, deng tódô nbut le hlafus efet kól kifu demsù yóm dsù hkekeb ebè Dwata ne hkekeb yóm tóbóen ebè Dwata. Duhen yó, fen hentifes yó kem sfu Libay nim kdéen ni. 15Lemwót yó kem tau fen gel semngal kul nmò kem sfu Asaf, mdà le bè yóm kul gónó seblà mdà, ulit le bè yóm hlolò Dabid ne Asaf ne Himan, ne Jidutun yóm tugod Dwata ebè yóm tau hol geta. Bong yó kem tau mentey bè bak tikeb yóm Gónô Dwata, là kô tebel le du yóm gónó le mentey, abay se yó kem dumu le sfu Libay fen meted du bélê le bè yó yóm ken le.
16Duhen yó, bè yóm kdaw yó gotu deng yóm kehligal nmò le bè Dwata bè Kdaw Khius. Yóm kdê yó kem dsù hkekeb le, dsù le bè yó ta yóm gónó le gel demsù ebè Dwata, lómón yóm deng hmoen kul Jusaya yóm tau hol geta. 17Tódô kdê yó kem tau Israél nô bè yó bè Jirusalim hmigal du hitu kdaw yóm Kehligal bè Kdaw Khius ne Kehligal Yóm Mambang Laen Dù Bulung Henoken. 18Lenwóten bè yóm tehe kun kdaw Samwél, laen dù deng bud hmigal du he yóm Kdaw Khius bè Israél. Laen dù bè yó kem tehe tau hol geta bè Israél ke deng hmigal du lómón yóm kun kehligal du Jusaya, homongen yó kem tau gel blóng le ebè Dwata ne yó kem sfu Libay, ne yó kem tau bè Juda ne kem tau Israél, gotu le nô bè yó, dalang se yó kem tau bè Jirusalim. 19Nim Kehligal le bè Kdaw Khius ni, deng sfolò wolu halay Jusaya ne mogot benwu.
Katay Jusaya bè gida
(2 Bok Kem Tau Hol Geta 23:28-30)
20Timbow deng kehetlob Jusaya du yóm Gónô Dwata, lemwót Niku yóm tau hol geta bè Idyip, mung du yó kem sendaluen mit le sfatay bè Karkimis bè Él Yufratis. Kewót Jusaya bè yó nundugen lu. 21Okóm wen kem tau hógów Niku ebè Jusaya, yó udél hwiten kul, monen, “Laen dù kóm du nim ni, tau hol geta bè Juda. Là uu du yóm dumuhu sgida kemdaw ni. Són nitu sfatay yó kem benwu nitu sgida. Ne deng mon Dwata mò dou géhéle mit sgida. Béem tenbleng Dwata, yóm nô béléu, déke genlaen uu.”
22Okóm là kô hnungol Jusaya ke Niku yóm gónó Dwata deng hemlan udélen, ne là kóen mulék. Deng mom nwiten yó kem sendaluen na le e mit sgida bè datal Migidu. Kóhen yóm nes tau hol geta leseken anì laen dù tau dmilô du. 23Okóm gentì le Jusaya, ne hnalì. Yó udél Jusaya ebè yó kem tauhen, monen, “Nwa ye ou bè ni, abay se tey bong nim haliu.”
24Tahu se, nwa yó kem kun tau gu lem yóm klitun tóken ne nili le ebè yóm sotu klitun tók, ne nwit le ebè Jirusalim. Bè yó gónón matay, ne lebeng le bè yóm gónó le lembeng yó kem fuen. Tódô kdê yó kem tau bè Juda ne bè Jirusalim, gotu lemangag ke Jusaya. 25Wen kem lanu nmò Jirimaya bè yóm katay Jusaya, ne efet nim kmoen ni sana gel kesngal le du, libun duhen logi mò gónó le hemtulón du nawa yóm katayen. Nim sngal langag ni, tódô hlós adat lolò le bè Israél, ne deng snulat le bè Bok Lanu. 26Yó kem deng nmò Jusaya bè kogoten benwu ne yóm kloloen ke Dwata, uliten bè yóm hlau Dwata deng snulat le, 27lenwóten bè kbuten efet kól bè sónen, deng gotu snulat le bè yóm bok boluyen Tutul yó kem Tau Hol Geta bè Israél ne bè Juda.
Currently Selected:
2 Tutul Israél 35: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
