2 Tutul Israél 1
1
Kni Selumun khulung hedem bè Dwata
(1 Bok Kem Tau Hol Geta 3:1-15)
1Yóm Selumun ngà Dabid, tey mbegel kogoten du yóm benwu Israél, abay se tendo nô béléen Dwata yóm kun Dwata hol gónó mogot, ne tey kehfasangen du. 2Gotu htaba Selumun yóm kdéen tau Israél, kem kmandér malak bè libuhen, ne kem kfitan malak bè latuhen, kem tau kmukum lem blóng le, ne yó kem tmuha malak kul, ne yó kem malak bè ket tbong le. 3Omin Selumun mit kul ebè yóm Gónô Dwata nô ta bulul Gibyun, yóm Gónô Dwata tehe gel nwit le mógów. Yóm Gónô Dwata yó, tehe hefdà Musis yóm tau tóbóng lówó Dwata bè yó bè yóm benwu laen hol wen tauhen. 4Bè yóm kdaw kehtaba Selumun kul yó, deng sana nangay Dabid gu bè Kiryat-dyirim ne yóm Slungan Dwata, ne deng suen bè Jirusalim bè yóm tolda deng hmoen mò gónón nô. 5Okóm yóm gónó demsù tembaga tehe hdà Bisalil yóm ngà Uri témê Hur, tolo nô bè yó ta bulul Gibyun bè solu yóm Gónô Dwata yó. Omin le gotu stifun bè yó bè solu yóm Gónô Dwata le Selumun ne yó kem tau mung du, wen snólók le bè Dwata bè yó. 6Bè yó bè solu yóm Gónô Dwata yó, lemwót Selumun mógów ebè yóm gónó demsù tembaga nô bè solu Dwata, ne botong lemibu dsù hefkekeben ebè Dwata bè yó tahen.
7Bè yóm kifu yó hegfan bè Selumun Dwata, bede hlanen bè knahen ne snólók Dwata, “Tedu de nóyóem? Mnihi béléu ne angat blayu kóm.”
8Bnalà Selumun se Dwata, monen, “Tey alì kbong nawam ke Dabid, yóm dou mà. Ne ni, deng nmoem ou tau hol geta mò tlesen. 9Duhen ni, Dwata yóm Dwata hol gónó mogot, hol hdohoem yóm deng fasadem ke Dabid yóm dou mà, yakà deng nmoen ou tau hol geta bè yó kem tey tau wen, hol lómón kwen le kfung talak tonok. 10Benlayem ou khulung hedem ne ketngón anì tilob kogotu kul ni kem tau ni. Laen kô dù tau gembek mogot kul yó kem kóm tau wen yó ke tek sotuhen.”
11Bnalà Dwata Selumun, monen, “Lemwót bè yóm óyóem mni du yóm yó, ne là kô hnihem du yóm kwen kendengenem ne kadat le kóm duhen ke katay yó kem hohonem, ne là se hnihem du ktahà klowilem, okóm deng mom yó hnihem yóm khulung hedem ne ketngón anì hulungi mogot kul yó kem tau hogotu kóm, 12dohò keblayu du kóm yóm khulung hedem ne ketngón deng hnihem. Bud benlayu uu kendengen snéen, ne yóm tey kadat le kóm yó kem tau, laen kô dumu tau hol geta gegna béléem duhen ke ghuli béléem gemsenged kóm.” 13Omin Selumun lemwót bè yó bè yóm Gónô Dwata nô ta bulul Gibyun, mulék ebè Jirusalim. Ne du mogot yóm kdéen tau Israél.
14Gotu sentifun Selumun yó kem klitun tók gel nit le ebè gida ne yó kem kudà gel demyol kul. Yó kwen yó kem klitun tóken, botong lemibu bud fat latu, ne sfolò lewu libu kem kudà gel nwit ebè gida. Tey kwen le yó kem kudaen, ne yóm dumuhen, suen lu bè Jirusalim anì moni béléen, ne yó kem dumuhen suen lu bè yó kem syudad deng eles hetfingen mò gónón hemsù kul. 15Bè yóm kun kogot Selumun, yóm blówón bukay ne tahu blówón bè Jirusalim, hol lómó kwen le botu. Ne yó kem koyu sidar alì mebtes, lómó kwen le yó kem tey koyu sikamor mteg bè but bulul bè Juda. 16Yó kem kudà Selumun, lemwót le gu bè benwu Idyip ne gu bè benwu Silisya. Yó kem tauhen fen heblihen kul bè Silisya, tódô benli le bè yóm hol kul bantang btes. 17Bè yóm kmoen yó, yóm klitun tók lemwót gu bè Idyip hbalù le ebè Jirusalim, yó kebli le du, nem latu botù blówón bukay, ne yó kebli le yóm sotu kudà, lematu bud limu folò botù blówón bukay. Ni kem kudà ni, tey dê bud hbalù le ebè yó kem tau hol geta bè yó kem tau Hitayt, ne ebè yó kem tau hol geta bè Aram.
Currently Selected:
2 Tutul Israél 1: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
