1 Kurin 7

Yóm snólók le bè kesyehen

1Ne ni balau du bè yóm tehe snólók ye béléu bè yóm ksulat ye.

Bong bè yóm snólók ye bè kyehen, hyu snéen yóm tau ke là dogen myehen. 2Okóm lemwót bè yóm tey klahilen bélê ye yóm mò samuk, yó se gónón hyu ke ket logi ne ket libun wen kul mdengen yehen.

3Ne yó kem tau syehen, là hyuhen ke là steneb le. Yó dé hyu ke ket sotu bélê le eles hendem le gónón gsengel yóm kesyehen le. 4Abay se yóm libun deng myehen, là bud kun du funen ne yóm lówóhen, okóm yó mfun du, duhen yóm tuha logihen. Dalang se yóm logi, là bud kun du funen ne yóm lówóhen, okóm yó mfun du, duhen yóm tuha libunen. 5Yó gónóm mon, yu kem tau syehen, hol ye gel steneb stungô. Són yó dé gónó ye là stungô ke wen kdaw blay ye ke Dwata anì laen dù hmala kuy bè yóm kni ye béléen. Okóm eles sentngón ye gna, omin ye bud stungô kogolen. Ke ni se nmò ye, laen dù lan Seitan smindil kuy lemwót bè yóm là kegbek ye mafas nawa ye. 6Sundu hlau du nim monu ni, okóm olohu mon du mò kuy yóm hyu bélê ye. 7Bè hol ktahuhen, hyu béléu ke là myehenen yóm tau lómón yóm dou. Okóm tódô tngónu là sengeden yóm genbek blay Dwata tekuy. Tólóng se blayen bè yóm sotu tau, ne bud tólóng se bè yó kem dumu.

8Ni wen udélu ebè yó kem sawang logi ne yó kem sawang libun ne ebè yó kem libun bolu. Hyu se ke dnalang ye yóm dou là dog kyehen. 9Okóm ke là gbek ye mafas nawa ye, tumù nawa ye tódô myehen ne. Mom hyu nawa ye ke myehen ye olo ke deng mom là gbek ye du mafas nawa ye.

10Ne ni udélu ebè yó kem tau deng myehen. Là tódóen lemwót béléu nim monu ni, okóm lemwót bè yóm gónó tekuy mogot. Yóm libun deng myehen, hol béen abay skó bè yóm kun tuha logi. 11Okóm ke deng skó, hol béen abay bud myehen dumu logi. Song hyu ke tódô bud nuléken yóm kun sana tuha logi. Senged snéen bè yóm logi deng myehen, hol béen abay skó bè yóm kun tuha libun.

12Ne bè yó kem dumu tau wen udélu ebélê ye snéen, okóm là lemwóten bè yóm gónó tekuy mogot nim udélu ni. Yó monu mò kuy, ke wen tau hemtahu, fen là hemtahuhen yóm tuha libunen, okóm ke là hemtulahen yóm libun yó, hol béen abay dog kó sen. 13Senged se ke bè libun hemtahu, ne fen là hemtahuhen yóm tuha logihen, okóm ke là hemtulahen yóm logi yó, hol béen abay dog kó sen. 14Anien he ke là hemtahuhen yóm tuha logihen, tódô gomong henmóyô Dwata lemwót bè yóm deng kessotu le yóm tuha libunen. Senged snéen ke là hemtahuhen yóm tuha libunen, kaem tódô gomong henmóyô Dwata se kun lemwót bè yóm deng kessotu le yóm tuha logihen. Ke là tahuhen nim ni, là kóen hyu bè Dwata yó kem ngà le, okóm ni, gomong henmóyô Dwata lu se kul. 15Okóm yóm tau là hemtahuhen monu yó koni, ke tódô lemwót bè kun kóyô skó bè yóm yehenen deng hemtahu, tódô bayà du ne. Là buden gfét du ne yóm yehenen là hemtahuhen yó. Abay se hol kóyô Dwata bè yó kem tau syehen ke wen kessotu nawa le. 16Yó gónón tódô mayà du yóm yehenen là hemtahuhen yó, abay se là kô tngónen du ke angat gbeken mit du bè solu Dwata, duhen ke là.

Klolò tekuy yóm kun knóyô Dwata

17Yóm ket sotu bélê tekuy, tódô henek bè yóm tehe sana kun kmò klowil snolu bè yóm tehe ktaba Dwata tekuy mò ngaen, yóm klowil tehe sigangen ta tekuy yóm gónó tekuy mogot. Nim monu ni, gel hlolou yó kem tau hemtahu bè ket benwu gónóhu gel tmolok snéen. 18Lómón yó sem logi deng htulì, là kóen hyu ke bud tô kóhen bè yóm deng kehtahuhen. Ne yóm tau là deng tnulì, là kóen hyu ke tô htulì bè yóm deng kehtahuhen. 19Là kô yó du bong muhen bè yóm tau ke tnulì duhen ke là. Okóm yó dé hol bong muhen ke nimónen yó kem kun hlau Dwata.

20Yake ket tau tódô henlelen mò du yóm sana klowil snoluhen bè yóm tehe kdaw ktaba Dwata du. 21Ke uu sotu tau klifen bè yóm kdaw ktaba Dwata kóm, kem kunen ne yó. Okóm ke wen se lanem gewà gu lemen, sawang là hewai. 22Ke deng tnaba yóm gónó tekuy mogot yóm tau klifen, là kóen bud klifen ne bè yóm ktonen du yóm gónón mogot. Senged snéen yóm tau là klifenen, ke deng tnaba Krays deng klifen béléen ne. 23Deng tehe benli Dwata tekuy, ne tey mebtes keblihen tekuy. Yó gónóm mon, bè Dwata dé gónó tekuy klifen, là bè tau du. 24Duhen yó, kem dumuhu setwoli, bè yóm kesetngón ye ke Dwata, yake ket tau hemlel mò du yóm sana kun klowil snolu bè yóm tehe ktaba Dwata du.

Yóm tau là dengen myehen ne yóm tau bolu

25Bong bè yóm snólók ye bè yó kem tau là dengen myehen, laen dù hlau lemwót bè yóm gónó tekuy mogot ke gbak bè nim snólók ye ni. Okóm wen tulónu kuy lemwót bè yóm dou kmò kehedem du. Ne denge baling tau gsalig lemwót bè yóm kkoduhen dou yóm gónó tekuy mogot. 26Bè dou kehedem du, bè nim tey dê gónó tekuy meflayam ni, hyu se yóm tau ke là dogen myehen. 27Okóm ke dengi se myehen, béi mom bud tô skó béléen. Okóm ke là dengi myehen, béi dog kem mebel yehen ne. 28Okóm ke móyô myehen se yóm logi, là salaen du. Senged se yóm libun ke móyô myehen, tô nan sidek du? Okóm bè yó kem tau deng myehen, tey dê gónón mgel klowil le, ne kóyóu ke là gnóm ye du yóm kgelen yó. 29Yó gónóhu mon du nim ni, kem dumuhu setwoli, abay se là buden té ne dù kdaw tekuy. Lenwóten ni ne, yóm logi deng myehen, béen abay geskét bè yehenen anì mekteng kmoen nmò bè Dwata. 30Baluen ke wen tau langag, duhen ke wen tau hligal, duhen ke wen tau wen kendengenen, yake béen geskét bè yó kem yó anì mekteng yóm kmoen nmò bè Dwata. 31Béen són bè yóm gutahen lem benwu ni gónón nô nawan yóm tau, abay se angat gesón nim benwu ni, mung du yóm kdéen nô tahen. 32Yó se hol kóyóu bélê ye ke béen dê tnafa nawa ye. Yóm tau là dengen myehen, kaem gbeken hol hmotu nawan hemdem mò du yóm hmoen du yóm gónó tekuy mogot, abay se bong muhen béléen ke hefligalen yóm gónón mogot yó. 33Okóm yóm tau wen yehenen, tey dê dumu hendemen bè kmò kgutahen klowilen, abay se bong muhen béléen ke hefligalen tuha libunen. 34Yó gónón seblangan nawan, lelen tô hefligal yóm gónón mogot ne lelen tô hefligal ke tuha libunen. Dalang se yóm libun là myehenen, kaem gbeken hmotu nawan hemdem du se kun yóm hmoen du yóm gónón mogot. Hotuhen nawahen ebè yóm gónón mogot, ne hotuhen gelen mò nmò béléen. Okóm yóm libun wen yehenen, dê dumu hendemen mò gónón hefligal ke tuha logihen.

35Là kô yó gónóhu mon du nim ni ke udélu hemseng kuy bè kyehen ye. Yó dé gónóhu mon du, kóyóu ke wen gónóhu gemtóbóng kuy. Yó nóyóu bélê ye ke laen dù gónó ye geskét bè klolò ye yóm gónó tekuy mogot anì mekteng kmò ye du yóm hmoen kuy. 36Bè yó kem tau deng slinti, okóm deng eles natul le yóm là tagad kesyehen le, ni udélu ebélê le. Ke lemwót bè yóm knóyô lówó yóm logi, ke yó hendemen là buden hyu yóm kmò kekdolen ebè yóm libun deng lenintihen, abay se là bud gafasen du nawahen, ne móyô kendel myehen du, yake tódô le syehen ne. Là kóen sidek ke yó nmò le. 37Okóm yóm logi, ke tódô lemwót béléen yóm là tagad kyehenen, ke hol lemwót bè kun kmò kehedem du, ne ke deng hulung mafas nawahen, tey hyu ke là tagad yehenen du yóm libun yó. 38Duhen yó, hyu bè yóm logi ke myehen, okóm milud he kehyuhen ke là myehenen.

39Là kóen hyu yóm libun ke skó bè yehenen ne bud myehen igoen tolo mowil yóm gna yehenen. Okóm ke deng matay se yóm gna yehenen, là sideken ke bud myehen syan ke dumuhen hemtahu. 40Bede bè dou kehedem du, tey bong hyu béléen he yóm libun bolu yó ke béen dog bud myehen. Bè kegnómu du nim monu mò kuy ni, denge galak bè yóm Tulus Dwata se dou.

Currently Selected:

1 Kurin 7: tbl

Highlight

Copy

Compare