DANIEL 6
6
Daniel inamean akan guha singa
1Limbah Belsasar matei, Darius oloh Media marabut karajaan. Metoh te umure jahawen puluh due nyelo. 2Darius mambagi karajaae manjadi saratus due puluh propinsi tuntang genep propinsi irentah awi ije biti gubernur. 3Daniel tuntang due biti oloh beken iangkate akan manantuani kare gubernur te uka raja ela imparugi. 4Palus gitan gawin Daniel je labih bahalap bara gawin kare gubernur tuntang kare pangawas je beken. Awi te raja handak mangkate jadi panguasa hapus karajaan. 5Tapi kare gubernur tuntang kare pangawas te nahuang manggau kare kasalan Daniel hong gawie marentah, tapi ewen dia olih, awi Daniel baketep tuntang bujur, hayak dia laya dengan kare kasalan en bewei. 6Palus ewen hamauh, “Itah baya tau sondau kasalan Daniel huang perkara agamae.”
7Limbah te ewen haguet haya-hayak manaharep tuntang hamauh, “Yoh, Tuangku Raja Darius, belom Tuangku sampai katatahie! 8Ikei uras je manantuani karajaan Tuangku, aloh kare pangawas, kare gubernur, kare wakil gubernur tuntang kare pajabat je beken, jari pakat akan manukas uka Tuangku mampalua surat parentah je musti inumom toto-toto. Keleh Tuangku marentah uka katahin telo puluh andau jaton oloh tau balaku dengan ije bara dewa atawa olon, kacuali dengan Tuangku kabuat. Eweh je malanggar parentah te akan injakah akan guha singa. 9Ikei balaku uka Tuangku maneken surat parentah te mangat jadi undang-undang Media tuntang Persia je dia tau imbalang tinai.” 10Palus Raja Darius maneken surat parentah te. 11Metoh Daniel mahining taloh te, ie buli akan humae. Kamare je intu tingkat hunjun aton pire-pire baunsengok je taharepe manintu Yerusalem. Tuntang kilau bahut, ie balakudoa manintu Hatalla tuntang manara Arae hantelo jandau dengan mandeko utut intu taharep kare baunsengok je babangah te.
12Metoh kare musoh Daniel mite Daniel kanjerae balakudoa manintu Hatalla, 13palus ewen uras manaharep raja akan mandawa Daniel. Ewen mansanan, “En dia Tuangku jari maneken surat parentah je mangahana uras oloh katahin telo puluh andau toh balaku dengan ije bara dewa atawa olon baya dengan Tuangku bewei? Tuntang kea, ewe-eweh je malanggar parentah te akan injakah akan huang guha singa?”
Raja tombah, “Toto, tuntang parentah te jadi undang-undang Media tuntang Persia je dia tau imbalang haluli.”
14Palus koan ewen dengan raja, “Daniel, ije bara oloh tawanan bara Yuda, dia paduli parentah Tuangku tuntang manawah parentah Tuangku. Ie balakudoa baatoran hantelo jandau.”
15Mahining auh te raja palus kapehe atei tuntang balisah, sampai ie manggau tirok uka manyalamat Daniel. Sampai halemei kea raja magon maniroke. 16Limbah te kare oloh te haluli manaharep raja tuntang hamauh, “Tuangku, keleh Tuangku mingat amon manumon undang-undang Media tuntang Persia, parentah je impalua raja dia tau iobah.”
17Kajariae raja marentah uka Daniel inangkap balalu injakah akan guha singa. Koan raja dengan Daniel, “Keleh Hatallam je inyembahm dengan baketep te manyalamat ikau.” 18Limbah te ije batu hai ina intu nyaman guha te, palus raja mancap batu te dengan cap karajaan tuntang cap kare oloh hai, sampai jaton oloh tau maliwus Daniel bara kare singa te. 19Limbah te raja te buli akan istana. Ie dia maku kuman tuntang iampong. Tuntang ije ale-alem ie dia tau batiroh.
20Hong katika tampalaeri raja palus misik tuntang haguet kaje-kajeng akan guha singa. 21Sana sampai hete ie palus mantehau dengan auh je meles, “Daniel, rewar ain Hatalla je belom! En Hatallam je inyembahm dengan kaketep te jari olih manyalamat ikau bara kare singa te?”
22Palus tarahining auh Daniel je tombah, “Belom Tuangku katatahie! 23Hatallan rewarm jari manyoho kare malekat Ayue akan mangop nyaman kare singa te sampai ewen dia mawi rewarm. Hatalla manyalamat rewarm awi Ie katawan je rewarm dia mawi kasalan Dengae tuntang dengan Tuangku.”
24Raja hanjak toto ie marentah uka Daniel impalua bara guha te. Limbah parentah te ilalus, ampie jaton himang samasinde intu Daniel, awi ie percaya dengan Hatallae. 25Limbah te raja marentah uka manyingkap kare oloh je jari mandawa Daniel. Palus ewen hayak dengan kare anak tuntang kare sawan ewen injakah akan guha singa te. Hindai sampai ewen akan laseh guha te, kare singa te jari manangkarap ewen tuntang mamparotek kare tulang ewen.
26Limbah te Raja Darius mangirim surat akan kare oloh bara kakare bangsa, suku tuntang basa intu hapus kalunen, “Salamat. 27Aku marentah akan samandiai oloh je aton huang tanah karajaangku uka mikeh tuntang hormat dengan Hatalla je inyembah Daniel!
Ie te Hatalla je belom katatahie,
sampai katatahie jaman Ie marentah,
karajaae dia tau binasa.
Kuasae jaton bara tikas
28Ie manyalamat tuntang maliwus,
malalus taloh kuasa tuntang taloh heran
intu langit tuntang intu hunjun petak,
Daniel jari inyalamate,
bara nyaman kare singa.”
29Tumon te Daniel tetep mimbing pangkat gantong katahin Darius tuntang Kores oloh Persia te marentah.
Currently Selected:
DANIEL 6: NIJ
Highlight
Copy
Compare
Share
Want to have your highlights saved across all your devices? Sign up or sign in
