1 RAJA-RAJA 18
18
Elia tuntang Obaja
1Limbah pire-pire katahie, intu nyelo katelo wayah pandang te, Tuhan hamauh dengan Elia, “Lius manaharep Raja Ahab, dia tahi tinai aku akan mampamohon ujan.” 2Palus Elia haguet.
Hong katika te lau jari paham toto intu Samaria. 3Awi te Ahab mantehau Obaja uka manaharep, (Obaja te oloh je mangapala gawi hong istana. Ie ije biti oloh je toto-toto manempo Tuhan. 4Metoh Isebel mampatei kare nabi Tuhan, Obaja toh mandohop 100 biti nabi awie manyahokan ewen intu huang goha – 50 biti huang ije goha – hayak mampakanan ewen.) 5Ahab hamauh dengan Obaja, “Keleh itah mangombang#18:5: Huang ije salinan je bara jaman horan inyurat Keleh itah mangombang; huang naskah Ibrani inyurat lius ikau tuntang kombang. hapus lewu toh tuntang manggau tahasak danum atawa sungei. Aya-ayaue itah kareh sondau oru akan manyalamat kuda tuntang bagal itah, mangat ije mahin dia bara meto ain itah je nyalang itah mampateie.” 6Limbah mambagi eka je handak ingombang te, ewen palus haguet. Ahab haguet manintu ije eka tuntang Obaja manintu eka je beken.
7Intu benteng jalan Obaja hasondau dengan Elia. Limbah kasene Elia, Obaja sujud mahormat ie palus misek, “En toto ikau, Tuan Elia?”
8“Toto, aku Elia,” tombah Elia. “Toh lius mansanan akan rajam je aku aton intu hetoh.”
9Obaja tombah, “Narai kasalangku sampai bapa handak manyarah aku akan Ahab uka impatei? 10Tagal Tuhan je belom, Hatalla je inyembah bapa, aku mansanan je raja jari manyoho aku manggau bapa akan hete-hete. 11Toh bapa nahuang mangat aku haguet manalih ie tuntang hamauh je bapak aton intu hetoh? 12Amon aku haguet bara hetoh, Roh Tuhan tau kareh mimbit bapa akan eka je dia ingatawangku! Tuntang amon aku mansanan akan Ahab je bapak aton intu hetoh, limbah te ie dia sondau bapa, batantu ie akan mampatei aku. Keleh bapak mangatawan, aku toh toto-toto manempo Tuhan bara katika aku korik! 13En Bapak dia mahining je metoh Isebel mampatei kare nabi Tuhan, aku manyahokan 100 bara ewen intu huang goha – tuntang mampakanan ewen? 14Toh, mbuhen bapa manyoho aku haguet mansanan akan raja je bapa aton intu hetoh? Ie batantu akan mampatei aku!”
15Elia tombah, “Tagal Tuhan pangkahai je ihaga awiku, aku hajanji akan dumah manaharep raja andau toh kea.”
Elia tuntang kare nabi Baal
16Palus Obaja haguet mansanan akan raja, tuntang Ahab kea haguet uka manyondau Elia. 17Metoh Ahab mite Elia, Ahab mangkariak, “Toh ie pangacau intu Israel!”
18“Aku dia pangacau,” tombah Elia, “Tapi ikau kabuat. Ikau tuntang keluargam je pangacau. Awim manyembah kare hampatong dewa Baal, ikau malangkah kare parentah Tuhan. 19Toh, soho hapus rayat Israel uka hasondau dengangku intu bukit Karmel. Imbit kea epat ratus lime puluh biti nabi Baal tuntang epat ratus nabi Dewi Asera je mandino ongkos bara permaisuri Isebel!”
20Palus Ahab mimbit salepah rayat tuntang kare nabi Baal te akan bukit Karmel. 21Palus Elia manokep rayat te tuntang hamauh, “Sampai hamparea keton nahuang tetep rambang atei? Amon Tuhan te Hatalla, sembah Tuhan! Amon Baal te Hatalla, sembah Baal!” Rayat je hapumpong intu hete suni benyem jaton tombah en-en. 22Limbah te Elia hamauh, “Intu marak kare nabi ain Tuhan baya aku ih je batisa, padahal intu hetoh aton 450 nabi Baal. 23Toh imbit akan hetoh due kongan sapi hatue. Soho kare nabi Baal te manduan ije kongan tuntang manyambalihe, limbah te ie maragae palus mandake intu hunjun pandok apui. Tapi ewen dia tau mantokan apui intu hete. Sapi ije kongan tinai akangku manatap taloh kalote kea. Aku akan manyambalihe tuntang manasang-maragae hayak mandake intu hunjun pandok apui. Tapi aku mahin dia akan mantukan apui intu hete. 24Keleh kare nabi Baal te balakudoa akan kare dewan ewen, tuntang aku kea akan balakudoa intu Tuhan. Je tombah auh lakudoa awie mangirim apui, ie te je Hatalla.”
Hapus rayat tombah hapan hai auhe, koae, “Buah auhm te!” 25Palus koan Elia akan kare nabi Baal te, “Awi keton are, keleh keton helo mintih sapi tuntang manatape, tapi ela mantokan apui intu pandok apui te. Limbah te keleh balakudoa akan hatallan keton.”
26Ewen mintih ije kongan sapi hayak manatape. Limbah te ewen balakudoa intu Baal bara hanjewu sampai bentok andau sambil mangkariak, “Keleh tombah auh ikei, Baal!” Ewen malalus jete harajur sambil babigal hakaliling mesbeh ewen, tapi jaton panombah samasinde.
27Hong bentok andau Elia manampara halalea ewen. “Balakudoa hai-hai ih hindai! Ie te nah hatalla! Mikeh ie tau metoh manore atawa metoh malayan kahekae, atawa tau kea ie metoh halisang! Atawa mikeh ie metoh batiroh, tuntang keton musti mampisike!” 28Kare nabi te balakudoa labih hai tinai. Tuntang kilau je bahut ilalus ewen, ewen mahiris bitin ewen hapan padang tuntang lunju sampai dahae mahasor.
29Kalote ewen raju-rajur sampai halemei kilau oloh ingumpang taloh. tapi jaton taloh je tombah, jaton taloh je manantuani auh ewen.
30Palus koan Elia dengan kakare rayat te, “Kan hetoh manokep!” Ewen uras hapumpong mangaliling ie; Limbah te ie nampara mangambuah mesbeh Tuhan je jari baderep. 31#Gen. 32:28, 35:10 Ie manduan due walas batu, genep batu mawakil ije bara due walas suku Yakob, iete oloh je jari inenga arae Israel awi Tuhan. 32Mahapan kare batu te Elia haluli mamangun mesbeh eka sombayang akan Tuhan. Intu hakaliling mesbeh te ie mangali parit je sukup kahaie sampai olih inyuang labih kurang lime walas liter danum. 33Ie manyusun kayu pandok apui hunjun mesbeh. Palus sapi je ije kongan te iragae intu hunjun kayu te. Limbah te ie hamauh, “Suang epat tangki hapan danum sampai kontep, palus nusoh danum te akan hunjun parapah tuntang kayu pandoke.” Limbah ewen mawi taloh te, 34ie hamauh “Sinde tinai,” maka ewen malaluse. “Sinde tinai,” koan Elia, tuntang ewen malaluse tinai. 35Balalu danume mahasor hakaliling mesbeh te sampai parite kontep awi danum.
36Sana sampai katika maluput parapah halemei, Nabi Elia manokep mesbeh te palus balakudoa “O Tuhan, Hatalla je inyembah awi Abraham, Isaak tuntang Yakob, parahan hong katika toh je Ikau te Hatalla intu Israel, tuntang aku rewar Ayum. Parahan kea iete uras taloh je iawiku toh puna uras manumon parentah Ayum. 37Keleh tombah, o Tuhan! Keleh tombah mangat rayat toh katawan je Ikau o Tuhan, aton Hatalla, tuntang Ikau je mawi ewen haluli dengan Ayum.”
38Palus Tuhan mangirim apui bara langit tuntang mangehu parapah te hayak dengan kare kayue, kare batu tuntang petake palus manjelap sampai lepah danum je aton intu huang parit te. 39Metoh rayat mite taloh te ewen manyombau baue akan petak hayak mahingkep sambil hamauh, “Tuhan te Hatalla! Toto Tuhan te Hatalla!”
40Elia hamauh, “Singkap kare nabi Baal te! Ije mahin ela aton je liwus!” Balalu kare oloh manyingkap kare nabi Baal te; limbah te Elia mimbit ewen akan Sungei Kison, tuntang intu hete ie mampatei ewen urase sampai lepah.
Wayah pandang lepah
41Limbah te Elia hamauh dengan Raja Ahab, “Toh keleh Tuan Raja haguet kuman! Hanjulo tinai ujan akan dumah, awi gohope jari tarahining.” 42#Yak. 5:18 Palus Ahab haguet kuman, tuntang Elia mandai akan hunjun bukit Karmel. Intu hete ie sontop sampai baue akan petak helat due utute. 43Ie hamauh dengan pelayae, “Dai akan tantan bukit tuntang tampayah akan hila tasik.”
Pelayan te mandai, balalu haluli tuntang hamauh, “Aku dia mite taloh en-en.” Sampai uju tingkat Elia manyoho ayange te mohon mandai uka manampah jete. 44Intu tingkat je kaujue ayang te haluli tuntang hamauh, “Aku mite baunandau korik kilau lokap lenge dumah bara hila tasik.”
Palus Elia hamauh dengan ayange, “Lius talih Raja Ahab, soho ie mandai akan karetae tuntang buli helo bara ie ihambang awi ujan.”
45Hong ije kabirep mate ih langit babalu hobah jadi derem, tuntang riwut hai dumah hayak ujan labat palus nampara. Ahab mandai akan karetae balalu buli akan Yisreel. 46Metoh te Elia mandino kaabas bara Tuhan. Ie malipet jubahe akan hunjun tuntang mametenge intu kahange balalu hadari manggoang Ahab hapus jalan sampai akan lawang lewu Yisreel.
Currently Selected:
1 RAJA-RAJA 18: NIJ
Highlight
Copy
Compare
Share
Want to have your highlights saved across all your devices? Sign up or sign in
