YIDNAK YIDNAK WENE 27
27
Paulus e koma arem Oroma wi mbiridnak wene
27:1-12
1Nde, nir-e e koma arem Italia mbururak wene-ge it-nen mbarogolug-e, Paulus min kamat inpidnak nap erep min-e Kaisat-nen idnak san winde wari mbi unu-ge Yulius iri na inggem inpiga-o. 2Onpogola-ge, Areramitium-nen lobok yidnak e koma iri-ge Asia yi eyak pem worali o siri nin me wok nan me wok mbereyekluk yosola, e koma na arem ngguruk mbirige-o. Mborogolar-e, Makeronia nap Tesalonika woraso Aristarakus imin luk mbirige-o. 3Nene luk kub-e Siron wok yige-o. Nde, Yulius-nen Paulus na yak tosolar-e: ”Nab-o. Kat kanggamirak-nen yongga kuruwakluk, endam mbiri-o” luk yak tij-o. 4Nde, iri me-nen e koma arem yi koma ombolwak pem mburukmu-ge, obube-ge nenabuwok nggwe-nen puk kil lobok yosola karuk, yi terapmu Kiperus emende nggut mak mak nggwe waige-o. 5Wagolar-e, Kilikia min Pampilia min wot wutluk, Likia nggweyak pem o Mira wok yige-o. 6Iri me-ge Aleksandaria-nen lobok yidnak e koma misig-e Italia mbereyekluk yosola karuk, san winde wari na-nen-e e koma na arem ninpil nggwij-o.
7Nde, nir-e ndan-et mborogolar-e, mberensa nggal pat nene yige-o. Siri mbaril mbaril-e Kenirus panggosa wok yige-t nde, obube iri-nen ndowaga iri me mbururak meya yosola karuk, e koma arem wagolar-e, ndobo Salmone nggaluk emende nggut mak mak nggwe yi terapmu Kerete waige-o. 8Nde, Kerete emende nggut mak mak nggwe siri mbara wagolug-e, o siri Lasea koroga, E Koma Kondok Yoso Sa Konak unu-ge Kigirik Nag-o iri me wok yige-o.
9O iri me-ge kwarat woraigerik pem, mburu we woragwi tarem na woraruk ombol nggwe yidnak me, e koma bem mbururak iri-ge yemen unpurak nggal ala karuk, Paulus-nen it yak ondosolar-e: 10”Naptak wa-e. An-nen kasolar-e, nit e koma arem mburulndig-e, meya-t kasu-o. E koma min e koma arem pil nggwidnak silobulo min nag-e lag-o. Nit nenpe min-et yemen nunpuwa-o” luk yak indij-o. 11Alat nde, san winde wari na-nen-e Paulus-nen yidnak wene te rak puruk, e koma waruk mboroso nap na min e koma ombo min enpem nde indi angin tubu yij-o. 12Nde, e koma kondok yoso sa iri me-ge toro wok yoso tarem wok yosola iri me wolmomtag-e meya alama, ap erep kwarat-nen yogolar-e: ”Yu me-nen mburulndig-e o Penik perak wok luk, iri me-nen toro wok yoso tarem wolmok-nen wal kujwog-o” luk yiga-o. Nde, o Penik iri-ge yi terapmu Kerete iri me e koma kondok yoso sa-o. Nde, Penik iri na yi koma wigaktag-e mo mboso araptap nggwe ponok ponok woragaij-o.
Yi koma bem mburukmu, obube nggulok puk kil lobok yidnak wene
27:13-38
13Nde, abare ena nggwe-nen obube-ge ndan-et nuk kil lobok yosola, it inndi-nen peragolar-e, ”Nit ninndi pidnak sa irit wok yul-o” luk, e koma tenagoso posid na nggogora pil laruk, yi terapmu Kerete na emende nggut korok korok waiga-o. 14Alat nde, ereya na-net yi terapmu na ambigit nggwe-nen obube nggulok puk kil lobok yij-o. Nde, obube iri unu-ge Mo Luwaso Araptap Abam Nggwe-nen Puk Kaso Obube-o. 15Obube na-nen e koma iri wat kil lobok yosolar-e, enabuwok nggwe mbururag-e meya ala karuk, ereba wok nunpuruk mburuwag-o luk, ninndi abu nak yige-o. 16Wok nunpuruk mberarik, yi terapmu marik mbi unu-ge Kelauda emende nggut koroga wagolar-e, siri mbara-net e koma marik na yilik pige-o. 17Iri luk, e koma marik na lit yaga e koma nggok na ebem pil larug-e, urugun worak pugwi mende wanuruk, e koma na kere nggulok pem kamasa urugun worak piga-o. Iri luk, yi sisiri unu-ge Siritis na bem lud ma naru, obube-nen wat kasola, e koma waruk mboroso sum na wesera labuk tak pikma-ge, e koma na yi ombol pem laring laring waring kagaij-o. 18Obube-nen kwiye worak ponok lel ponok lel ninndi tarosola, nene luk kub-e e koma arem woraidnak silobulo na yi ma mbo bil nggwiga-o. 19Iri rak puruk, nene luk kub-e e koma konugwi mende arem woraso pidsa it ondomok ininggi-nen yi mberak piga-o. 20Nir-e kwarat woragolar-e, mo min wonaru min mondok kagit lak, obube kwiye worak iri na-nen ponok lel ponok lel kwat nonposolat nak worasola-ge, ”Mondok nunluk mul-e lag-et kagi” luk peraige-o.
21Nde, ir-e nunggwi mende ninggit lag-et kwarat nggal worarug-e, Paulus na it ennggendumu men luk-nen yak ondosolar-e: ”Naptak wa-e. An nene kologolar-e, Kerete-nen mbirigit lak yelepnggal-e, lel mberel tak ninpilik, nenarengge ondoro rak pilik kwatlep pug-o. 22Alat nde, yawo-ge kit kinndi tugup lak worabokluk an-nen nggomo kundusu-o. Kit kennggendumu ap misiger-o luk tet yi-nen yemen kunpuwa bug-o. Are, e koma nak yumnduwa-o. 23Nde, yawo kubu-ge an-e at arengge nggal luk, an-nen erembel wanoso Mbal Pem Nagawan-nen idnak aid nap an neralu men luk-nen 24yak norosolar-e: ’Paulus wa-e. Kar-e kwiye kasu-ge meyog-o. Kar-e mondok Kaisat eram-et wok yugun-o. Mbal Pem Nagawan-nen we wok ondoso bem kat totno mbitli nap iri oboksa kat-nen lesa mondok inmiri yuwa-o’ luk yak nirij-o. 25Iri bem-e, naptak wa-e. Kinndi tugup lak wolmer-o. At-nen yak niridnak wene-ge irit kwat nunpuwa-o luk an nindi-ge Mbal Pem Nagawan ebem angin tubu yusu-o. 26Alat nde, yi terapmu misik eyak pem mondok mbo ninpil mburuwar-o” luk yak indij-o.
27Empat belas nene yogolar-e, nir-e Areria yi koma iri me obube-nen ponok lel ponok lel kwat nonposola woragolar-e, nde, nggiringgendumu nggal-e it e koma waruk mburugwi nap-nen peragolar-e: ”Nir-e yi eyak pem panggosa wok yili-o” peraiga-o. 28Iri ala-ge, ”Yi-ge arem, lak? Kemek tak, lak?” luk ndak wurugwi kerep kere paril pil mbigarik pem-e kere-ge duapuluh meter irit kaiga-o. Nde, siyak laboluk, tuguruk iri na nggal-et kwasa ndak wiriganggal-e, kere-ge lima belas meter kaiga-o. 29Kagoluk, ”Kerep pem ndugud yul-o” luk inndi kwiye-nen-e e koma tenagoso mende posid empat-e e koma ayo nggwe-nen mberak puruk, ”Ndag-et nak o nda yuwag-o” luk tepan yogolat woraiga-o. 30Nde, it e koma waruk mburugwi nab-e e koma arem-nen kwiye mburuwokluk yogolar-e, enpe-net nde, ”E koma tenagoso mende posij-e e koma abi nggwe-nen mberak pili-o” yuwakluk, e koma marik iri na yi ma mberak pil mbiga-o. 31Iri kwarogola karuk, Paulus-nen san winde wari min san winde na min yak ondosolar-e: ”Ap yu nde e koma arem woragit lak marig-e, kir-e kunluk yugup pug-o” luk yak indij-o. 32Yak ondosoloma-ge, it san winde-nen e koma marik yilik pidnak kere na mbarak pogola-ge, yi-nen waruk mbirij-o.
33O nda nda-ge it pidsa nunggwi mende nujwakluk, Paulus-nen enmengen mbarosolat-nen yak ondosolar-e: ”Kir-e ’Wat mul-a? Nunluk mul-a? luk kinndi pirik woragolar-e, nunggwi mende mondok ninggit lak empat belas nene yigeb-o. 34Iri bem-e, naptag-o. Kunluk worabok-nen nunggwi mende mer-o. Kit ya kennggendumu-nen ap misik anggulsu misiger-o luk tet lak ma bug-o” luk yak indij-o. 35Iri yak undurug-e, oroti mburu wanuruk, it pidsa inmbiri bem-et Mbal Pem Nagawan wa yak turuk, ndeksa ninggij-o. 36Nasola karug-e, it pidsa inndi kondok luk, it-nen na nunggwi mende ningga-o. 37Nit e koma arem woraige ap wonasa nenpe-ge duaratus tuju pulu enam-o (276). 38Ir-e inmbitsa nonggolug-e, e koma na angin lak makluk nggandum mbato iri-ge yi mberak piga-o.
E koma na tagaridnak wene
27:39-44
39O nda yosoloma-ge, nggweyak iri-ge yenggerak pigit lag-et nde, yik kaiganggal-e, yi unggut eyak pem-e yi mbini konak yik karug-e, it-nen peragolar-e: ”Mborogolat-nen-e e koma yu-ge iri me-t ndurum yil mburuwog-o” luk peraiga-o. 40Alama-ge, ir-e kere mbara e koma tenagoso posid ereba na-ge yi koma arem keya biga-o. Keya buruk, ereya na-net e koma ndung tak poso mende iri na kere weserak piga-o. Weserak purug-e, obube-nen yi mbini iri na ambigit nggwe inpil mburuwakluk, obube-nen wat kasola e koma waruk mboroso sum na e koma abi nggwe timnik piga-o. 41Alat nde, e koma na-ge yi mberen lambuk yoso sa iri nggosolar-e, sisiri bem ndurum yosolar-e, nggweyak arem pabera mborosolat, abi nggwe-ge puk yidnak me, yi nggweyerep nggwayerep e koma na eyo nggwe lel kasolar-e, tagara labuk yij-o.
42Nde, san winde-nen yebet kagolar-e: ”It kamat inpidnak nap ereb-e pin pem mbutluk, abu abu mburuwa naru pidsa undul-o” luk yebet kaiga-o. 43Alat nde, san winde wari na-nen Paulus imiri yosolar-e, it pidsa undurak peraidnak na yugwi rugwi makluk at-nen yak ondosolar-e: ”Kit pin kenaru nab-e nandug-et yi ma mbugupndik, pin pem yi eyak pem ndil ler-o. 44Nde, kit ereb-e e mbet pem ala na, koma telak pem ala na ndil ler-o” luk yij-o. Iri kwasa it pidsa konak nak eyak ele bem ndil laiga-o.
Currently Selected:
YIDNAK YIDNAK WENE 27: inondx
Highlight
Share
Compare
Copy
Want to have your highlights saved across all your devices? Sign up or sign in
@LAI 1992, 1994
