YIDNAK YIDNAK WENE 26
26
Paulus-nen ”Iri nggal-e lag-o” luk Ageripa yak tidnak wene
26:1-11
1Ageripa-nen Paulus yak tosolar-e: ”kar-e kondomok kowene yi-o” luk yak tosoloma-ge, Paulus-nen at inggi nuk karuk, elat mbarosolat-nen yosolar-e:
2”Nagawan Ageripa wa-e. Yawo-ge Yawuri nap-nen an nebem pidnak wene pidsa-ge kat kimbiri bem-et onggo yurak ala, nalen kasu-o. 3Nde, Yawuri nap-nen kwarugwi mende pidsa min it-nen wene eyak wat wat yugwi min kar-e mondok karu-o. Iri bem-e, ’An-nen yimin wene yu-ge yanggosa-t kuli-o’ luk kemengen mbarusu-o.
4An nanduk nusugwe bem Yerusalem-nen na, an nelem nap ennggendumu woralat-nen na woraso nebage-ge Yawuri nap pidsa enaru-o. 5It iri-ge obi-net neyagwi me, it-nen kunggururak ala-ge, nit-nen Mbal Pem Nagawan erembel wanogolat tena woragwi bem an-e yidnak yidnag-et kwarugwi Parisi nab-et woraso iri-ge it-nen kenggetleb-o. 6Nde, yawo-ge an nebem wene mbatli yu-ge, Mbal Pem Nagawan-nen nit nenlawingga tul paga yak indidnak wene na bem an nindi mbung mbung tak woraso ala-nen nebem wene mbatli-o. 7Nit nenlem duabelas ninndi-ge tul pidnak wene na bem mbung mbung tak woragolar-e, kubu-nen lengge-nen Mbal Pem Nagawan erembel wok tenak worali-o. Nagawan Ageripa wa-e. An nindi-ge wene iri bem mbung mbung tak woraso bem-e Yawuri nap-nen wene nebem pili-o. 8Nde, Mbal Pem Nagawan-nen wat yidnak nap unluk yaga wok ondoso iri-ge kir-e noluk-nen kinndi te rak pili-o?
9Nandug-e an-net an nindi-nen perasolar-e: ’Yesus Nasaret nap unu iri imin-e an-e mondok sirid mbarak woramin-o’ luk perasolat woragi-o. 10Yerusalem-nen iri kwarosolat woragi-o. Tepan omborak nagawan nagawan-nen ’Irit kwari-o’ luk yak niridnak pem-e, korak inpidnak nap kwarat o kubu me inpil nggosolat, it undurak wene mbarogola-ge, an-nen na ’Ob-et unduwag-a!’ luk perasolat woragi-o. 11Yawuri nap-nen tepan yugwi ma pidsa-nen-e an-nen pempa it ereba na andi bandi rak inpil nosolat, ’Kinndi angin tubu yidnak na keya ber-o’ luk yak ondosolat woragi-o. It enpem nisilepma kwarat purug-e, nin nap enma-t nde, langgal unpuruk mboroso-o.
Paulus indi nden kaidnak wene yak indid wene
26:12-18
12Iri kwarosolar-e, tepan omborak nagawan nagawan-nen ’Irit kwari-o’ luk iri kwarurak yabu an nebem pogola-ge, an-e Ndamsik wi mbirigi-o. 13Nagawan Ageripa wa-e. Ereya na-net mimo lenggesilmu-net mbal pem-nen yaya pil mbuwasola kagi-o. Nde, mo eyaya nggal-e lag-o. Eyaya mondok nggulok iri yemberak pil mbuwasolar-e, an min an totno mbirige nap inmin-e nenpem yaya rak pij-o. 14Nit pidsa-ge nggweyak pem yud mbud mbigerik worakmu, an-nen kuliginggal-e, Iberani wene bem ene mbi-nen yak norosolar-e: ’Saulus wa-e. Saulus wa-e. Kar-e noluk-nen an lel mberel nubusu-o? Wam na wangun anggat worak pem sorogola, andi karuk-nen ndag-et mboroso nggal, kat-nen na iri nggal korosola, kwenden pem worosolar-e, angin kebem mbusu-o’ luk yak nirij-o. 15Yak norosoloma-ge, an-nen yosolar-e: ’Nagawan Indo wa-e. Kar-e ta-nen yusu-o?’ luk kin wok obosolakmu-ge, Nagawan Indo-nen yosolar-e: ’An-e kat-nen lel mberel noboso nap Yesus-nen yusu-o. 16Alat nde, yawo-ge kar-e pugwak luk, men yi-o. Kat kerengen-nen neyaigen wene min abok-nen nam yaga mirik kibimin wene min-e ap kenggera yak ondonokluk, an ndegel noboso nap tak kebeyekluk-nen kimbiri bem nam yigi-o. 17Kat kelem nap ennggendumu-nen na irit, endam wirik kibimin nap enlem nin nap ennggendumu-nen na irit, kimiri yaga wok kirimin-o. 18It enlengen kuwarak pugunmu-ge, it-nen ndamuk arem-nen nden karuk, yaya ambigit nggwe lobok yogolat, Sere inggiyapma-nen Mbal Pem Nagawan ambigit nggwe lobok yogola-ge, it meya yidnak iri-ge an-nen namberam tak posola, an nebem inndi angin tubu yidnak pem korak inpidnak nap inmin lambuk makluk, endam wirik kibimin irir-o’ luk yak nirij-o.
Paulus-nen eyabu wanidnak wene yak indid wene
26:19-32
19Iri bem-e, Nagawan Ageripa wa-e. Aid arem-nen nabi nggwe nggal yak niridnak wene iri-ge an-nen kuruk wirigit lag-o. 20Are, nanduk tel korosolar-e, Ndamsik woragwi nap yak unduruk, Yerusalem woragwi nap min Yurea wi oboksa woragwi nap min it enlem nin nap min na yak ondosolar-e: ’Kir-e kondok luk, nden karuk Mbal Pem Nagawan eram lobok yogolar-e, kondok yidnak nap-nen kwarugwi ndak ndag-et kwarogolat wolmer-o’ luk yak indil nigi-o. 21Wene iri yak indil nigi bem, Mbal Pem Nagawan ama-nen Yawuri nap-nen tena nuburuk, nuruwokluk yiga-o. 22Alat nde, Mbal Pem Nagawan-nen yongga norosola me, yawo na an-e yu me mendak woralar-e, ap marik na irit, nggulok na irit oboksa kenggera yak undusu-o. Nde, an-nen kenggera yak ondoso wene iri-ge nin wene-ge lag-o. Are, Mbal Pem Nagawan ene lomboksa yugwi nap min Musa min-nen-e awo ma-net: ’Abog-e iri nggal-et kwaruwa-o’ luk yidnak wene-ge an-nen na iri na-t yusu-o. 23It-nen yogolar-e: ’Mesias-e mondok yane-t wuruwa-o. Nde, at iri-ge wat yidnak nap ennggendumu-nen nandug-et uruk yuwa-o. Nde, uruk lug-e, at-nen-e nit nenlem nap na irit, enlem nin nap na irit yaya wene yak unduwa-o’ luk irit yiga-o” luk Paulus-nen yij-o.
24Nde, Paulus-nen at ondomok elat mbarosolat wene yosoma, Pestus-nen ene paleksa yak tosolar-e: ”Paulus wa-e. Kar-e kindi wawa yusu-o. Kar-e kwarat karu yigen na-nen ndowaga kindi wawa yusu-o” luk yak tidj-o. 25Yak tosoloma-ge, Paulus-nen onggo yosolar-e: ”Kunu worak Pestus wa-e. An-e nindi wawa-nen yusu-ge lag-o. An-e ndemeret wene-ge nindi-net mengesa yusu-o. 26Iri kwaridnak pidsa-ge nagawan Ageripa na aru me, an-nen at nam-et nak yak turag-e te-nen yusu-o. Wene yu-ge kura ma-nen kwaridnag-e lak me, ar-e mondok pidsa arur-o luk perasu-o. 27Nagawan Ageripa wa-e. Mbal Pem Nagawan ene lomboksa yugwi nap-nen yidnak wene bem-e kar-e kindi angin tubu yusu, lak? Nde, it-nen yidnak wene bem kat kindi angin tubu yusu iri-ge an-e naru-o” luk yij-o. 28Yosoloma-ge, Ageripa-nen Paulus onggo yak tosolar-e: ”Kar-e ndag-et nak Kerisut nap tak nubugun kagi!” luk yak tij-o. 29Yak tosoloma-ge, Paulus-nen yosolar-e: ”Ndag-et nak ala na, woraruk ala na kat karig-er-e lak. Are, kat min na an nene yawo kulili nap pidsa min na an nggal-et yeleb-o luk Mbal Pem Nagawan anggarem yusu-o. Nde, kere kamat nibidnak yu nggal yurak perak nde lag-o” luk yij-o.
30Iri lug-e, nagawan na men yosola-ge, Gubernor na min Mberenike min it inmin koreyak woraiga nap na pidsa menluk, 31mbepme mbirigarig-e, it nak yak kerak mbogolar-e: ”Ap yu-ge meya kwarosoma-nen ondogolat, o kubu me inpil nggogolat kwarugwi ndak ndak meya-ge kwarigit lag-o” luk yiga-o. 32Nde, Ageripa-nen Pestus yak tosolar-e: ”Ap yu-nen-e: ’Kaisat-nen an nowene mbaruwa-o’ yigit lak yid nggal-e, weserak peleb-o” luk yak tij-o.
Currently Selected:
YIDNAK YIDNAK WENE 26: inondx
Highlight
Share
Compare
Copy
Want to have your highlights saved across all your devices? Sign up or sign in
@LAI 1992, 1994
