YIDNAK YIDNAK WENE 15
15
Wirik inpidnak nap Yerusalem-nen mbaridnak wene
15:1-21
1Alat nde, Yurea-nen ap erep-nen Antiokia mbuwaigarik, ennggamirak tak inpidnak nap na mul ondogolar-e: ”Kit-nen nde Musa-nen ’Kiniye ambasap waburag-o’ luk yidnak wene iri na kwarigit lak ala-ge, kinmiri yuwa bug-o” luk yiga-o. 2Alat nde, Paulus min Mbaranabas min na-nen ap ereba na inmin ngguno kwarat pogolat, wene mbal tenak woragola karug-e, it-nen Paulus min Mbaranabas min Antiokia woragwi nap erep min lenak unpuruk, yak ondogolar-e: ”Kir-e Yerusalem lagupndig-e, wene yu-ge wirik inpidnak nap min ogore yidnak nap min inmin konurag-o” luk yak indiga-o.
3Yikma, it na mborogola-ge, lambuk tak inpidnak nap-nen ndimirik inpikma-ge, Peniki wok Samaria wok mborogolar-e, enlem nin nap-nen kondok yidnak wene na ya yak indilik mborogola-ge, ennggamira tak inpidnak nap pidsa enalen kwarat yiga-o. 4Yerusalem wok yogola-ge, lambuk tak inpidnak nap min wirik inpidnak nap min ogore yidnak nap min ereba na-nen wa yak indiga-o. Wa yak ondogola-ge, it-nen-e Mbal Pem Nagawan-nen it inmin kwaridnak wene pidsa-t kenggera yak indiga-o. 5Alat nde, ap ereb-e Parisi nab-et nde, inndi angin tubu yidnak nap ereba na-nen ngoneksa yogolar-e: ”Enlem nin nap iri-ge mondok iniye ambasap mbatluk, Musa-nen imiri mbarak pidnak wene-nen yidnak yidnak nak mondok wat tenak wolmag-o” luk yiga-o.
6Iri ala-ge, wirik inpidnak nap min ogore yidnak nap min-e wene yu mbenaruwakluk ndok wiriga-o. 7Nde, wene yu na mbal tenak worarug-e, Peterus na men luk, it yak ondosolar-e: ”Nenggamirak wa-e. Nanduk-net kit kennggendumu-nen Mbal Pem Nagawan-nen an len nibid iri-ge an-nen enlem nin nap aid wene yak ondosola kuluruk, inndi angin tubu yuwakluk-nen len nibid iri-ge kenaru nar-o. 8Nde, ap enarem yenggerag-et kaso Mbal Pem Nagawan-nen at indi-n puruk it wok onposolar-e, Konak Indi-ge nit wok nindid na nggal-et it na wok indij-o. 9Mbal Pem Nagawan-nen-e it min nit min neneyasolar-e, arik tak nggal-e mondok lag-o. It inndi angin tubu yidnak pem-et it inndi mbek tak inpidj-o. 10Iri ala-ge, angin worak mende iri-ge nit nenlawingga-nen na, nit-nen na kud turag-e meya na-t nde, kir-e noluk-nen Mbal Pem Nagawan indi ngarogolar-e, angin worak mende iri-ge Yesus ene wanugwi nap enpem pugub-o? 11Alat nde, nit-nen yebet kagolar-e, Nagawan Indo Yesus-nen we wok ondoso bem-nen nit ninmiri yusu nggal, iri nggal it na inmiri yusu-o” luk yak indij-o.
12Yak ondosoloma-ge, ereba ndok wiridnak nap pidsa ene lak nak woragolar-e, Mbal Pem Nagawan-e Mbaranabas min Paulus min inmin woralat, enlem nin nap ennggendumu-nen kagwi buk mende min kwiye worak mende min kwaril niga na kenggera yak ondogola-ge, kolak woraiga-o. 13Wene na yogolikma-ge, Yakobus-nen yosolar-e: ”Nenggamirak wa-e. An yimin wene yu koler-o. 14Nanduk-net Mbal Pem Nagawan-nen enlem nin nap ennggendumu-nen ap ereb-e at amanggim len inpid wene-ge Simon-nen yak nindid irir-o. 15Nde, wene yu-ge Mbal Pem Nagawan ene lomboksa yugwi nap-nen yidnak wene mbarak worasu na ndak ndak-nen yusu-o. Wene iri-nen yosolar-e:
16’Iri rak puruk, an lobok yimindig-e, Ndaud uwi langguk yidnak na-ge tuguruk ondolma wirimin-o;
at uwi mijarak pidnak iri-ge ondolma worak puruk, nanduk iri na nggal-et ndop nok sa worak pimin-o.
17Nde, enlem nin nap oboksa-nen Nagawan Indo ogore yogolat, an narengge rak pidnak enlem nin nap min-et Nagawan Indo ogore yogolat makluk, o iri wirimin-o luk
18nanduk-net wene yu kwarosolat enaru rak pid nap Nagawan Indo-nen-e irit yij-o.’
19Iri bem-e, an nindi-nen perasolar-e, nden karuk Mbal Pem Nagawan eram lobok yili nelem nin nap iri-ge nit-nen angin tak unpurag-e meya-o. 20Alat nde, nunggwi mende kugi amanggim pidnak min mbabi yugwi min pip ndonggoksa wat yidnak ino min eyabi min mondok keya ber-o luk it enmanggim engga mbaruwog-o. 21Nanduk woraiga tarem-net Musa-nen imiri mbarak pidnak wene-ge o siri oboksa yak enderenak irit tit, yawo-nen na pempa we woragwi tarem-nen tepan yugwi ma ereba-nen wonarugwi-o” luk yij-o.
Enlem nin nap enmanggim mbaridnak engga
15:22-35
22Iri rak purug-e, it wirik inpidnak nap min ogore yidnak nap min-nen yogolar-e: ”Nit nennggendumu-nen ap erep len unpuruk, Paulus min Mbaranabas min mborogola inmin mburuwakluk lunuwog-o” yogolikma-ge, lambuk tak inpidnak nap pidsa-nen-e ”Ob-o” luk, ennggamirak tak inpidnak nap ennggendumu-nen unnu kek tak woragwi nap Yuras na unu misig-e Mbaranabas min Silas min na-ge lenak inpiga-o. 23Lenak unpurug-e, engga mbarak ininggim piga-o. Nde, engga iri bem-nen yogolar-e: ”Kit kennggamirak wirik inpidnak nap min ogore yidnak nap min-nen-e nennggamirak tak inpidnak enlem nin nap Antiokia min Siria min. Kilikia min woragwi nap kit pidsa ’Wiwa-o’ luk yak kindili-o. 24Nit-nen kologolar-e, nit nennggendumu-nen mbiridnak nap ereb-e nit-nen ’Wene iri yer-o’ luk yak indigit lag-et nde, it inndi-n pidnak pem nak yak kondogolar-e, nari wari rak konpogolat, kinndi mberen tak pili wene kulige-o. 25Iri bem-e, nit pidsa-nen ninndi misiget luk, nit-nen enabuwa kagwi nap Mbaranabas min Paulus min lobok yogola, inmin kendam lobok yurak nap erep len inpige-o. 26Nde, Mbaranabas min Paulus min ereya-ge nit Nenagawan Indo Yesus Kerisut amanggim inminep wesel kuridnak nab-o. 27Nde, nit-nen-e Yuras min Silas min inpil lobok yili-o. Engga yu arem mbarige wene iri-ge it enmendam nggwe-nen yak kunduwa-o. 28Konak Indi-nen na irit, nit-nen na irit peragolar-e, mondok kwarurak mende yu worala, nit-nen-e angin worak mende kenpem pul-o luk. 29Nde iri-ge, nunggwi mende kugi amanggim pidnak min eyabi min pip ndonggoksa wat yidnak ino min mbabi yugwi min ereya-ge mondok keya burag-o. Nde, ereya mende nde keya bugupndig-e, konag-et kwarugub-o. Irir-o. Naptak wiwa-o” luk engga mbariga-o.
30It na wirik inpikma, Antiokia na mbigarig-e, lambuk tak inpidnak nap oboksa ndok worak unpurug-e, engga mbarak na wok indiga-o. 31Engga na wonariganggal-e, it inndi yek tak purak wene ala-ge, enalen kwarat kaiga-o. 32Nde, Mbal Pem Nagawan ene lomboksa yugwi nap Yuras min Silas min-nen-e ennggamirak tak inpidnak nap na nggomo ondogolat, indi wi ya bogolar-e, kwarat woraiga-o. 33Iri lug-e, iri me worarug-e, ennggamirak tak inpidnak nap-nen it inpil lobok yiga nap endam wirik onpogolar-e, ”Kinndi yek tag-et mberer-o” luk wirik inpiga-o. 34(Alat nde, Silas-nen-e ”Yu me-t woramin-o” luk woragaij-o.)
35Nde, Paulus min Mbaranabas min na-ge kwarat tarem Antiokia woragolar-e, ap erep ereba na inmin-e Nagawan Indo-nen yidnak wene na mul ondogolat, wesera yak ondogolat woraiga-o.
Paulus min Mbaranabas min kuri wat yiga wene
15:36-41
36Nde, siyak worarug-e, Paulus-nen Mbaranabas yak tosolar-e: ”Nit nanduk Nagawan Indo-nen yidnak wene yak indige sa o siri oboksa-ge nennggamirak tak inpidnak nab-e ngge kwarak worali-o luk tuguruk iniyil mburuwog-o” luk yak tij-o. 37Yak tosoloma-ge, Mbaranabas-nen-e Yoanes unu misig-e Marakus na-ge it inmin mbururak peragaij-et nde, 38Paulus-nen yosolar-e: ”Nir-e nanduk Pampilia woragola, at iri-ge Mbal Pem Nagawan eyabu totno wanigit lak, keya nunpuruk mbirid iri-ge yawo-t ninmin mbururag-e lag-o” luk yij-o. 39Yosoloma, wene iri lit lit mberen nap na-nen ngguno kwarat nggurug-e, tu enarik tak mborogolar-e, Mbaranabas na-ge Marakus imin luk e koma arem Siperus mbiriga-o. 40Alat nde, Paulus-nen-e at imin mburuwakluk Silas lonosola-ge, ennggamirak tak inpidnak nap-nen-e: ”Nagawan Indo-nen we wok ondoso bem-et mberer-o” luk yak ondogolikma, mbiriga-o. 41Iri lug-e, Paulus na mborosolar-e, o Siria min Kilikia min waring kasolar-e, lambuk tak inpidnak nap na inndi lem ya bil waring kagaij-o.
Currently Selected:
YIDNAK YIDNAK WENE 15: inondx
Highlight
Share
Compare
Copy
Want to have your highlights saved across all your devices? Sign up or sign in
@LAI 1992, 1994
