ZAKHARIA 14

Yerusalem bo bangusa mita

1Singgai pohakiman i Tuhan in nodiugdon. Dá Yerusalem in pogagowanbí, bo onu in kinoagowan tatua silaionbí kon tayowonmu. 2Ki Tuhan in mosipunbí kon bayongan in bangusa sin monubu kon Yerusalem. Kotá tatua in agowonbí, bonu in baḷoinea in takowon, bo bobay mita in tokodomokon. Tongobotak kon intau inta nogutun kon tua in diaan kon poḷumbúan, táe kiagatnea in mogutunbí kon kotá tatua. 3Bo ki Tuhan in mayá bo moparang monayow kon bangusa mita tatua, ná inta pinomia-Nea dungkuḷmai. 4Kon singgai tatua Sia in simindogdon kon Tombuḷud in Zaitun, kon dotá in pomukaan nongkon Yerusalem. Dá Tombuḷud in Zaitun in kobotakan in ḷopá inta mobendar, pinangkoi kon pomukaan modapot in toyopan. Tongobotak in tombuḷud tatua in mopobayá ná utuan, bo tongobotak doman in mopobayá in toḷatan. 5Moiko in moḷaguibí mongin ḷopá inta nomotak kon tombuḷud tatua nobaḻí doyowa. #14:5: Kamungkinan moḷoben mangaḻenea: Moiko in moḷaguibí … doyowa. Moiko in moḷaguibí ná mogoguyangmu kon tungkuḷ in ḻinug kon dodai in ki Uzia datu in Yohuda. Bo namangoidon in ki Tuhan Allahku, sinakinan in bayongan in malaekat.

6Aka singgai tatua moiangoi, yo diá bidon in tompot motumping andeka eis.#14:6 Kamungkinan moḷoben mangaḻenea: motumping andeka eis. 7Kon singgai tatua diá bidon in mosindip. Singgai in umuran bidon mobayag, natuabí doman kon dodai in doḷom. Táe tongábí ki Tuhan in nonotaau mongo toonu in koangoian in singgai tatua.

8 # Yeh. 47:1; Yoh. 7:38; Why. 22:1 Kon singgai tatua, tubig modarit in moiḻig nongkon Yerusalem; tongobotak nongkon tubig tatua in moiḻig ná Laut Mati bo tongobotaknea doman in moiḻig ná Dagat Toyuak. Tubig tatua in moiḻig kinoouput in taong, pinomayá kon sempo in pongonguyan andeka sempo in poninggai. 9Dá ki Tuhan in momarenta saḷaku datu kon sinangkub in butá; pomuḷoi in intau in mosumbabí kon i-Nia saḷaku ki Allah bo monotaau kon i-Nia takin tangoi inta notongkai intua.

10Sinangkub in butá nongkon Geba kon utuan modapot in Rimon kon toḷatan, in mobaḻí butá motondodai. Táe Yerusalem in moisindogdon moḷantud totok, moḷantu-ḷantud nongkon butá mita inta kon diugneamai; kotá tatua in moibendar nongkon Bonawang in Benyamin modapot in Bonawang Sikunea, tuata in bonawang Dungkuḷ bo nongkon Ḷangkeang in Hananeel modapot kon pomomugutan kon anggur kapunyaan i datu. 11#Why. 22:3 Intau mita in mogutundon moodom kon kotá tatua, takin diá bidon in gogondok koyopúan.

12Ki Tuhan in mopoangoibí in panyaki inta mokokoningkim kon bayongan in bangusa inta ain noparang nonayow kon Yerusalem. Mata bo dilá monia, nodapot in bayongan in awak monia in mobongkogdon kobia-biagpabí mako.

13Kon singgai tatua baḻíonbí i Tuhan in bangusa mita tatua motoboḻingo totok bo angoian in ondok dá pomuḷoi in intau in modomokdon kon yobayatnea inta kon diugneamai bo momongkug. 14Intau mita ḷoḷaki kon Yohuda in moparangbí moduḷu kon Yerusalem. Mobaḻí pakakat inta agowon, dá mosia in mogamádon kon bayongan in kapunyaan in bangusa mita kon diugneamai ná buḷawan, saḷaka bo pakeang inta moguntu-guntuḷ.

15Panyaki doman tobatú inta totok in mokoondok in moitugat doman kon kabaḷo, bagal, unta bo keledai, bo bayongan in mahaḷuk kon ḷoḷaigan in musung.

16 # Im. 23:39-43 Onda intua bayongan in intau inta nobiagpa kon sigad in bangusa mita inta nonubu kon Yerusalem, in mayádon in kotá sin mosumba kon i Datu, ki Tuhan Inta Totok in mokawasa, bo morame kon singgai Moḷoben Ḷuḷung Daun. 17Aka oyúon in bangusa inta doí mayá in Yerusalem sin mosumba kon i Datu, ki Tuhan Inta Totok in mokawasa, dá kon butánea in diábí monguya-nguyan. 18Bo aka intau in Mesir doí morame kon Singgai moḷoben Ḷuḷung Daun, dá mosia in kotugatan doman in takit inta popoangoi i Tuhan kon bayongan in bangusa inta doí mayá moibada. 19Tuata in hukuman kon Mesir bo kon bayongan in bangusa inta doí morame kon Singgai moḷoben Ḷuḷung Daun.

20Kon singgai tatua lonceng mita kon ḷambung in kabaḷo in kurigondon in tosingogon mita “Sinondídon kon i Tuhan” Pansi mita kon Baḷoi i Tuhan in horomaton naonda bo palo mita in sosumba kon tayowon in mezbah. 21Bayongan in pansi kon Yerusalem bo kon bayongan in Yohuda in tondíondon mobaḻí kapunyaan i Tuhan Inta Totok in mokawasa. Intau mita inta moposumba in kuruban in momakébí intua porubusan kon ponoyá inta posumba. Aka wakutu tatua moiangoi, yo diá bidon in mopopotaḷui kon Baḷoi i Tuhan Inta Totok in mokawasa.

Currently Selected:

ZAKHARIA 14: INOMOG

Highlight

Copy

Compare