LUKAS 7
7
Ki Yesus nongundam kon bobantung in porwira in Rum
(Mat. 8:5-13)
1Nopaḷut mako in ki Yesus nosingog kon tayowon intau moantó tatua, Sia minayá in Kapernaum. 2Kon tua oyúon in tobatú porwira in Rum inta kobobantung. Bobantungnea tatua, totok in kinotabinea táe dodai intua notakit moyoyiga dongkadon oḷaton. 3Naonda in porwira tatua nokodongog kon bayongan inta inaidan i Yesus, sia nopotabá kon tongonumai itoi mita in Yahudi mayá kon i-Nia bo mopoigum sinbá ki Yesus mamangoipa mongundam kon bobantungnea tatua. 4Mosia in minayá kon i Yesus, bo naonda in noiyaput kon i Yesus, mosia nopoigum totok sinbá Sia in moibog mamangoi motuḷung kon porwira tatua. Mosia in noguman nanaa, “Porwira tatua patusbí tuḷungan i Amá, 5sin sia tua in motabibí kon bayongan intau naton bo sia doman tua inta nokiposindog in baḷoi pososambayangan nami.”
6Dá ki Yesus in minayá noyotakin monia. Táe naonda in nodiugdon in mosia kon baḷoi in porwira tatua, porwira tatua nopotabá bui kon yobayatnea mita sin moguman nanaa kon i Yesus, “Tuang donaaidon ki Tuang rumorigamai mamangoi in baḷoiku sin diábí patus in akuoi motarima kon i Tuang kon bonu in baḷoiku. 7Bo akuoi in diá doman patus mamangoi mokipodungkuḷ kon i Tuang. Táe poyaputdon in singog-Mu tongákabí totontagá dá mopiabí in bobantungku tatua. 8Sin akuoi naa in tobatú doman bawahan bo koḻimonagku oyúon doman in prajurit. Aka akuoi bo moguman kon prajurit tobatú, ‘Bayá!’ dá sia in mayábí doman; bo aka tobatú in kon inakó, ‘Igai!’ dá mamangoibí doman in sia, andeka akuoi in moguman kon bobantungku, ‘Aidai in naa!’ Aidanneabí doman intua.”
9Nokodongogmai kon koyow tatua, noherang totok in ki Yesus. Sia in nobobui kon intau mita inta dinumudui kon i-Nia bo poḷat nosingog, “Pirisaya námai naa in koḷoben diápa dodai onda in nouḻí-Ku kon sigad in intau Israel!”
10Naonda intau mita inta pinotabá in porwira tatua norobuidon kon baḷoi, kinobayáanmai monia nopiadon in bobantung in porwira tatua.
Ki Yesus nomiag bui kon tobatú tayowmobiag kon Nain
11Diá noonggot kon tua,#7:11: Diá noonggot kon tua: tongonumai in naska dungkuḷmai: Nopoikoḷomai kon singgai. ki Yesus minayá kon kotá in Nain. Dumodudui-Nea mita bo intau moantó minayá noyotakin-Nea. 12Naonda in mosia nodiugdon kon ngara in kotá tatua. Mosia noyodungkuḷ in intau mita inta nobuḻig kon minatoi sin poḷuai in kotá. Intau minatoi tatua in adí ḷoḷaki, adí tuḷong in intau inta boba-bobay. Nobarong intau in nongkon kotá tatua in dinumudui kon i iná in adí tatua. 13Naonda in ki Yesus nokoontong kon boba-bobay tatua noḻiai in ginanea sin tabi-Nea. Dá Sia in noguman nanaa, “Donaaidon mongombaḷ!” 14Bo Sia in dinimiug kon buḻigan tatua bo kinadaian-Nea. Dá intau mita inta nobuḻig in sinumogon bo Sia noguman, “Ei Uḻe. Akuoi in moguman kon inimu pobangondon!” 15Dá nobangondon in tayowmobiag tatua bo iḻimitú nongonguman. Onda intua pinopodiugdon bui i Yesus kon i inánea.
16Intau kon tua noondok komintan bo nodayow kon i Allah poḷat noguman, “Tobatú nabi inta moḷoben naadon kon yua-yuak naton! Bo ki Allah in namangoidon moposaḷamat kon umat-Nea!”
17Habar tatua noibaya-bayádon mako kon bayongan ḻipú kon Yudea bo kon diugneamai.
Ki Yesus bo ki Yohanes Mobobaptis
(Mat. 11:2-19)
18Dumodudui mita i Yohanes nongonguman kon i Yohanes kon bayongan inta ain nobaḻí tatua. Dá ki Yohanes in nogoiní kon dumoduduinea doyowa 19bodongka pinotabánea mayá moḻibó kon i Yesus, “Ki Tuangdon degá inta pinodandi mamangoi tua, andeka mogoḷatpa in kami kon intau ibanea?”
20Noiyaputmai kon i Yesus in taya dua, mosia noguman, “Ki Yohanes Mobobaptis nopotabá kon inami mamangoi bo moḻibó kon i Tuang, mongo ki Tuangdon degá inta pinodandi mamangoi, andeka mogoḷatpa degá in kami kon intau ibanea?”
21Kon wakutu intua ki Yesus nongundam kon noyagi-yagimai in takit bo roriga kon moantó intau bo noguntun doman kon dimukud mita moraat, bo nongundam kon intau mita bilog sahingga in mosia nokoontongdon. 22#Yes. 35:5-6, 61:1 Dá ki Yesus in noguman kon dumodudui i Yohanes tatua, “Bayádon bui kon i Yohanes bo oumandon onu inta ain inontong bo dinongog monimu: intau bilog mokoontong, intau ḻempeng mokobayá, inta pinanyaki kuḻit mokorongó#7:22: pinanyaki kuḻit mokorongó: Indoiai 5:12. mopia, intau bongoḷ mokodongog, intau matoi mobiag, intau bogá pinopoyaputan in Habar Mopia. 23Pia in kamang in intau inta diá kon dodai in onda in mogindoí kon i-Nakó.”
24Naonda intau mita inta pinotabá i Yohanes nobuidon minayá, ki Yesus in noginsilang kon intau mobarong kon tua mongo ki ine in ki Yohanes, kai-Nia, “Onu in bayáan monimu indoian kon padang gurun? Moindoi degá kon aog inta inirup in tompot pouik pountag? 25Moiko mayá mongonu? Moindoi degá kon intau inta nogiḷambung mogaga? Intau inta nogiḷambung mogaga bo inta nobiag nooyúon tampatnea in tuabí kon komaḻig! 26Dá aka natua yo onu in bayáan monimu indoian? Moindoi degá kon nabi? Totuu, sedang noiḻiubí kon tobatú nabi in sia. 27#Mal. 3:1 Sin sia tua inta ain pinais kon bonu in Buk Motusi,
‘Indoiaika, naadon in totabá-Ku,’
‘Sia in pinotabá-Ku inumuna kon ini-Mu,
sinbá sia in momontang kon daḷan bayáan-Mu!’ ”
28“Bá poguman-Kudon kon i monimu, ‘Kon sigad monia inta pinolahir in bobay diábí tobatúmai in noiḻiu kon i Yohanes. Táe inta totok in mointok kon sigad in umat i Allah, siabí tua in mokawa-kawasa nongkon i Yohanes Mobobaptis.’ ”
29 #
Mat. 21:32; Luk. 3:12 Komintan intau inta kon tua nokodongog kon onu inta siningog i Yesus tatua, intau doman inta mononagi kon pajak; mosia tua inta ain dinumudui kon onu in pinarenta i Allah bo inta ain binaptis i Yohanes. 30Táe intau mita in Parisi bo mototundú kon agama in doíbí notarima kon tomayá i Allah kon i monia. Mosia tua in doíbí binaptis i Yohanes.
31Ki Yesus in nosingog bui nanaa, “Onu degá in motaau-Ku popoumpamaan kon intau mita masai naa, ná onu degá in mosia tua? 32Mosia tua in naonda bo mongoadí mita inta iḻimitú kon pasar bo mosipomaḷúan nanaa, ‘Ain pinogirupan nami kon bansí in moiko, táe moiko doíbi motayok! Pinodondongan nami in dondong inta mokopongoibu, táe moiko doíbí doman mongombaḷ!’ 33Ki Yohanes Mobobaptis in namangoi – sia in diá nokaan kon roti bo diá doman nonginum kon anggur – táe kai monimu: ‘Sia tua kinotoḷangan in dimbuḷó!’ 34Noiduduimai kon tua, Adí Intau namangoi – Sia tua nongaan bo nonginum – táe siningog monimu: ‘Indoiaika, intau tatua! Totok in turá bo moḷoḷangu, bo yobayat in mononagi kon pajak bo in intau mita baradosa.’ 35Umpakabí natua, táe hikmat i Allah in ináku bidon in bayongan inta notarima kon tua.”
Ki Yesus kon baḷoi i Simon
36Tobatú intau in Parisi namangoi nogoiní kon i Yesus mongaan kon baḷoinea, dá ki Yesus in minayá iḻimitú bo nongaan doman kon baḷoinea. 37#Mat. 26:7; Mrk. 14:3; Yoh. 12:3 Kon ḻipú tatua oyúon in bobay inta ain kinotaauan totok in intau moantó kon sia tua binaradosadon totok. Naonda in kinotaauan in bobay tatua kon ki Yesus in yogot mongaan kon baḷoi intau in Parisi tatua, dá namangoi in sia kon baḷoi tatua takin kodia-dia in botoḷ inta mogaga totok inta kobonu-bonu in ḷana mobondu. 38Koomba-ombaḷ in sia namangoi sinimindog kon diug in sioḷ i Yesus, dá sioḷ i Yesus nobuntad in ḷuánea. Táe kon dodaipa doman tatua sioḷ i Yesus iningkagannea in buoknea tontaní, bodongka inayokannea in sioḷ i Yesus bo binutakkannea in ḷana nobondu inta kodia-dianea tatua. 39Naonda in inontong intau in Parisi inta nogoiní kon i Yesus nongaan, sia in nosingog kon bonu in ginanea, “Aka Sia naa bo totu-totuu nabi, yo tantú kotaauan-Neabí doman kon bobay tatua intaubí inta totok in binaradosa!”
40Dá ki Yesus in noguman nanaa kon intau in Parisi tatua, “Simon, oyúon in poguman-Ku kon inimu.” Dá kai Simon doman,
“Oo, pogumandon Pak Guru.”
41Dá kai Yesus doman, “Oyúon intau doyowa, taya dua tua in tumpaḷa koboḻi kon intau inta mopopoḷuan in doit. Intau tobatú koboḻi kon ḻima nogatut doit saḷaka. Inta tobatú in koboḻi kon ḻima nopuḷú in doit saḷaka. 42Popisí in taya dua tua diádon mokopobui kon doit tatua, dá pinopatandon in intau tatua in boḻi nayadua tua. Aka natua yo ḻibóon-Ku kon i monimu, ki ine in kon sigad nayadua tua in motabi-tabi kon intau inta nopoḷuan in doit tatua?”
43Dá kain tubag doman i Simon, “Tantú intau inta mobayong in boḻinea!”
Kai Yesus, “Totuu in tubagmu nion.” 44Onda intua ki Yesus nobobui kon bobay tatua bo noguman kon i Simon nanaa, “Inontongmu in bobay tanaa degá? Akuoi in moguman kon inimu: Akuoi namangoi in baḷoimu, táe diá inogoianmu in tubig pondaritan-Ku kon sioḷ, táe bobay tanaa ain nondarit kon sioḷ-Ku takin ḷuánea, onda intua iningkagannea bui in buoknea tontaní. 45Iko in diábí notomu nongayok kon i-Nakó, táe bobay tanaa in diábí mogoga-gogai in mongayok kon sioḷ-Ku pokoangoi-Kupa in naa. 46Diábí pinakéanmu in minya in uḷu-Ku, táe bobay tanaa aindon nopoḷana in ḷana nobondu kon sioḷ-Ku. 47Poguman-Kudon kon inimu, tabinea inta moḷoben tatua noponiata kon taḷánea inta noantó aindon inampungan! Intau inta tongá inampungan topiḻik in taḷánea, tabinea in tongá doman topiḻik.”
48Onda intua ki Yesus in noguman kon bobay tatua, “Taḷámu mita aindon inampungan.”
49Intau mita inta nongaan noyotakin-Nea, norai kon bonu in gina monia nanaa, “Degá ki inebí in intau tanaa sin motaaubí mongampung kon taḷá mita?”
50Ki Yesus in bui noguman kon bobay tatua, nanaa, “Pirisayamu ain nokosaḷamat kon inimu. Bayádon iko takin saḷamat!”
Currently Selected:
LUKAS 7: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.