YEREMIA 9
9
1Totuu mopia aka uḷuku bo naonda bo parigí inta nopuḻing in tubig,
bo mataku in pansurang inta umuran mopotampurang in tubig!
Dá akuoi in mokopongombaḷdon singgai bo doḷom,
mogamui kon intau mita tongobangusaku inta iḻimod in musung.
2Aka kuma bo kon padang gurun bo kouḻíanku
kon tampat pogogaian in intau inta kon binayáan!
Dá taḷaankubí in bangusaku, bo moḷagui mayá intua
sin yumayú kon i monia.
Mosia in momomaḻidaw komintan
pinosipunan in intau inta diá mosatia,
3bo umuran mosadia monguboḷ.
Kon sinangkub in butá, inta mobanar diádon nongawasa,
nodapot in aid diá mojujur noibaya-bayádon mako.
Ki Tuhan in noguman,
“Umat-Ku in nogaidon kon inta moraat diádon mogoga-gogai,
diádon ináku monia in Akuoi nobaḻí Allah monia.”
4Umpaka kon yobayat, yo kon batúan in intau musti mokopoingat
bo utat inoyod yo diá doman motaau pirisayaan.
Sin, ná ki Yakub yo natua doman in mosia,
kon batúannea monguboḷ kon i utatnea.
Batúan in intau maya-mayá mako
sin moponapud in diá totuu bo uboḷ.
5-6Mosia komintan mosi uboḷan,
diá in mosingog kon inta totuu.
Bibignea in nobiasadon monguboḷ
mosia in diá mokosanggup in monaḷámai kon dosanea.
Aid inta moraat kodugang-kodugang
aid uboḷ kodugang-kodugang doman
tua in umuran aidan monia,
mosia in totokbí in mondoí kon i Tuhan.
7Tuamai in ki Tuhan Inta Totok in mokawasa in noguman,
“Naonda bo logam, umat-Ku in tungkuḷan-Ku
sinbá mosia in mobaḻí momurni.
Onupa in motaau-Ku aidan
kon umat-Ku inta ain nogaid kon inta moraat?
8Singog mita totok in mokoanib,
mokopatoi naonda bo piot mobisa.
Tosingogon mita monia uboḷ komintan.
Singog mita monia mopia in kodongogan,
táe sabanarnea mosia in motaanbí kon poyogaḷap.
9Umpaka dá kon bangusa ná tanaa
yo diá popoḷabúan-Ku in hukuman inta patus?
Tuḻían-Kubí in aid monia,
Akuoi, ki Tuhan, ain nosingog!”
10Akuoi, ki Yeremia, noguman, “Akuoi in mongombaḷ bo mononogumatoi
sin rawang in bonok kon ḷopá bo kon buḷud mita
inta ain noingkag totok
bo diádon sinaḻiban in intau.
Singog in bobiagon diádon kodongogan,
manuk bo mahaḷuk mita ibanea noḷaguidon bo nobuḻi.”
11Ki Tuhan in noguman,
“Yerusalem in baḻíon-Ku apug
tampat pogogadopan in ungkú in kayuon.
Kotá mita in Yohuda in moingongowdon,
tampat inta diádon pinogutunan.”
12Akuoi in noḻibó, “Tuhan, nongonu sin butá tanaa in pinomayábí mako in noḷogat bo noingkag naonda bo padang gurun nodapot in diádon in tumaḻib? Oyúon degá in mopandoi totok sinbá momangaḻe kon naa komintan? Ki ine in pinoginsilangan-Mu sinbá sia in mokopoyaput kon intau ibanea?”
13Ki Tuhan in notubag, “Tua in nobaḻí popisí in umat-Ku in diádon noindoimai kon totundú mita inta inogoi-Ku kon i monia. Mosia in diá motoindudui kon i-Nakó, bo doí dumudui kon parenta-Ku. 14Mosia in pamandot bo mosumba kon berhala mita in Baal ná inta sinundú in mogoguyang monia. 15Tuamai, indongogaidon onu in aidan-Ku, Tuhan Inta Totok in mokawasa, Allah in Israel: umat-Ku in ogoian-Ku pinomuḷa mopait sin kaanon bo rasum sin inumon. 16Mosia in porariton-Ku kon sigad in bangusa mita inta diá kinotaauan monia andeka in mogoguyang monia. Akuoi in umuranbí mopotabá in tontara inta monubu kon i monia modapot in Akuoi momutú kon i monia komintan.”
Intau in Yerusalem nokuani mokituḷung
17Ki Tuhan Inta Totok in mokawasa noguman kon umat-Nea,
“Tondudutka onu inta koyogot in nobaḻí kon dunia naa,
bo ḷagidon oiní in intau mita mogogamui.
Potabádon in mosia mamangoi
bo mopodondong in dondong ponogumatoian.”
18Intau in Yohuda noguman,
“Ḷagidon pokidondongai in mosia
in dondong ponogumatoian kon inaton komintan,
sinbá motutug in ḷuá
momuntad kon putongi naton.”
19Kon Sion kinodongogan in ombaḷ,
“Moputú in kita bo totok in pinokopo oyámai.
Butá naton musti taḷaan naton,
baḷoi mita naton norimumud posirarit.”
20Akuoi in noguman, “Indongogaipa in tosingogon mita i Tuhan,
ei bayongan in bobay!
Tundú kon i adímu mita bobay in dondong oamui,
kon yobayatmu mita in dondong ponogumatoian.
21Popatoi in sinumuotdon nongin jandela,
sinumuotdon kon bonu in komaḻig;
sia in nodomok kon mongoadí mita kon daḷan
bo tayow mobiag kon rawang.
22Mayat in noiukatdon magí-mako
naonda bo apat kon tudu in butá;
naonda bo gandum inta ain iratab bodongka sinaḷáan
bo diádon sinipun bui.
Tuata in koyow i Tuhan
inta musti potaauku.”
23Ki Tuhan in noguman,
“Intau mobijaksana in diábí motaau in moyunggagá popisí in kobobijaksananea,
intau moropot popisí in ropotnea,
bo intau nooyúon popisí in kaoyúonannea.
24 #
Kor.1. 1:31; Kor.2. 10:17 Ki ine in moibog mopoyunggaga in onuka,
yo mustibí moyunggagá sin sia in nonotaaudon bo nomangaḻedon kon i-Nakó;
bo kinotaauanneadon kon tabi-Ku modapot in mononoi
bo Akuoi in moposindogbí in hukum bo inta moadil kon dunia.
Tua komintan in mokosanangbí kon gina-Ku.
Akuoi, ki Tuhan, inta ain noguman kon tua.”
25-26Ki Tuhan in noguman, “Moiangoibí in wakutunea Akuoi mohukum kon intau in Mesir, Yohuda, Edom, Amon, Moab, bo intau inta nogutun kon padang gurun inta nonggonsing in buoknea kinopoḷok. #9:25-26: nonggonsing in buoknea kinopoḷok: intau inta nogutun kon padang gurun biasamai nonggonsing kon buoknea kopoḷokon sin mohoromat kon dewa monia; tobatú kabiasaan inta diá motaau dayanan in intau in Israel. Mosia komintan in sinoit ná intau in Israel, táe pinomayá mosia andeka bangusa in Israel in nomia naonda bo intau mita inta diá sinoit, popisí in mosia diá motoindudui kon dodandian inta sinomponuotan in toit tua.”
Currently Selected:
YEREMIA 9: INOMOG
Highlight
Copy
Compare
Share
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
