YEREMIA 41
41
1 #
Dat.2. 25:25
Kon buḷan noginpitu kon taong tatua ki Ismael ki adí i Netanya ki ompu i Elisama minayá noyotakin in intau taya mopuḷú minayá in Mizpa sin moyodungkuḷ i Gedalya. (Ki Ismael naa in tobatú buí in datu, porwira moḷantud tobatú in dodatuan.) Koyogot in mosia nongaan noyotakin, 2ki Ismael takin intaunea taya mopuḷú tua in norabut kon kedang monia bo noḻimod kon i Gedalya, gubernur inta dinuí in intau in Babel tatua. 3Ki Ismael in noḻimod doman kon bayongan in intau in Yohuda inta noyotakin i Gedalya kon Mizpa, bo bayongan in tontara in Babel inta noitongkaná kon tua.
4Kon singgai noiduduimai, kon dodai in diápa kinotaauan in intau in pinoḻimodan kon i Gedalya, 5namangoidon in intau waḷu nopuḷú nongkon Sikhem, Silo bo Samaria. Mosia in nongarugdon kon tampeng, nomerak kon ḷambung, bo nonongkekeb kon awak monia. Mosia in nodia kon gandum bo kamania sin posumba kon Baḷoi i Tuhan. 6Dá iḷumuaidon in ki Ismael nongkon Mizpa bo minayá nokipodungkuḷ kon i monia. Sindaḷan nongombaḷ, sia in noguman, “Igai mayá moindoi kon i Gedalya.” 7-8Naonda in mosia nodapot kon yuak in kotá, ki Ismael takin intaunea mita nomangkoidon noḻimod kon i monia. Táe mopuḷú in intau nongkon sigad monia tua in noguman kon i Ismael, “Dika ḻimodon in kami! Kon inami in oyúonpa in doyowa norupa in gandum, ḷana doman in zaitun bo biluk. Tua komintan binuni nami kon ḷuai in kotá.” Tuamai in diá iḻimod i Ismael in mosia, táe ibanea in iḻimodnea bo mayat monia in pinogonag kon bonu in parigí. 9Parigí tatua in parigí moḷoben inta pinomia i Datu Asa kon tungkuḷ in sia sinubu i Baesa datu in Israel.
10Onda intua ki Ismael in nodomok kon adí mita bobay i datu bo bayongan in intau mita inta oyúonpa kon Mizpa inta ain inogoi i Nebuzaradan kon bonu in kawasa i Gedalya. Dinakop i Ismael in mosia bodongka nobuat minayá takin i monia nopobayá ná butá in Amon.
11Ki Yohanan ki adí i Kareah bo bayongan in porwira inta noyotakinnea nokodongogdon kon aid moraat i Ismael. 12Dá mosia takin intau monia minayá nomatuk kon inia, bo kinotambakan monia in sia kon tabang moḷoben Gibeon. 13Nokoontongmai kon i Yohanan takin porwira mita tatua namangoi, intau mita inta dinakop i Ismael nongopia in gina, 14bo nomurow bo noḷagui minayá kon kapunan i Yohanan. 15Táe ki Ismael bo intaunea taya waḷu in nokoḷagui, bo noḷagui minayá in butá in Amon.
16Onda intua ki Yohanan bo porwiranea mita nosipun kon tontara mita, bobay, adí mita, bo pogawai mita in komaḻig inta dinakop i Ismael naonda in noḻimod mako kon i Gedalya. 17-18Mosia in noondokdon komintan kon intau in Babel, popisí in ki Ismael ain noḻimod kon i Gedalya inta dinuí i datu in Babel nobaḻí gubernur kon butá tatua. Dá, noḷagui in mosia minayá in Mesir. Kon yuak in daḷan, nogogai in mosia kon Kimham kon diug in Betlehem.
Currently Selected:
YEREMIA 41: INOMOG
Highlight
Copy
Compare
Share
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
