YEREMIA 4
4
Oiní sinbá tumobat
1Ki Tuhan in noguman, “Umat in Israel, aka moiko moibog mobui mangoi, yo pobuidon mangoi kon i-Nakó. Ḷumbúdon muna in berhala mita inta kinorongó-Ku tua, bo pokotoinduduidon kon i-Nakó. 2Aka moiko in mongibot podoyon kon tangoi-Ku bo moiko in mobiag mojujur moadil bo mobanar, dá bayongan in bangusa in mopoigumbí kon i-Nakó sinbá barakatan-Ku in mosia, bo mosia in modayow kon i-Nakó.”
3 #
Hos. 10:12
Ki Tuhan in noguman kon intau mita inta nogutun kon Yohuda bo kon Yerusalem, “Tonggobádon in butámu inta diápa sinonggobá; dika moponimboi in bibit kon yuak in dugi. 4Kadaiai in dandimu kon i-Nakó, Tuhanmu, bo awakmu in tongádon ogoi kon i-Nakó, ei intau mita in Yohuda bo Yerusalem. Aka diá, yo torú-Ku in tumagabdon bo momokak naonda bo tuḷú inta diábí kopiongan i inekabí. Tua komintan in moiumabí kon inimu popisí in aidmu mita inta moraat.”
Yohuda inindoyó tubuon
5Irupdon in torompet kon sinangkub in butá!
Pomaḷúdon kosilang bo koḷangon.
Potabádon in intau in Yohuda bo Yerusalem
moḷagui mayá in kotá mita inta dininding.
6Tundúdon in daḷan mayá in Sion, Buḷud i Tuhan,
ḷagidon poḷagui dika tongá kibio-biómai.
Ki Tuhan in koyogotdon in mopoangoi in bodito
bo korimumudan moḷoben nongkon utuan.
7Ná singa inta iḻumuai nongkon pinogadopannea
natua doman nobuatdon in momomutú kon bangusa mita
inta namangoi sin momutú kon Yohuda.
Kotá mita in Yohuda in mobaḻídon dongka rumbunnea
tampat inta diá inutunan in intau.
8Tuamai, pongombaḷ bo pogamuidon,
pakédon in daing karong nobaḻí tomponuot in pinonogumatoian.
Sin torú i Tuhan inta tumaga-tagab
diápa doman nopiong nongkon Yohuda.
9Ki Tuhan in noguman, “Kon singgai tatua datu mita bo intau mita moḷoben in kobuḻiandon in ibog; imang mita in moondok bo nabi mita in moitaḻikokog.”
10Bo akuoi in noguman, “Tuhan Inta Totok in moḷantud, Iko in nonguboḷdon kon intau in Yohuda bo intau in Yerusalem! Iko in noguman kon moiangoi in dodamean, bokaka tanaa in kobiagan nami in inindoyódon in pitow.”
11Wakutunea in moiangoibí intau in Yohuda bo intau in Yerusalem mokouḻí kon habar kon tompot mopatú nongkon padang gurun koyogotdon in mogirup mamagí kon i monia. Tompot tatua in deemanbí tompot biasamai inta tongá mopoḷayug in baḻeká, 12táe tompotbí moropot inta namangoi pinodoyon kon parenta i Tuhan tontaní sin mopoḷabú in hukuman kon umat-Nea.
Yohuda iḻipung in musung
13Indoiai, musung in moitukat ná goḷom. Kereta mita in parangnea in naonda bo deḷang, kabaḷonea mita in moḻika-ḻikat nongkon ḷagapan boniá. Ado, mobodito in kita! Moputú in kita!
14Yerusalem, ḷumbúdon in inta moraat nongkon ginamu sinbá posaḷamaton in iko. Modapot in toonu in raian mita moraat tatua in tagúonmu kon bonu in ginamu?
15Nongkon kotá in Dan, bo nongkon buḷud in Epraim noiangoidon in totabá mita inta nodia kon habar diá mopia. 16Mosia in nopotoingat kon bangusa mita bo nopotaau kon intau in Yerusalem kon musung#4:16: musung andeka: intau noḻipung. niondon taya-taya mangoi nongkon butá inta moyayú. Mosia in mopobaḷúbí in baḷú in parang kon kotá mita in Yohuda 17bo moḻipung kon Yerusalem ná intau inta moḷukad kon gobá. Tua komintan in nobaḻí popisí in bangusa in Yohuda ain nomarontak kon i Tuhan. Ki Tuhan ain nosingog.
18Yohuda, ikobí tontaní inta nopoangoi in bodito tatua kon inimu. Kobobiagmu bo oaidmu mita in nokopopisí kon bayongan in roriga tatua tumurak kon ginamu.
Norobonoḷ in gina i Yeremia in norai kon umat i Allah
19Totuu morobonoḷ in dodobku,
diádon mokoigon in akuoi in mobaba kon roriga.
Diá mokotongod in akuoi in mopoonow in gina
putúku in modoḷodok kon bonu in dodob,
sin dinongogku in torompet in nosingog,
bo kokow in parang kodongogandon mogintubagan.
20Bodito in mamangoi diá moobo-obot
morimumud kon sinangkub in butá.
Daḻídon in ḷoḷaiganku pinoguyaat,
daingnea mita in binisi-bisí.
21Modapot in toonu intua in ontongonku
intau simimpatoi in moparang?
Modapot in toonu in dongogonku
singog in torompet inta mokobongoḷ?
22Ki Tuhan in noguman, “Mobodok totok in umat-Ku tatua,
mosia in diábí nonotaau kon i-Nakó.
Mosia in naonda bo mongoadí mita inta pamandot
diábí in topiḻikmai in pomomangaḻe;
mopandoi in mogaid kon inta moraat,
diá mokoaid kon inta mopia.”
Oontongon kon koangoian in bodito
23Mataku in ḷumongow monag kon butá,
diá in koontongan bo noingkag,
ḷumangag in akuoi kon ḷangit,
uḻe, diábí in monindar.
24Inontongku in buḷud bo tombuḷud mita inta moḷantud
modandú motoyang totok.
25Inontongku diábí in intau,
ḷagapanpa in nodaitdon iḷumayug.
26Butá moḷumbá in nobaḻídon rawang noingkag,
kotá mita in norimumud nobaḻídon rumbunnea,
popisí in ki Tuhan in sinumorúdon totok
kon umat-Nea.
(27Ki Tuhan in noguman kon sinangkub in dunia in mobaḻí padang gurun, táe Sia in diábí momutú kon tua komintan.)
28Butá in mononogumatoi,
ḷangit in simindipdon.
Ki Tuhan in nosingogdon
bo diá bidon momaḷui kon tomayá-Nea.
Sia in nonantúdon kon singog
bo diábí umundok tongákabí toḷoḷampang.
29Kinodongogan in dowawá in tontara inta sinumakoi kon kabaḷo bo momomiot,
nokopopisí kon bayongan in intau noḷagui mopogoa-goa.
Kayuon mita sinuotan monia,
buḷud batu sinakod monia.
Bayongan in kotá noingongowdon,
diádon in moibog mogutun kon tua.
30Ei Yerusalem, iko in sinaḷáandon bo diádon mokopongonu!
Onubí in mangaḻenea in mogiḷambung in ḷambung nopura
bo moḷambá kon awak mopomaké in buḷawan bo saḷaka,
poḷat moponggares in cilá kon mata?
Diábí in mangaḻenea in iko in mopogaga in pogotmu,
sin intau mita inta kinotabimu in doí bidon kon inimu,
nodapotbí in mosia in moibogbí morabut kon nyawamu.
31Akuoi in nokodongog kon ombaḷ mopoina-inak
naonda bo bobay inta mononggadí;
naonda bo bobay moguod inta monononggadí ḻinggané,
natua in ombaḷ in Yerusalem inta mosisí in pogoginanea.
Ḻimanea in mongokap bo mogamui in sia,
“Moboditodon in akuoi – akuoi in ḻimodon in musung!”
Currently Selected:
YEREMIA 4: INOMOG
Highlight
Copy
Compare
Share
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
