YEREMIA 25

Musung nongkon utuan

1 # Dat.2. 24:1; Taw.2. 36:5-7; Dan. 1:1-2 Kon taong inggopatnea naonda in ki Yoyakin adí ḷoḷaki i Yosia nobaḻí datu in Yohuda, akuoi in nokouḻí kon koyow nongkon i Tuhan soaḷ bayongan in bangusa in Yohuda. Wakutu intua taong imitánea naonda in ki Nebukadnezar nobaḻí datu in Babel. 2Akuoi in noguman kon bayongan in bangusa in Yohuda bo intau inta nogutun kon Yerusalem, 3“Kon bonu in doyowa nopuḷú bo toḷu notaong, pinangkoi kon taong impuḷú bo toḷúnea kon pinomarentaan i Yosia adí ḷoḷaki i Amon kon Yohuda, nodapot in singgai naa ki Tuhan in noguman kon inakó bo diábí kon dodai in onda in diá pinogumanku kon inimu onu inta ain pinoguman-Nea. Táe moiko in diá nopandungmai. 4Ki Tuhan in umuran doman mopotabá mangoi kon inimu in nabi mita mogogundoi-Nea, táe moiko in doíbí mokidongog bo monaridi kon i monia. 5Mosia in nopotabá kon i monimu monaḷámai kon gogutúmu inta moraat, bo oaidmu mita inta dinosa, sinbá moiko in umuran mogutun kon butá inta ain inogoi i Tuhan kon inimu bo kon mogoguyangmu mobaḻí kapunyaan monimu tontaní. 6Nabi mita tatua nogimaḷow kon i monimu in mosumba bo moibada kon ilah mita ibanea. Mosia in nogimaḷow kon i monimu in mosumba kon berhala mita inta pinomia monimu tontaní, sin tua in nokopopisí kon i Tuhan tumorú. Aka moiko dinumudui kon parenta i Tuhan tua, diábí in Sia nohukum kon i monimu. 7Táe ki Tuhan tontaní in noguman kon moiko in diábí nokidongog kon i-Nia. Sedang bo moiko in nokopomukábí kon torú-Nea popisí in berhalamu mita tatua. Moikobí tontaní in nopoangoi in hukuman-Nea kon inimu tontaní.

8Popisí in moiko doí mokidongog kon tosingogon-Nea mita, dá ki Tuhan Inta Totok in mokawasa in noguman, 9‘Akuoi in mogoiníbí kon bayongan in bangusa nongkon utuan, bo mogogundoi-Ku doman, ki Nebukadnezar datu in Babel. Mosia in potabá-Ku moparang monayow kon Yohuda bo intau inta nogutun kon bonunea takin bayongan in bangusa kon diugneamai. Bangusa in Yohuda takin bangusa mita topodiugneamai in yopúon-Ku bo bióon-Ku mako in morimumud modapot in mononoi. Intau mita inta mokoontong kon inia in moitaḻikokogbí bo mokoningkim. Akuoi, ki Tuhan, ain nosingog. 10#Yer. 7:34, 16:9; Why. 18:22-23 Singog mita monia inta mongoḷunganga bo rame in ponikaan in pogogaion-Kubí. Mosia in diá bidon mokouḻí kon ḷana ponontogáan monia, bo gandum monia in modaitbí. 11#Taw.2. 36:21; Yer. 29:10; Dan. 9:2 Sinangkub in butá tanaa in pomayá-Kubí mako in morimumud bo mobaḻí moingongow. Bangusa mita kon diugneamai in mobantungbí kon i datu in Babel pitu nopuḷú notaong in koonggotnea. 12Mopaḷut mako kon tua Akuoi in mohukum kon bangusa in Babel bo datunea popisí in dosa monia. Butá in Babel in rumbunon-Ku bo bióon-Ku mako in morimumud modapot in mononoi. 13Babel in hukumon-Ku in bayongan in bodito inta ain sinomayá-Ku kon bangusa mita bo inta ain pinotaau-Ku pinongin i Yeremia – tuata in bayongan in bodito inta pinais kon bonu in buk tanaa. 14Aid mita in intau in Babel in tuḻían-Kubí; mosia in tonggataanbí in datu mita moḷoben bo in bangusa mobayong.’ ”

Hukuman i Allah kon bangusa mita

15Ki Tuhan, Allah in Israel, noguman kon inakó, “Gamádon in galas in anggur tanaa inta ain binonuan-Ku in anggur in torú-Ku. Diadon kon bayongan in bangusa kon onda in popotabáan-Ku kon inimu, bo pokiponginumaidon in mosia in anggur tanaa. 16Aka inumon monia, yo mosia in moḷoḷangudon bo diádon motoratakmai popisí in parang inta popoangoi-Ku kon i monia.”

17Dá inabatanku in galas in anggur tatua nongkon ḻima i Tuhan, bo minayá kon bayongan in bangusa inta pinopotabáan i Tuhan kon inakó, bo pinoki inumanku in mosia in anggur tatua. 18Yerusalem bo bayongan in kotá in Yohuda, takin datu mita bo pojabatnea mita, pinoki inumanku in anggur tatua, nodapot in mosia nobaḻí naonda bo rawang inta noḷogat bo mokokoningkim. Dapot kon singgai in naa tangoi monia in pinaké nobaḻí kutukan.

19-26Naa in tangoi mita in intau ibanea inta musti monginum nongkon galas in anggur i Tuhan tua:

datu in Mesir takin pogawai bo pojabatnea mita;

bayongan in intau in Mesir bo intau ango-angoi kon Mesir;

bayongan datu kon butá in Us;

bayongan datu in kotá mita in Pilistin kon Askelon, Gaza, Ekron;

bayongan in intau inta nobiagpa kon Asdod,

bayongan intau in Edom, Moab bo Amon;

bayongan in datu kon Tirus bo Sidon;

bayongan in datu kon bingkí in Dagat Toyuak;

kotá mita in Dedan, Tema, bo Bus;

bayongan in intau inta nokigonsing kinopoḷok in buoknea;

bayongan in datu in Arab;

bayongan in datu in suku mita noyobauk inta nogutun kon padang gurun;

bayongan in datu kon Zimri, Elam, bo Madai;

bayongan in datu kon utuan, noyayú bo nodiug, kon batúannea.

Bayongan in bangusa kon sinangkub in dunia musti monginum kon anggur tatua. Bo intau pangabisan inta musti monginum kon anggur tatua in ki datu in Babel.

27Bo ki Tuhan in noguman kon inakó, “Pogumandon kon intau mita tatua kon Akuoi, ki Tuhan Inta Totok in mokawasa, Allah in Israel, nopotabá kon i monia nonginum nodapot in noḷoḷangu bo nototuka. Binaḻí-Ku in mosia noḷabú bo diádon mokobangon bui popisí in parang inta popoangoi-Ku kon i monia. 28Bo aka mosia in doí mogamá kon galas tatua nongkon ḻimamu sin monginum, pogumandon kon ki Tuhan Inta Totok in mokawasa ain nomarenta kon tua. 29Akuoi in momangkoidon kon porimumudan tatua nongkon kotá-Ku tontaní. Dika modapot in mosia in moguman kon mosia in diábí hukumon. Mosia in notantú bidon kon hukumon sin Akuoi in mopoangoibí in parang kon bayongan in bangusa kon sinangkub in dunia. Akuoi, ki Tuhan Inta Totok in mokawasa, ain nosingog.

30Bayongan inta ain pinoguman-Ku kon inimu, ei Yeremia, mustibí potaaumu. Pogumandon kon i monia,

‘Singog i Tuhan in noguman noḷangon nongkon soroga;

nongkon pinogutunan-Nea inta motusi Sia in nonggotup noḷawang kon umat-Nea.

Bayongan in intau kon dunia in nokodongog kon kokow-Nea

naonda bo mogogaid inta nomugut kon anggur kon pomomugutan.

31Modapot kon popod in butá singog-Nea in kodongogan;

ki Tuhan in momia kon pelekara kon bangusa mita.

Bayongan in intau in sisiganbí

bo inta moraat in hukumonbí matoi.’ ”

32Ki Tuhan Inta Totok in mokawasa in noguman,

“Nongkon popod mita in dunia deḷang in mogonugur;

bodito in moidantug kon batúan in bangusa mita.”

33Kon singgai tatua mayat in intau mita inta pinatoi i Tuhan in moibilabagdon magí mako kon sinangkub in butá. Mosia in diá bidon ombaḷan, diábí doman buaton sin ḷobongon, táe pomayá bidon mako kon butá naonda bo kinosipunan in apat.

34Ei itoi mita, ei gombala mita in umat i Tuhan! Pongombaḷdon koropot! Ponangkuḻitodon kon ḷobud, sin noiangoidon in wakutunea ḻimodon in moiko, bo inta mokoḷagui in porariton. Moiko in nádon kuyon koboḻi inta noḷabú bo noḷosi.#25:34: Moiko … noḷosi: Podudui in terjemahan dungkuḷmai: Moiko in moumpagbí ná domba koḷakian inta piniḻí inta iratá. 35Moiko in notantú bidon kon diá mokoḷagui. 36-37Moiko in mogamui bo mongombaḷ takin morobonoḷ in gina sin ki Tuhan takin torú-Nea ain noyopú kon bangusamu poḷat norimumud kon butámu inta noaman tatua. 38Naonda bo singa iḻumuai nongkon bubúnea, natuata in ki Tuhan iḻumuai sin mohukum kon umat-Nea. Koḻingáan in parang bo torú i Tuhan in nomaḷuidon kon butá tanaa nobaḻí padang gurun.

Currently Selected:

YEREMIA 25: INOMOG

Highlight

Copy

Compare