YEREMIA 14
14
Poninggai inta noonggot
1Ki Tuhan in nopotaau kon inakó kon pononinggai inta moonggot,
2“Yohuda monakit in gina
kotánea mita gogiódon bo matoi.
Intaunea mita umuḻidon mako kon butá bo mogamui.
Yerusalem momaḷú mokituḷung.
3Bobantung mita in intau nooyúon pinoki tayakan magí mako in tubig;
mosia in minayá noindoi kon bayongan in parigí
táe tubig in nodaitdon komintan.
Diádon in bonu in kendi
inta dinia bui mangoi monia.
Takin ḻia-ḻiaw in gina bo kinobuḻian in kamang
nooyá in mosia bo nomompon kon pogot.
4Uyan diá moḷabú bo butá in moingkag mopobota-botak;
monononggobá mogoḻingoi kon pogot sin mogagawangdon totok.
5Bonok in nodaitdon,
tuamai ki inde in rusa minayá.
Ki adínea inta bagupa pinononggadínea sinaḷáannea
kon rawang kayuon.
6Kon tudu in buḷud keledai ḻindong tongádon simindog mako,
matanea mokayow popisí in diádon in bonok;
mopoginang-ginang in sia naonda bo serigala.
7Umat-Ku nokuani, ‘Tuhan, umpaka dosa nami mopotaḷá kon i nami
tongá tuḷungaipa in kami podudui in dandi-Mu
Iko in nopobui-buimaidon in sinaḷáan nami;
totuu, kami in binaradosa kon ini-Mu.
8Tongábi Iko tontaní in nobaḻí kamang Israel,
inta noposaḷamat kon inami nongkon anib.
Táe nongonu sin Iko in naondabí bo intau ango-angoi kon butá nami,
naonda bo mobobayá inta tongá nongandup togobii bo minayá bui?
9Nongonu sin Iko in naondabí bo intau inta notoboḻingo;
naonda bo pahlawan inta diá mokotuḷung?
Táe notantúbí kon Iko in naa kon yua-yuak nami, Tuhan!
Kami in umat-Mu, dikabí taḷaan-Mu in kami!’ ”
10Aka kon bangusa tatua ki Tuhan in noguman, “Diá mopia in gina-Ku kon intau mita tatua inta moibog moḷagui kon i-Nakó, bo doí monahang kon gina. Diábí koḻiongan-Ku in taḷá monia, hukumon-Kubí in mosia popisí in dosa monia.”
11Ki Tuhan in noguman kon inakó, “Dika mopoigum sinbá Akuoi in motuḷung kon intau mita tatua. 12Umpakabí in mosia mopuasa, doíbí in Akuoi moindoimai kon kuani monia mokituḷung; bo umpakabí in mosia moposumba kon i-Nakó in kuruban payongon bo kuruban gandum, yo diábí mosanang in gina-Ku kon i monia. Noyotoḻikudon kon tua, yopúon-Kubí in mosia in parang, in gogoy, bo in yampoi.”
13Bo akuoi in noguman, “O Tuhan Inta Totok in moḷantud, kinotaauan-Mu kon nabi mita ain noguman kon rayat kon diábí in parang andeka gogoy, sin Iko in nodandidon kon butá tanaa in umuranbí oyúon in dodamean.”
14Táe ki Tuhan in notubag, “Nabi mita tatua in nopotaau in habar uboḷ pinodoyon kon tangoi-Ku; Akuoi in diábí nopotabá kon i monia, bo diábí doman nomarenta andeka noyosingog monia. Oontongon mita inta inouman monia in deemanbí nongkon i-Nakó; mosia in nonoḻindap kon soaḷ mita inta diá in mangaḻenea inta sinontuon inaidan monia tontaní. 15Mosia in nopotaau kon pinodoyon kon tangoi-Ku butá tanaa in diábí koantugan in parang andeka gogoy, bokaka Akuoi in diábí nopotabá kon i monia noguman kon tua. Akuoi, ki Tuhan, in nopotaau kon inimu, Yeremia, onu in aidan-Ku kon nabi mita inta diá pinotabá-Ku tua. Ḻimodon-Ku in mosia pongin parang bo gogoy. 16Intau mita inta ain notarima kon toḻindap mita monia tua in ḻimodonbí doman natua. Mayat mita monia in pogambat kon daḷan mita kon Yerusalem bo diábí in moḷobong. Natuata in ukur monia takin adí bo buḷoi monia. Baḻíon-Kubí in mosia mokonanam kon bungai in aid moraat monia.”
17Ki Tuhan in nopotabá kon inakó nopotaau in robonoḷ in ginaku kon umat-Nea. Akuoi in mustibí moguman nanaa,
“Biódon mako in akuoi mongombaḷ diá in gogainea,
singgai doḷom tumomponggoḷuáanmai.
Sin bangusaku in kinekeban modaḷom
bo totokdon in mororiga.
18Aka akuoi mayá in rawang,
ontongonku in mayat mita inta minatoi in parang.
Kon bonu in kotá ontongonku in roriga,
intau mita gogiódon matoi in gogoy.
Nabi bo imang mopobayá in oaidan
takin diá komangaḻean monia onu in inaidan.”#14:18: Nabi … inaidan andeka: Nabi bo imang dinia minayá in butá inta deeman butá monia.
Umat in Israel nopoigum in totabi Tuhan
19 Tuhan, degá Yohuda in kinodoí-Mudon totok
bo intau in Sion kinorongó-Mu?
Nongonu sin totokdon in noropot in pinososambok-Mu kon inami
nodapot in diádon mopia bui in kami?
Diá bidon in mangaḻenea kami in motayak kon dodamean,
diádon baragunanea kami in mogoḷat mako kon mopia,
sin oyúon in dongka bidon aid inta motogat.
20 Tuhan, tongábí kon ini-Mu tontaní
kami in nogaidon kon dosa
Akúon nami in dosa nami tontaní
bo dosa in mogoguyang nami.
21Toropdon in dandi-Mu, dika kaasí poompáan-Mumai in kami;
dodandian-Mu takin inami dikabí inggamáan-Mu.
Yerusalem in tampat pomomarentaan-Mu inta momulia,
dika kaasí poompáan-Mumai.
22Dewa mita in bangusa mita
diá mokopoḷabú in uyan kon butá.
Ḷangit in diábí doman
mopoḷabú monag in uyan podoyon kon kawasanea tontaní.
Tongábí Iko in andoḷan nami.
Inaidan-Mu intua komintan nobaḻí.
Currently Selected:
YEREMIA 14: INOMOG
Highlight
Copy
Compare
Share
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
