YESAYA 5

Dondong yobayatku bo gobá in anggurnea

1 # Mat. 21:33; Mrk. 12:1; Luk. 20:9 Indongogaipa in dondongku

soaḷ gobá in anggur in yobayatku.

Yobayatku oyúon in gobá in anggur

kon obaga in buḷud inta noḷumbá.

2Sia in nomasoḷ kon butánea

bo moḷumbú kon batunea mita.

Pinomuḷanea in anggur inta notompiḻí

pinosindognea in ḷangkeang poḷoḷukadan.

Pinongaḻiannea kon bubú tobatú

pomomugutan kon anggurnea,

bo nogoḷat in sia kon bungainea moḷutú,

táe nomungai in sia in bungai in anggur inta noirat.

3Dá tanaa yobayatku in noguman,

“Moiko komintan, intau inta nogutun kon Yerusalem bo Yohuda,

sisigaidon kon sigad in anggur-Ku bo Akuoi.

4Onupa in musti pomiaan-Ku,

inta diápa inaidan-Ku kon gobá in anggur-Ku tatua?

Nongonu sin noiratbí in bungainea,

bo deemanbí bungainea inta mopia ná inta inoḷat-Ku mako?

5Nanaa in aidan-Ku kon gobá in anggur-Ku tatua:

Tondok inta pinoḻibu in rabuton-Ku,

dinding inta pinogoḻingoi kon inia in umpagon-Ku,

bo pinomayá-Ku mako in mahaḷuk moraat momoguyaat

bo moritak-ritak mako kon inia.

6Pomayá-Kubí mako in sia in kobiagan in bonok.

Pangkoi in anggurnea diábí rapadan-Ku,

bo diábí tuyangan-Ku.

Modapotbí in pomayá-Ku mako kokoḷoban in mainggoa bo bonok,

nodapot in goḷom mita diá ogoi-Ku mopoḷabú in uyan kon tudunea.”

7Sin gobá in anggur i Tuhan Inta Totok in Mokawasa

in umat in Israel,

bo intau mita in Yohuda

in pangkoi in anggur inta pinomuḷa-Nea.

Kon i monia iharap-Nea mako in aid inta moadil,

táe tongábí aid moraat.

Kon bonu in kamang-Nea mosia in moposindogbí in inta mobanar,

táe tongábí oyúon in karak moigum kon koadilan.

Aid moraat inta pinomia in intau

8Moboditodon in moiko inta motaḷui kon baḷoi mita bo kinotuo-tuotnea kon gobá mita sin podugang kon kapunyaanmu! Diádon moonggot modaitdon in tampat kon intau ibanea bo tongádon moiko in mogutun kon butá tatua. 9Dinongog-Ku in ki Tuhan Inta Totok in mokawasa in nongibot, “Baḷoi mita inta moḷoben bo inta mongogaga tanaa komintanbí taḷaanmai bo diá utunan. 10Bungai in pinomuḷa diá mopia, gobá in anggur inta koḷobennea mopuḷú nohitare tongá kouḻían kon mopuḷú noliter in tubig in anggur. Mogatut noliter in bibitnea tongá kinouḻían kon mopuḷú noliter in gandum.”

11Moboditodon in moiko! Nongkon doḷo-doḷom nodapot in doḷom oaidanmu tongábí monginum kon oinumon inta mokoḷoḷangu bo moḷoḷangu. 12Kon bobutunganmu mita oyúon in singog in kecapi, gambus, rebana bo bansí bo monginum kon anggur. Táe diábí pinandungmai monimu onu in pinomia i Tuhan bo onu inta inaidan-Nea. 13Tuamai in umat-Ku inta diá nonotaau in onu bo onu in diaanbí mayá nobaḻí intau dinakop. Itoi mita bo rayat in matoibí in gogoy bo rogang. 14Dunia in intau minatoi nobukádon noḷoben sin moḻiom kon intau mita inta noiuna kon Yerusalem takin rayat inta nononbobutungan noyotakin.

15Batúan in intau in pokopooyáanbímai, bo inta moḷoḷatú in poompáan. 16Táe ki Tuhan Inta Totok in mokawasa nopoontong in koḷoḷoben-Nea pinongin nogaid kon onu inta nobanar. Sia in mopoontongbí in kototusi-Nea pongin monisig kon bangusa-Nea. 17Kon kinogoguyaatan in kotá ki adí in bembé bo domba in mokaan kon bonok bo diábí kodaitan in kaanonnea.#5:17: Kon bonu in naska in Ibrani tontagá tanaa diá nosimantag in mangaḻenea.

18Moboditodon in moiko inta tantú mogaid kon dosa! 19Gumanmu, “Pomayádon ki Tuhan Allah in Israel in ḷagidon mogaid kon onu in koibog-Nea! Pomayádon mako Sia in mogaid kon tomayá-Nea, sinbá ontongon naton bo monotaau.”

20Moboditodon in moiko inta monuui kon inta mopia bo inta moraat, inta mosindip bo inta mobayag, inta mopait bo inta moromimit!

21Moboditodon in moiko inta tumangoi mobijaksana bo mopandoi totok!

22Moboditodon in moiko inta motoyang monginum kon anggur! Moiko in mobarani bo motoyang aka mopoyobauk in oinumon mokoḷoḷangu! 23Táe tongá bá mokouḻí kon doit posogó, dá moiko in mopoḷuat kon intau kotaḷá, bo moḷamboi kon intau diá kotaḷá mokouḻí kon inta moadil. 24Moiko in nondoídon kon totundú i Tuhan Inta Totok in mokawasa, bo noningkuḻe kon parenta i Allah inta mokudus in Israel. Tuamai, ná onda bo wawa bo bonok noingkag nodait nopokak kon bonu in tuḷú, natua doman in uakatmu mita mobongkogdon, bungangmu mita moingkag bo modait irupon in tompot. 25Ki Tuhan in sinumorú kon bangusa-Nea. Sia in nosadiadon kon mohukum kon i monia. Buḷud mita in modandú, mayat mita posiyayit naonda bo apat kon daḷan. Táe ki Tuhan in sinumorúpabí bo tantúbí mohukum.

26Ki Tuhan in mogoiníbí kon bangusa inta moyayú#5:26: Kamungkinan moḷoben mangaḻenea bangusa inta moyayú; naska Ibrani: bangusa mita inta moyayú. bo mosia in ḻimikatbí in mamangoi! 27Mosia in umuranbí taḷaoḷat mako in moparang bo diábí kotaauan monia in moḷopí. Mosia in diábí kon dodai in onda in mosiug andeka tomposiug. 28Piotnea in moruit bo puḷunea in kosadi-sadia pomiot. Konuku in kabaḷonea ná kopanggit in batu tuḷú, bo bola in keretanea moburow naonda bo uḷu in tompot. 29Tontaranea mita in moganggor naonda bo singa inta bagu nodomok kon kokaanonnea, bo nodia kon tua pinoḷagui, bo diábí in mokopoḷuat kon tua.

30Kon singgai tatua kon sinangkub in Israel kinodongogandon in kokow pinoparangan naonda bo koropot in boḷontung in bokoḷ.

Indoiaika, sinangkub in ḻipú tatua nosindip bo nosisídon totok. Bayag in nobaḻídon sindip totok.

Currently Selected:

YESAYA 5: INOMOG

Highlight

Copy

Compare