YESAYA 21
21
Oontongon kon koḷabúan in Babel
1Naa in koyow kon Babel:
Ná uḷu in tompot motoninsing moitaḻib kon padang gurun, natuata in koangoi in bodito nongkon butá inta motoyang. 2Akuoi in nokoontong kon oontongon onu mita inta mobaḻí inta mokoondok; soaḷ pomaḷidawaan bo pomutúan.
Monikdon, tontara in Elam, tubudon! Ei tontara in Madai, kopungdon! Ki Allah in mogimpaḷutbí kon bayongan in roriga inta pinopisí in Babel.
3Oontongon tatua nokotoboḻingo kon inakó nodapot in diá in nokoontong andeka mokodongogpa. Akuoi in inagían in ondok bo nakit, naonda bo bobay tobatú inta koyogot in mononggadí. 4Moḻia-ḻiaw in ginaku; porasaan moondok nokourot kon awakku. Doḷom inta kinotanobanku tongá nokopoangoi kon ondok.
5Inontongku doman in pinongaanan bobutungan inta ain sinadia; ḷoḻitúan in intau mita inta sinoko oiní ain sinadia. Mosia in nongaan bo nonginum. Bo daḻídon kinodongogan in parenta: “Ei porwira mita! Sadia in kaḻeawmu!”
6Bo ki Tuhan in noguman kon inakó, “Bayádon pokiḷukadai in moḷoḷukad tobatú bo poguman kon inia kon poguman onu in inontongnea. 7Aka sia in mokoontong kon tontara mita inta sinumakoi kon kabaḷo mamangoi tumododoyawa, tontara inta sinumakoi kon keledai bo unta, yo mustibí taridiannea kopiaan.”
8Onda intua moḷoḷukad tatua#21:8: Podudui in tobatú terjemahan dungkuḷmai moḷoḷukad tatua; podudui in naska in Ibrani: singa. nomaḷú, “Tuang, akuoi ain noḷukad pomuḷoi in singgai bo doḷom.”
9 #
Why. 14:8, 18:2 Indoiaidon, tuata in mosia! Tontara inta sinumakoi kon kabaḷo inta namangoi tumododoyowa. Onda intua moḷoḷukad tatua nopotaau, “Babel ain noḷabú! Patong mita inta sumbaanmai monia norimumud positabud kon butá.”
10Bangusaku Israel! Iko ain iyunta-yuntai bo irita-ritakan mako naonda bo batoḷ in gandum. Tanaa in potaaukudon kon inimu in habar mopia inta dinongogku nongkon i Tuhan Inta totok in mokawasa, Allah in Israel.
Toḻindap kon Edom
11Naa in koyow kon Edom.
Oyúon in intau in momaḷú kon i-Nakó nongkon Edom, “Ei, moḷoḷukad, moonggotpa degá in doḷom tanaa? Tongonupa nojam bo mobayag?”
12Tubagku, “Doḷo-doḷom in moiangoibí táe doḷombí doman. Aka moibog moḻibó, yo angoidon bui bo poḻibó.”
Toḻindap kon Arab
13Naa in koyow kon Arab:
Ei intau in Dedan, kapilah-kapilahmu nononḷoḷaigan kon siungonmai in bo bonganga kon butá in Arab. 14Ei intau kon butá in Tema, ogoiaidon in inumon kon intau mita inta irumogang inta namangoi kon inimu, bo ogoiaidon in kaanon kon intau mita inta noroḷagui mangoi. 15Sin mosia in noḷaguidon kon pitow inta ain irabut, bo nongkon piot inta ain pinopopiot, bo nongkon parang inta koyogot mobaḻí.
16Bo ki Tuhan in noguman kon inakó, “Noitongkaná in totaongpa bo kotoyangan in suku mita Kedar in mopaḷutdon. 17Momomiot mita in Kedar in intau inta totok in motorindog. Táe tongábí topiḻik nongkon i monia in mosaḷamat. Akuoi, ki Tuhan Allah in Israel ain nosingog.”
Currently Selected:
YESAYA 21: INOMOG
Highlight
Copy
Compare
Share
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
