YESAYA 2

Dame mononoi

(Mi. 4:1-3)

1Naa in koyow i Allah kon Yohuda bo Yerusalem inta sinarima i Yesaya ki adí i Amos:

2Kon singgai mita moiduduimai

buḷud kinoḻitúan in Baḷoi Tuhan inta moḷantud

bo inta noisindog moroton

kon tudu in buḷud mita bo tombuḷudnea mita.

Bayongan in bangusa moyotakinbí in mayá intua,

3mosia komintan in moguman,

“Igai in kita mayá motakod kon Buḷud i Tuhan,#2:3: Buḷud i Tuhan: Buḷud in Sion, buḷud inta dininding sin moḷukad kon Yerusalem. Kon bonu in puisi bo buk in nabi mita ‘Buḷud i Tuhan’ in tangoibí ibanea in kotá in Yerusalem andeka intaunea inta binarakatan andeka kinutuk i Tuhan.

mayá in baḷoi Allah in Israel.

Sia in motundúbí kon i naton

onu in musti aidan naton.

Kita in dumuduibí kon daḷan-Nea,

sin totundú i Tuhan in mamangoi nongkon Yerusalem,

Sia in mosingog nongkon Sion.”

4 # Yl. 3:10; Mi. 4:3 Sia in mohakimbí kon sigad in bangusa mita,

bo momontow kon pelekara kon sigad in suku mita in bangusa.

Pitow in tontaḷon pomiaan pajeko,

bo ginubat aidan roratab.

Bangusa mita in diábí mositubuan,

diábí domandon mosadia moparang.

5Ei, buí i Yakub,

igai in kita dumudui kon bayag i Tuhan!

Intau moḷoḷatú in yopúonbí

6O Allah, Iko in nonaḷádon kon umat-Mu, buí i Yakub! Sin kon ondakabí kon butá tanaa intau in mopomaké in ilimu sinotaau monia inta nongkon pomukaan bo nongkon Pilistin.#2:6: Kamungkinan moḷoben mangaḻenea kon ondakabí … Pilistin. Intau mita dumudui kon adat in intau ibanea. 7Ḻipúnea nopuḻing in saḷaka bo buḷawan, bo kapunyaannea diá koiapan. Kabaḷonea mobayong totok, bo keretanea diádon koiapan in kobayongnea. 8Kon bayongan tampat oyúon in berhala, bo mosia in mosumba kon patong mita inta pinomia monia tontaní.

9Batúan in intau in singkuḻeonbí bo poompáan. Dika mongampung kon i monia o Tuhan!

10 # Why. 6:15; Tes.2. 1:9 Mosia in tumuot kon bonu in angob mita kon buḷud mita in karang, andeka mongaḻi kon bubú kon bonu in butá sinbá moiḷagui kon torú i Tuhan bo nongkon kawasa-Nea inta moḷantud. 11Intau moḷoḷatú in poompáanbí bo intau mododia potungkudon. Tongá ki Tuhan tontaní in poḷantudon. 12Kon singgai tatua ki Tuhan Inta Totok in mokawasa in mopoompámai kon bayongan inta motosiḷantud bo mohukum kon bayongan inta moḷoḷatú bo inta mododia. 13Pangkoi mita in ḷokuyú inta moḷantud kon Libanon bo bayongan in pangkoi in kayu moḷoben kon Basan in tokoyompaton. 14Buḷud mita bo tombuḷudnea mita inta mogaga in tondodaion. 15Ḷangkeang mita inta moḷantud bo dinding mita in poḷoḷukadan in umpagon. 16Kapaḷ mita inta totok in moḷoben bo inta totok in mogaga in potaḷomonbí. 17Intau moḷoḷatú in poompáan, bo intau mododia in potungkudon. Tongá ki Tuhan tontaní in poḷantudon. 18Berhala mita in moinggamádon komintan.

19-21Kon dodai in ki Tuhan simindog bo modandú kon butá, intau in tumuotbí kon bonu in angob mita kon buḷud mita in karang andeka mongaḻi kon bubú kon bonu in butá sinbá moiḷagui kon torú i Tuhan bo nongkon kawasa-Nea inta moḷantud. Aka singgai tatua in moiangoi, berhala mita saḷaka bo buḷawan inta pinomia bo sinumba monia tua in taḷaanbí mako natua ogoi kon boyod bo poniki.

22Dá, dikabí umandoḷ kon intau inta mato-matoi naa, sin sia in diábí in mangaḻenea.

Currently Selected:

YESAYA 2: INOMOG

Highlight

Copy

Compare