ZAKHARIA 10
10
A'janji Batara laNapasalama' umma'Na
1Punna battu wattu accu'la'na lamung-lamunga, appalakko bosi mae ri Batara. Na laNapa'rappungi Batara rammang lappaturunga bosi, siagang laNapaturungi bosi lompoa sa'genna a'jari moncongbulo nicini' sikamma kokoa siagang a'jari baji' mange ri yangasenna taua. 2#Mat. 9:36; Mrk. 6:34 Appalaki pangngunju' sikamma taua mae ri barhala-barhalaya siagang ri sikamma pacinika, mingka sikamma anjo pangngunju' nagappaya ke'nanga sangnging balle-balle siagang bicara kosonji bawang. Nia' ambattuangngi so'naya, mingka anjo battuang napakasingaraka ke'nanga poro lanapakalingu ngaseng jako; siagang anjo panynyaleori napassareanga tena battuanna. Lanri kammana anjo natassimbung-simbung ra'yaka sanrapang gimbalaka. Tenamo nasilolongang ke'nanga lanri tena pamimpinna.
3Nakana Batara, “Sanna' larroKu mae ri tukoasa ammarentaya ri ummakKu, siagang laKuhukkungi ke'nanga. Mingka pandudu'na Yehuda iNakke ampatangi, siagang iNakke, Batara Kaminang Koasaya lamparakai ke'nanga. LaKupa'jari ke'nanga rapang jarang pa'bundukang makassaka untu' iNakke. 4Battu ri tangnga-tangngana ke'nanga laKupilei tukoasaya, pamimpinga, siagang panglima lammarentaya ri ummakKu.” 5Lammetai pandudu'na Yehuda sangkamma pejuang-pejuang angngonjo'-ngonjokangi musunna rapang butta peo' ri aganga. Labarjuangi ke'nanga lanri iNakke, Batara ambantuai ke'nanga; siagang lanabetai ke'nanga sikamma musu a'dongko' jaranga.
6“LaKupa'jari kassaki pandudu'na Yehuda,
laKupasalamaki umma' Israel.
Kuerangi ke'nanga ammotere' mange ri pa'rasanganna
lanri Kusayanna ke'nanga.
LaKupareki ke'nanga
sangkamma bansa tenaya nale'ba' Kusassali.
INakkemi Karaeng Allata'alana ke'nanga,
sikontu pappala' doanna laKuparhatikangi ammotere'.
7Umma' Israel la'jari sangkamma tubarani makassaka,
rapang tau angnginunga anggoro'
larannui pa'mai'na ke'nanga.
Jari-jarina ke'nanga battu ri jammanga
mae ri jammang poleanga
talanakaluppaiyai anne pammetang Kupassareanga.
La'rannu-rannui ke'nanga
lanri apa Kugaukanga mae ri ke'nanga.
8LaKukioki ummakKu siagang Kupa'rappungi ke'nanga a'jari se're.
LaKupakabebasaki ke'nanga siagang laKupa'jari jai sangkamma riolo jaina.
9Manna pole Kupasiara' ke'nanga
ri tangnga-tangngana bansa-bansaya,
tuli lamangngu'ranginna ke'nanga
mae ri Nakke anjoreng.
Lasalamaki ke'nanga kammayatompa ana'-ana'na
na siagang ngaseng lammotere'
mange ri pa'rasanganna.
10LaKupoterangi ke'nanga battu ri Mesir siagang Asyur.
LaKuboliki ke'nanga ri pa'rasangang kalenna.
Kuerangi ke'nanga mange ri Gilead kammayatompa Libanon,
sa'genna rassi sikontu pa'rasanganga
napakamma ke'nanga.
11Punna a'limbang ke'nanga ri tamparang kasukkarang,
iNakke, Batara
antunrungi sikamma bombanga;
na'jari kalotoro' taba sikali
dapara' rawana Binanga Nil.
Bansa Asyur tampoa lanipakatunai,
siagang Mesir porea latappelaki kakoasanna.
12LaKupa'jari kassaki ummakKu,
lamannuruki siagang lanynyombai ke'nanga ri Nakke.
INakke, Batara, anne akkana.”
Currently Selected:
ZAKHARIA 10: MAK
Highlight
Copy
Compare
Share
Want to have your highlights saved across all your devices? Sign up or sign in
@LAI, 1999
