PAMMILANGNGANG 2
2
Tampa'na massing suku-sukua lalang ri pakkemaanga
1Nakana Batara mae ri Musa siagang Harun: 2“Ri wattunna nabangung tu Israel pakkemaanga, tunggala' taua musti akkemai ri tammulilina massing bandera kasatuanna siagang pammatei massing golongang bijanna ke'nanga. Sikontu anjo pakkemaanga musti nibangungi ri tammulilina KemaKu, mingka bella-bellai sike'de' battu anjoreng.”
3-9Ri bageang iraya, iamintu pasukang a'la'langa irawangang bandera kasatuanna Yehuda musti akkemae situru' pasukanna siagang massing pamimpinna, iamintu kammaya anne susunna:
| Suku | Pamimping | Jaina Tau |
|---|---|---|
| Yehuda | Nahason ana'na Aminadab | 74.600 |
| Isakhar | Netaneel ana'na Zuar | 54.400 |
| Zebulon | Eliab ana'na Helon | 57.400 |
| Yangasenna: | 186.400 |
Kasatuanna Yehuda musti a'lampa kaminang ri dallekang.
10-16Ri bageang timboro', iamintu pasukang a'la'langa irawangang bandera kasatuanna Ruben, musti akkemai situru' pasukanna siagang massing pamimpinna, iamintu kammaya anne susunna:
| Suku | Pamimping | Jaina Tau |
|---|---|---|
| Ruben | Elizur ana'na Syedeur | 46.500 |
| Simeon | Selumiel ana'na Zurisyadai | 59.300 |
| Gad | Elyasaf ana'na Rehuel | 45.650 |
| Yangasenna: | 151.450 |
Kasatuanna Ruben musti a'lampa makarua.
17Le'baki anjo, ri tangnga-tangngana sikontu pasukang Israel, a'jappai suku Lewi ampisangai KemaNa Batara. Sangkamma batena ke'nanga akkema, kamma tomminjo batena ke'nanga a'jappa, massing ri tampa'na situru' bandera-banderana ke'nanga.
18-24Ri bageang ilau', iamintu pasukang a'la'langa irawangang bandera kasatuanna Efraim, musti akkemai situru' pasukanna siagang massing pamimpinna, iamintu kammaya anne susunna:
| Suku | Pamimping | Jaina Tau |
|---|---|---|
| Efraim | Elisama ana'na Amihud | 40.500 |
| Manasye | Gamaliel ana'na Pedazur | 32.200 |
| Benyamin | Abidan ana'na Gideoni | 35.400 |
| Yangasenna: | 108.100 |
Kasatuanna Efraim musti a'jappa ri bokona suku Lewi.
25-31Ri bageang wara', iamintu pasukang a'la'langa irawangang bandera kasatuanna Dan, musti akkemai situru' pasukanna siagang massing pamimpinna, iamintu kammaya anne susunna:
| Suku | Pamimping | Jaina Tau |
|---|---|---|
| Dan | Ahiezer ana'na Amisyadai | 62.700 |
| Asyer | Pagiel ana'na Okhran | 41.500 |
| Naftali | Ahira ana'na Enan | 53.400 |
| Yangasenna: | 157.600 |
Kasatuanna Dan a'lampa kaminang kala'busang.
32Yangasenna tu Israel niaka nidattara' lalang ri kasatuang-kasatuang situru' massing-massing pasukanga, iamintu 603.550 jaina tau. 33Sangkamma Naparentakanga Batara mae ri Musa, tu Lewi tena nidattaraki siagang sikamma tu Israel maraenga.
34Nagaukammi tu Israel sikontu anjo apa Naparentakanga Batara mae ri Musa. Massing akkemami ke'nanga ri tammulilina massing banderana, siagang a'lampami ke'nanga situru' golongang bijanna siagang kaluargana.
Currently Selected:
PAMMILANGNGANG 2: MAK
Highlight
Copy
Compare
Share
Want to have your highlights saved across all your devices? Sign up or sign in
@LAI, 1999