HOSEA 14

1Samaria musti nihukkungi lanri angngewana ri Nakke. Lamatei ra'ya'na lalang pa'bundukanga; ana'-ana' lolona lanilissaraki, siagang bai'-baine tiananga lanipuei battanna.”

Napalaki Hosea sollanna toba' tu Israel

2He bansa Israel, ammotere' mako mae ri Karaeng Allata'alanu! Passabakkang dosanu nutappeccoro' siagang tu'guru'. 3Ammotere' mako mae ri Batara, pabattumi anne pappala' doang salaku panynyombannu ri Ia angkana, “O Batara, pammopporangi dosana ikambe, siagang Kitarima laloi anne pappala' doanna ikambe, namammuji ikambe mae ri Katte situru' kana janjinna ikambe. 4Takkulleai Asyur ampasalamaki ikambe, siagang jarang pa'bundukanga takkulleai antulungi ikambe. Tenamo nalakkio' Allata'ala ikambe mae ri patung-patung napareka ikambe. O, Batara, Kikamaseangi sikamma tau tenaya apa-apa lanapattoang lampasalamaki.”

Napa'janjiangi Batara katallassang berua mae ri Israel

5Nakana Batara,

“UmmakKu ammengka salaya, Kuallei ammotere'

naKukamaseang sikontu pa'mai';

talaKukalarroiami pole ke'nanga.

6Mange ri Israel rapangA' bosi

ambasai butta kalotoroka.

La'bakkaki ke'nanga rapang bunga

siagang rapang camara lantanga aka'na.

7Lattallasaki siagang lakatambangi ke'nanga

rapang lamung-lamung accu'laka ri kere-keremae,

rapang poko' zaitun ga'gana

bau' rasanna rapang poko' camara!

8Lammotereki ke'nanga mae ri Nakke

nammamtang lalang ri la'langKu.

Lintaki ke'nanga katambang kalumanynyanna,

rapang gandung a'bakka' ri koko copponga buttana

siagang rapang koko anggoro'.

Rapang je'ne' anggoro' Libanon

lamasahoroki arenna ke'nanga.

9Lanapelaki tu Israel patung-patung barhalana;

laKuparakai ke'nanga naKupilangngeri pappala' doanna.

Rapang poko' kayu tuli jaina leko'na,

iNakke lalla'langngi ke'nanga.

INakkemi kabattuanna sikontu barakkaka mae ri ke'nanga.

INakke, Batara, anne akkana.”

Pannongko' bicara

10Dasi-dasi nasikontu tau cara'deka napahangi anne apa niaka tattulisi' anrinni, siagang naparhatikangi bonena. Pangngunju'-pangngunju' battua ri Batara iami tojeng, siagang ia tau bajika lanaturukimi anjo pangngunju'-pangngunjuka lalang tallasa'na. Mingka tau dorakaya nabalang parekangi, sa'genna tappeccoro' na tu'guru'.

Currently Selected:

HOSEA 14: MAK

Highlight

Copy

Compare