YEHEZKIEL 19
19
Kelong-kelong piraung
1Nasuroa' Allata'ala angkelongangi anne kelong-kelong karruka mae ri ruaya karaeng Israel:
2Amma'nu rapangi singa gana
ia hebaka siagang porea.
Napakalompoi ana'-ana'na
ri tangnga-tangngana singa-singa porea.
3Kalase'renna ana'na nadidiki
siagang naajaraki a'boya apa lanakanre.
Na'jarimo singa lompo
angngokkoka siagang angnganrea tau.
4Bansa-bansa allangngerekai kabara'na
a'rappungi untu' anjakkalaki.
Nitannangngi sikko' lalang kali'bong nampa nialle,
nampa nire'resang mange ri Mesir siagang tado'.
5Sia-siai anronna antayangi ana'na;
nampa naasseng angkana tenami panrannuanna.
Jari ana'-ana'na maraenga nalatimi
a'jari singa sekke' siagang pore.
6Anjo ana' singaya a'jari lompoi
nasilokoang siagang singa-singa maraenga.
Appilajara' a'boya apa lanakanre,
na'jari tommo pakanre tau.
7Nalappoi tembo'-tembo' pattahangnganga,
napanraki kota-kotaya.
Annekkere'mi pandudu'na sikontu pa'rasanganga
nalangngere'na sa'ranna a'gamarrunga.
8Mingka bansa-bansa niaka ri daera tammulilina
battu ambakkai ri kere-keremae.
Ammuangi ke'nanga jala untu' anjakkalaki,
na niallemo ri sikko'na ke'nanga.
9Nipantamaki ri kurungang singa
nampa nierang mange ri Babel andallekang ri karaeng.
Nijarreki jagana sollanna tenamo nakalangngerang sa'ranna
irate ri bulu'-bulu' tinggina Israel.
10Amma'nu rapangi poko' anggoro' ga'ga
attimboa ri koko a'biring pangka binangaya.
Coppongi leko'na na'rappo
lanri alla'bina je'neka anjoreng.
11Kassa' tangkenna, tagampangai nitepo'
siratangi nipare' takkang karaeng.
Coppo'na tinggi nai'
narapiki rammanga.
Nikangngalikangi ri sikontu taua
lanri tinggina siagang copponna leko'na.
12Mingka nibi'buki ri lima-lima larroa,
nampa nipela' naung ri butta.
Ammiriki anging battu iraya angkalotori rappo baji'na.
Tepoki tangkenna, a'jari kalotoro' nampa nitunu.
13Kamma-kamma anne nilamungi ri parang kassi',
ri butta roso' tenaya je'ne'na.
14Batanna anjo anggoroka nilepaki ri pepe' a'le'lere';
tangkenna siagang rapponna la'busu' nikanre ri pepe'.
Tangkenna tenamo nattahang kamma-kamma anne;
takkulleami nipare' takkang karaeng.
Iaminjo karru' a'mole-molea nikelongang ri ummaka.
Currently Selected:
YEHEZKIEL 19: MAK
Highlight
Copy
Compare
Share
Want to have your highlights saved across all your devices? Sign up or sign in
@LAI, 1999
