MASTEKANA JUNG-KEJUNGAN 3
3
1E baja malem, e tang katedhungan,
e dhalem mempe sengko' nyare tang kakase,
sengko' nyare, tape ta' etemmo.
2Sengko' jaga'a alenglenga e kottha,
kabbi lorong ejalanana.
Sengko' nyareya buwana tang ate;
bi' sengko' esare, tape ta' etemmo.
3Sengko' etemmo oreng se apattrol e kottha, sengko' laju atanya,
“Ponapa sampeyan ta' tapanggi sareng buwana ate kaula?”
4Sengko' buru nyengla dhari reng-oreng se apattrol jareya
laju tatemmo ban tang buwana ate.
Bi' sengko' eteggu', ta' eocol pole,
pas egiba ka bengkona tang ebu,
ka kamarra oreng se alahirragi sengko'.
5Mara ajanji, babine'an Yerusalim,
demi dang-keddang ban manjangan e ra-ara,
ja' ba'na ta' agangguwa tang kataresna'an reya,
sabellunna katekkan se daddi pangaterrona.
Nyanyeyan se nomer tello'
Babine'
6Apa rowa se dhateng dhari sagara beddhi,
akantha okos se apel-kempel?
Ro'omma akantha dupa ban mennyan,
ban beddha'na gang-dagang se aro'oman.
7Abas, rowa' tandhuna Sulaiman,
ekalenglenge oreng se parjuga sabidak oreng,
reng-oreng parjuga dhari bangsa Isra'il,
8se padha andhi' pangalaman e dhalem perrang.
Reng-oreng jareya padha nyongkel peddhang,
asadhiya ngadhebbi serrangan e baja malem.
9Sulaiman abadhi tandhu
dhari kaju se paleng bagus.
10Canggana dhari salaka,
panyandharanna dhari emmas.
Kalenggiyanna barnana bungo terrong,
esolam babine'an Yerusalim kalaban senneng ate.
11Mara kalowar, babine'an Siyon,
tenggu Rato Sulaiman
se ngagem jamang se epasangngagi ebuna,
e bakto akabin,
e are se magumbira panggaliyanna.
Currently Selected:
MASTEKANA JUNG-KEJUNGAN 3: MAD
Highlight
Copy
Compare
Share
Want to have your highlights saved across all your devices? Sign up or sign in
