JABUR 96
96
Allah, Rato se agung
(1Bbd. 16:23-33)
1Nyanyeyagi nyanyeyan se anyar kaator ka PANGERAN!
Mara nyanye ka PANGERAN, saantero bume!
2Mara nyanye kaator ka PANGERAN, ban molja'agi Salerana;
sabban are berta'agi kabar gumbira
ja' Salerana la masalamet sengko' ban ba'na.
3Careta'agi kaagunganna ka sa-bangsa,
ban lalakon raja se elampa'agi Salerana
kaangguy ommat manossa.
4Sabab PANGERAN reya agung ban talebat molja,
kodu ekatako'e alebbiyan dhari ba-diba.
5Ba-dibana bangsa laen pera' arca brahala,
tape PANGERAN reya se nyepta'agi langnge'.
6Salerana katotoban kamolja'an ban kaagungan,
Padalemmanna possa' ban kobasa sarta kaasreyan.
7 #
Jab. 29:1-2
Molja'agi PANGERAN, he ommat manossa,
molja'agi kaagungan ban kakowadanna!
8Molja'agi asmana se agung,
mara ngeba kurban ka dhalem Padalemmanna.
9Semba Pangeran ngangguy pangangguy kabakteyan!
Pangetter e ajunanna, saantero dunnya!
10Berta'agi ka sa-bangsa,
“PANGERAN reya Rato! Bume koko ta' ekenneng gundhek;
Salerana bakal ahakimana sa-bangsa kalaban adil.”
11Mara paperak, langnge' ban bume!
Mara agarudhu', tase' ban saessena!
12Mara paperak, gal-teggal ban men-tamennanna!
Ka'-bungka'an e alas bakal rak-soragana.
13Sabab PANGERAN rabu marenta e bume,
ahakimana sa-bangsa kalaban jujur ban adil.
Currently Selected:
JABUR 96: MAD
Highlight
Copy
Compare
Share
Want to have your highlights saved across all your devices? Sign up or sign in
