JABUR 64
64
Du'a nyo'on pangaoban
1Kaangguy pamimpinna koor. Jaburra Daud.
2Ya Allah, peyarsa'agi du'a abdidalem e bakto sossa,
parenge salamet nyaba abdidalem dhari moso se nako'e.
3Pasalamettagi abdidalem dhari reng-oreng daraka se asakongkel,
dhari sajjana reng-oreng jahat se salenter.
4Reng-oreng gapaneka jilana epatajem akadi peddhang,
makalowar caca se kejjem akadi pana.
5Dhari pangetegganna reng-oreng gapaneka mabalattra careta lecek,
tadha' tako'na metenna oreng se ta' sala.
6Reng-oreng gapaneka koko neggu'i neyadda se jahat,
aparembagan masanga jebbak;
ca'epon pangrasana tadha' oreng se nengale.
7Reng-oreng gapaneka gadhuwan sajja jahat, laju ngoca',
“Sengko' ban ba'na andhi' sajja jahat se samporna.”
Ate ban buddina manossa ce' dhalemma,
tadha' oreng se oneng ka essena.
8Tape Allah ngaceddagi panana ka reng-oreng jareya,
reng-oreng jareya pas loka daksakala.
9Reng-oreng jareya mate polana cacana dibi';
se nangale padha pek-kepeggan kabbi.
10Reng-oreng laju padha katako'en kabbi;
padha mekkere sabarang se la elampa'agi Allah
ban aberta'agi sabarang se elampa'agi Salerana.
11Daddi oreng becce' bakal padha'a perak,
polana sabarang se elampa'agi PANGERAN.
Kabbi bakal ngaoba ka Salerana;
reng-oreng se jujur se amolja'agi asmana.
Currently Selected:
JABUR 64: MAD
Highlight
Copy
Compare
Share
Want to have your highlights saved across all your devices? Sign up or sign in
