JABUR 55
55
Du'a nyo'on salamet dhari moso
1Kaangguy pamimpinna koor. Eerenge calempong. Nyanyeyan pangajaranna Daud.
2Peyarsa'agi du'a abdidalem, Guste,
ja' pongkore parnyo'onan abdidalem.
3Peyarsa'agi abdidalem, parenge abdidalem jawaban,
abdidalem ancor lantaran kasossa'an.
4Abdidalem ngalengsang lantaran eara moso
sareng etendhes oreng jahat.
Odhi' abdidalem epasossa reng-oreng gapaneka,
abdidalem ekapeggelli sareng ekabaji'i.
5Abdidalem ngalengsang e dhalem ate,
katako'en ngadhebbi babaja pate.
6Abdidalem katako'en sareng gujuden,
arassa marenges sareng serrem.
7Ja' sakenga abdidalem gadhuwan kalembang akadi dara,
tanto abdidalem ngabber nyare kennengngan se aman taremtem.
8Abdidalem ngabberra ka jauna,
badhi ennengnga e ra-ara.
9Abdidalem duliya nyare pangaoban,
sopaja lopoda dhari ojan derres sareng kaleng busbus.
10Pabingongngagi so-moso abdidalem, Guste,
pasalbuddagi cacana, sabab abdidalem nengale
kakerrasan sareng tokar e dhalem kottha.
11Seyang sareng malem reng-oreng gapaneka alengleng e kottha,
ngalakone kajahadan, madhateng kasossa'an.
12E man-ka'dhimman badha se eancor;
bannya' oreng ekaneyaja sareng etepo e lon-alon sareng e rong-lorong.
13Ja' sakenga moso se nyale sengko',
sengko' gi' betta;
ja' sakenga moso se ya-nyeya sengko',
sengko' gi' bisa ngetek.
14Tape me' ba'na, tang kanca, tang sahabat,
ba'na oreng se semma' ka sengko' se akiyanat ka sengko'.
15Lamba' sengko' ban ba'na along-polong acaca ce' nyamanna,
biyasana areng-bareng noro' kabakteyan e Padalemman Socce.
16Mandar tang moso mateya dadagan,
maso' dhi'-odhi' ka dunnyana oreng mate,
sabab kajahadan mossa'e bengko ban atena.
17Tape sengko' aserro ka Allah,
sengko' tanto epasalamet bi' PANGERAN.
18Sengko' aserro ban nanges malem ban seyang
ban Pangeran meyarsa tang sowara.
19Sengko' epasalamet dhari serranganna moso,
se padha dhateng anyo-ronyo.
20Allah se marenta salanggengnga,
tanto meyarsa'agi sengko' ban makala reng-oreng jareya.
Sabab reng-oreng jareya ta' endha' atobat dhari salana,
sarta ta' tako' ka Allah.
21Bekkas tang kanca nyerrang ca-kancana,
ta' neptebbi janjina.
22Ca'-oca'na alos lemma' manes,
tape e dhalem atena baji' ka oreng.
Cacana alos tadha' bandhinganna,
tape naccek akantha peddhang se ce' tajemma.
23Passra'agi kakobateranna ba'na ka PANGERAN,
tanto ba'na etolong bi' Salerana;
sabab oreng se jujur atena bi' PANGERAN ta' kera epakala ka mosona.
24Namong Junandalem, Guste Allah,
bakal ajurukkagiya reng-oreng gapaneka
ka dhalem jurang se paleng dhalem.
Tokang tepo sareng tokang mate'e oreng
ta' kera odhi' kantos saparona omorra.
Namong abdidalem parcaja ka Junandalem.
Currently Selected:
JABUR 55: MAD
Highlight
Copy
Compare
Share
Want to have your highlights saved across all your devices? Sign up or sign in
