JABUR 45
45
Nyanyeyan e bakto pangantanna rato
1Jaburra kaom Korah. Nyanyeyan kataresna'an. Kaangguy pamimpinna koor. Menorot lagu: Kembang kacobung.
2Ca'-oca' se bagus ngalowa dhari tang ate,
sengko' ngatorragi tang nyanyeyan ka rato.
Akantha eppenna bujangga se penter,
tang jila to-sabakto bisa makalowar syi'ir.
3Junandalem se paleng gantheng e antarana manossa,
dhabuepon junandalem bagus, tadha' calena,
daddi junandalem eberkadi Allah salanjangnga.
4Taleyagi peddhangngepon junandalem e tengngana, rato se gaga' parjuga,
junandalem sanget agung sareng molja.
5Ngereng maju pagaga' nyerser kamennangan
aperrang arebbu' sadajana se lerres sareng adil,
kalaban kakowadannepon junandalem ngereng rebbu' kamennangan se raja!
6Panaepon junandalem se tajem naccek ka kol-tongkolannepon moso, terbas sampe' ka atena,
sa-bangsa robbu e ajunanna padaepon junandalem.
7 #
Ibr. 1:8-9
Allah marenge junandalem kobasa kaangguy marenta,
kobasaepon junandalem paggun salanjangnga;
junandalem adil marenta ra'yadda.
8Junandalem lebur ka se sae, baji' ka se jahat;
daddi junandalem epele sareng Allah, Allahepon junandalem;
junandalem epasenneng ngalangkonge to-rato laenna.
9Rasoganna junandalem ro'om mennyan, dupa sareng candhana;
junandalem gumbira meyarsa'agi tokang mosik e karaton gaddhing.
10E antaraepon bu' embanna karaton,
badha tre-pottrena rato.
E kanganna korse karaja'an ngadek dinaju rato
ngagem pangangguy dhari emmas morne.
11Adhu, dinaju potre, ngereng peyarsa'agi ator abdidalem ka'dhinto,
ja' kaemodi pole bangsa sareng la-balaepon junandalem.
12Junandalem raddin ngapencot atena rato;
rato ka'issa' loraepon junandalem, toro' sadajana dhabuepon.
13Pandhudhu' Tirus abakta tor-ator ka junandalem;
oreng sogi aehteyar ngala'a ate ka junandalem.
14Dinaju pottre maso', katon ce' agungnga,
rasoganna asolam bennang emmas.
15Salerana earak ka rato, ngagem rasogan se acem-macem barnana,
eerengngagi ban-paraban ca-kancana,
se eatorragi ka rato keya.
16Reng-oreng jareya padha asorak gumbira
e bakto eater maso' ka karaton.
17Junandalem, Guste Rato, badhi kaagunganna pottra bannya',
se ngobasa'ana karaja'annepon bangatowana.
Sadajana sareng junandalem epangobasa'ana saantero bume.
18Kalaban nyanyeyan ka'dhinto
abdidalem makasohor junandalem ron-temoron,
sa-bangsa badhi amolja'agiya junandalem salanjangnga.
Currently Selected:
JABUR 45: MAD
Highlight
Copy
Compare
Share
Want to have your highlights saved across all your devices? Sign up or sign in
