JABUR 42
42
KETAB SE KAPENG DHUWA':
JABUR 42–72
Du'a e tana pambuwangan
1Kaangguy pamimpinna koor. Nyanyeyan pangajaranna kaom Korah.
2Akadi manjangan se kerrong ka aeng songay,
saka'dhinto kerrongnga sokma abdidalem ka Junandalem, Guste Allah.
3Sengko' ce' terrona tatemmowa ban Allah se odhi',
ba' bila sengko' se bisa'a abakte e dalemma?
4Seyang malem sengko' nanges ros-terrosan,
pera' aeng mata se daddi tang kakanan.
Saare benteng tang moso atanya,
“kemma Allahna ba'na?”
5Tang ate ngennes mon enga' ka jaman lamba',
e bakto sengko' ajalan ka Padalemman Socce,
abareng ban oreng se bannya' se mabadha paraya'an.
Sengko' ajalan e adha'na rak-aragan,
se rak-soragan sambi anyanye amolja'agi PANGERAN.
6Arapa tang ate me' sossa ban posang?
Sengko' ngarep ka Allah.
Daddi sengko' asokkora pole ka Salerana,
ka tang Alah panyalamet sengko' reya.
7-8E tana pambuwangan reya tang ate ancor rassana,
daddi sengko' enga' ka PANGERAN.
Tang sokma eanyo' omba' kasossa'an,
pekkeran salbut ta' etemmo karowanna;
kantha garudhu'na garujugan Songay Yordan
dhari Gunong Hermon ban Gunong Mizar.
9Moga-moga PANGERAN noduwagiya kataresna'anna e baja seyang,
sopaja e bakto malem sengko' bisa'a anyanye,
sarta adu'a ka Allah somberra tang odhi'.
10Sengko' mator ka Allah se abilla sengko',
“Aponapa Junandalem me' ta' emot ka abdidalem?
Aponapa abdidalem me' kodu terros nyandhang sossa,
lantaran etendhes moso abdidalem sadajana?”
11Tang ate ancor polana eya-seya tang moso jareya,
se padha atanya, “Kemma Allahna ba'na?”
12Arapa tang ate me' sossa ban posang?
Sengko' ngarep ka Allah.
Daddi sengko' asokkora pole ka Salerana,
ka tang Allah panyalamet sengko' reya.
Currently Selected:
JABUR 42: MAD
Highlight
Copy
Compare
Share
Want to have your highlights saved across all your devices? Sign up or sign in
