JABUR 31
31
Ngarep partolonganna Allah
1Kaangguy pamimpinna koor. Jaburra Daud.
2Abdidalem nyare pangaoban ka Junandalem, GUSTE,
ja' pakoceba'agi abdidalem.
Nyo'ona salamet abdidalem, GUSTE, bit kaadilannepon Junandalem,
3peyarsa'agi abdidalem, bebassagi abdidalem duliyan.
Ngereng Junandalem daddi gunong bato
kennengnganna abdidalem nyare pangaoban,
ngereng Junandalem daddi binteng se koko
kennengnganna abdidalem nyare kasalameddan.
4Lerres, monggu ka abdidalem Junandalem padha sareng gunong bato,
akadi binteng se koko!
Tontonnagi abdidalem, menorot janji se edhabuwagi Junandalem.
5Palopottagi abdidalem dhari jebbak se epasang oreng,
sabab namong Junandalem kennengnganna abdidalem nyare pangaoban.
6 #
Luk. 23:46
Ka dhalem astana Junandalem abdidalem massra'agi aba' ka'dhinto;
Junandalem masalamet abdidalem,
Guste PANGERAN, Allah se esto.
7Junandalem baji' ka oreng se nyemba brahala,
namong abdidalem parcaja ka Junandalem, GUSTE.
8Abdidalem perak sareng gumbira,
sabab Junandalem paggun taresna ka abdidalem.
Junandalem ngoladi kasangsara'an abdidalem,
sareng ngagali ka kasossa'an abdidalem.
9Junandalem ta' ngedine abdidalem etawan moso,
Junandalem marenge jalan kantos abdidalem kengeng ajalan sanyamanna.
10Kaneserre abdidalem, GUSTE,
sabab abdidalem sossa e dhalem ate;
mata abdidalem peddi kabannya'an nanges,
sokma sareng badan nyandhang sangsara.
11Abdidalem ta' gadhuwan kakowadan lantaran kasossa'an,
omor abdidalem pandha' lantaran nanges ros-terrosan.
Abdidalem lempo lantaran kajahadan,
kantos lang-tolang daddi alpo' sadajana.
12Abdidalem ekala'-gella' sareng moso
la'-mala' jugan sareng tatangga tepparo.
Sadajana kennalan takerjat manabi nengale abdidalem,
padha buru manabi tatemmo sareng nengale abdidalem e lorong.
13Abdidalem ta' ekaenga'e oreng akadi oreng se ampon mate,
sareng daddi barang buwangan.
14E man-ka'dhimman badha barang se nako'e;
abdidalem mereng san-rasanna moso.
So-moso abdidalem asakongkel
asajja padha mateyana abdidalem.
15Namong abdidalem ngarep partolongan dhari Junandalem, Guste PANGERAN,
sabab Junandalem Allah abdidalem.
16Sareng Junandalem abdidalem epeyara terros;
nyo'ona salamet abdidalem dhari sadajana moso,
sareng dhari reng-oreng se nyerser abdidalem.
17Moga Junandalem kasokana ka abdidalem;
nyo'ona salamet abdidalem, GUSTE, lantaran kataresna'annepon Junandalem.
18Ja' kantos abdidalem malo, GUSTE,
sabab abdidalem aserro ka Junandalem.
Diggal oreng jahat me' olle nanggung malo,
sareng tadha' kasa'na maso' ka alam maot.
19Dunggemmagi colo'epon reng-oreng se dujan co-ngoco,
se nye-ngenye oreng jujur lantaran sombong.
20Saponapa bannya'na kasaeyannepon Junandalem
se esadhiya'agi ka oreng se abakte ka Junandalem!
Saneyap oreng nengale kabecce'an se elampa'agi Junandalem
ka reng-oreng se ngaop ka Junandalem sareng se parcaja ka Junandalem.
21Junandalem ngerrep reng-oreng gapaneka, epaaman e dhalem pangaobannepon Junandalem,
sopaja lopoda dhari kobasaepon reng-oreng se asakongkel asajja juba';
sareng Junandalem ejaga sopaja salamedda
dhari da'wa'annepon mosona.
22Molja PANGERAN!
Kataresna'anna ka sengko' tadha' bandhinganna,
e bakto sengko' ekeppong ban eserrang.
23E bakto sengko' kabingongan
sengko' nyangka tang aba' la ebuwang bi' PANGERAN dhari ajunanna.
Tape Salerana meyarsa tang parnyo'onan,
e bakto sengko' aserro nyo'on partolongan.
24Taresnae PANGERAN, he sakabbinna ommadda,
PANGERAN nolong ban ngaobi oreng se esto.
Tape ta' gung-tanggung ngokom oreng se angga'.
25Ba'na kabbi se ngarep ka PANGERAN,
mara padha pakowat ban pakoko atena!
Currently Selected:
JABUR 31: MAD
Highlight
Copy
Compare
Share
Want to have your highlights saved across all your devices? Sign up or sign in
