ETONGAN ATOR MAMOLAN
ATOR MAMOLAN
Ketab Etongan paneka nyareta'agi sajarana bangsa Isra'il saabidda pa' polo taon, molae dhari pamangkadda dhari Gunong Sinay sampe' napa' ka bates temorra Kana'an, enggi paneka nagara se sareng Allah ejanjiyagi eparengngagiya ka bangsa gapaneka. Nyama Etongan paneka ekala' dhari kadaddiyan se paleng penting e dhalem ketab paneka, enggi paneka caca jiwana bangsa Isra'il. Caca jiwa se dha'-adha' kadibi' ebadha'agi sareng Mosa e Gunong Sinay sabellunna bangsa Isra'il mangkat, se kapeng dhuwa'na e bakto bangsa gapaneka badha e nagara Mo'ab, e temorranna Songay Yordan, ra-kera settong angkadan saamponna gapaneka. E antarana caca jiwa se kapeng settong sareng se kapeng dhuwa' gapaneka bangsa Isra'il entar ka Kades-Barnea e bates lao'na Kana'an. Dhari ka'dhissa' reng-oreng Isra'il ngoddi maso'a ka nagara Kana'an, namong ta' ahasel. Saamponna pan-saponapan taon ngennengnge sabingkerra Kades-Barnea, bangsa Isra'il laju entar ka bagiyan e temorranna Songay Yordan. Sabagiyan dhari bangsa gapaneka neptep e ka'dhissa', se laen ayap-siyap alengka'ana Songay Yordan maso'a ka nagara Kana'an.
Ketab Etongan paneka nyareta'agi parkara settong bangsa se serreng kene' ate sarengngan tako' ngadhebbi kasossa'an. Bangsa paneka ta' atoro' ka papakonna Allah sarengngan ta' poron atoro' ka Mosa se sareng Pangeran epele epadaddi pamimpinna bangsa gapaneka. Ketab paneka nyareta'agi jugan kaestowanna Pangeran se ros-terrosan ajaga ommadda, sanare ommadda ta' koko imanna sarengngan ta' ta'at. Jugan nyareta'agi Mosa, se dhang-kadhang korang sabbar, namong teptep kowat aladine Pangeran sareng bangsa Isra'il.
Essena Ketab
Bangsa Isra'il ayap-siyap mangkada dhari Gunong Sinay 1:1–9:23
a. Caca jiwa se kapeng settong 1:1–4:49
b. Hokom ban atoran se acem-macem 5:1–8:26
c. Paska se kapeng dhuwa' 9:1-23
Dhari Gunong Sinay ka babana bangsa Mo'ab 10:1–21:35
Kadaddiyan-kadaddiyan e Mo'ab 22:1–32:42
Rengkessanna parjalanan dhari Messer ka Mo'ab 33:1-49
Kon-papakon sabellunna alengka Songay Yordan 33:50–36:13
Currently Selected:
ETONGAN ATOR MAMOLAN: MAD
Highlight
Copy
Compare
Share
Want to have your highlights saved across all your devices? Sign up or sign in