ETONGAN 2
2
Kennengnganna saneyap suku e parkemahan
1Dhabuna PANGERAN ka Mosa ban Harun, 2“E bakto maddek parkemahan, oreng Isra'il kodu akemah e seddi'anna bul-ombulla bang-sebang, menorot kaomma bi'-dibi'. Sakabbinna parkemahan jareya kodu epaddek e sakalenglengnga Tang Kemah, tape pajauwi sakone'.”
3-9E bagiyan temor, laskar se ngangguy bul-ombulla Yehuda kodu akemah menorot pasukanna ban pamimpinna bang-sebang se kantha reya sosonanna:
| Suku | Pamimpinna | Bannya'na orengnga |
| Yehuda | Nahason ana'na Aminada | 74.600 |
| Isakhar | Netane'el ana'na Zuwar | 54.400 |
| Zebulon | Eliyab ana'na Helon | 57.400 |
| Kabbi: | 186.400 |
Laskarra Yehuda kodu mangkat dha'-adha' kadibi'.
10-16E bagiyan lao', laskar se ngangguy bul-ombulla Ruben, kodu akemah menorot pasukan ban pamimpinna bang-sebang se kantha reya sosonanna:
| Suku | Pamimpinna | Bannya'na orengnga |
| Ruben | Elizur ana'na Syedeyur | 46.500 |
| Simeyon | Selumiyel ana'na Zurisyadai | 59.300 |
| Gad | Elyasaf ana'na Rehuwel | 45.650 |
| Kabbi: | 151.450 |
Kasatuwanna Ruben kodu mangkat giliran se kapeng dhuwa'.
17Saellana jareya, e nga'-tengnga'anna laskar Isra'il laenna, suku Lewi ajalan, mekol Kemah Socce. Se mangkat padha ban carana se akemah, iya areya padha akompol e seddi'anna bul-ombulla bang-sebang.
18-24E bagiyan bara', laskar se ngangguy bul-ombulla Efraim akemah menorot pasukanna ban pamimpinna bang-sebang, se kantha reya sosonanna:
| Suku | Pamimpinna | Bannya'na orengnga |
| Efraim | Elisama ana'na Amihud | 40.500 |
| Manasye | Gamaliyel ana'na Pedazur | 32.200 |
| Benyamin | Abidan ana'na Gideyoni | 35.400 |
| Kabbi: | 108.100 |
Kasatuwanna Efraim kodu ajalan e budhiyanna suku Lewi, daddi mangkat giliran se nomer tello'.
25-31E bagiyan dhaja, laskar se ngangguy bul-ombulla Dan kodu akemah menorot pasukan ban pamimpinna se kantha reya sosonanna:
| Suku | Pamimpinna | Bannya'na orengnga |
| Dan | Ahiyezer ana'na Amisyadai | 62.700 |
| Asyer | Pagiyel ana'na Okhran | 41.500 |
| Naftali | Ahira ana'na Enan | 53.400 |
| Kabbi: | 157.600 |
Kasatuwanna Dan mangkat dhi-budhi kadibi'.
32Bannya'na oreng Isra'il se ecathet e dhalem kasatuwan-kasatuwan menorot pasukanna bang-sebang badha nem atos tello' ebu lema ratos saeket oreng. 33Akantha se la edhabuwagi PANGERAN ka Mosa, oreng Lewi ta' ecathet epakompol ban reng-oreng Isra'il laenna.
34Oreng Isra'il ajalannagi sabarang se edhabuwagi PANGERAN ka Mosa. Kabbi padha akemah e sakalenglengnga bul-ombulla bi'-dibi', ban mangkat menorot kaomma ban sukuna.
Currently Selected:
ETONGAN 2: MAD
Highlight
Copy
Compare
Share
Want to have your highlights saved across all your devices? Sign up or sign in