ETONGAN 13
13
Ta-mata se dhubellas oreng
(Ol. 1:19-33)
1Dhabuna PANGERAN ka Mosa, 2“Pele pamimpinna ku-suku, dhari sabban suku kala' kasorang; reng-oreng jareya gabay ta-mata, soro nyendhemme nagara Kana'an se bi' Sengko' ebagiya ka bangsa Isra'il.” 3-15Mosa alampa'agi papakonna PANGERAN jareya. Reng-oreng se epele epadaddi ta-mata jareya epamangkat dhari ra-ara Paran. Se epele jareya pin-pamimpin e antarana ku-suku Isra'il, iya areya:
| Sukuna | Pamimpinna |
| Ruben | Syamuwa ana'na Zakur |
| Simeyon | Safat ana'na Hori |
| Yehuda | Kaleb ana'na Yefune |
| Isakhar | Yigal ana'na Yusup |
| Efraim | Hoseya ana'na Nun |
| Benyamin | Palti ana'na Rafu |
| Zebulon | Gadiyel ana'na Sodi |
| Manasye | Gadi ana'na Susi |
| Dan | Amiyel ana'na Gemali |
| Asyer | Setur ana'na Mikha'el |
| Naftali | Nahbi ana'na Wofsi |
| Gad | Guwel ana'na Makhi |
16Jareya ta-mata se eotos Mosa epanyendhemme nagara Kana'an. Hoseya ana'na Nun bi' Mosa egante'e nyama, epadaddi Yusak.
17Dhabuna Mosa e bakto makon reng-oreng jareya mangkat entar nyendhemme nagara Kana'an, “Kassa' ba'na mangkat, ajalan ka dhaja, ka bagiyan lao'na Kana'an, terros ka bagiyan se bannya' gunongnga. 18Sendhemme baramma kabadha'anna nagara jareya, orengnga bannya' apa sakone', kowat apa enja'. 19Pareksa apa nagara jareya bagus otaba juba', apa orengnga neng e sa-disa se abukka' otabana neng e tha-kottha se ekalenglenge binteng. 20Abassagi apa tanana landhu otaba kajal, otabana apa gi' bannya' alassa. Ja' loppa ngeba mole wa'-buwa'an se tombu e jadhiya.” E bakto jareya teppa'na mosem anggur.
21Reng-oreng jareya laju padha mangkat ka dhaja, nalektegi nagara jareya molae dhari ra-ara beddhi Zin e bagiyan lao'na sampe' ka kottha Rehob e seddi'anna lorong ka Hamat. 22Dha'-adha'na reng-oreng jareya entar ka bagiyan lao'na nagara jareya, laju napa' ka Hebron, kennengnganna reng-oreng Ahiman, Sesai ban Talmai, toronanna Enak. Hebron reya epaddek pettong taon sabellunna kottha Zowan e Messer. 23Saellana jareya, ta-mata jareya padha napa' ka Cora Eskol.#13:23 Eskol: Nyama reya e dhalem basa Ibrani artena “buwana anggur saranca'”. E jadhiya reng-oreng buru ngetthok ranca'na anggur se badha buwana; buwana anggur jareya ce' berra'na sampe' kapaksa epekol oreng kadhuwa ngangguy kol-pekol kaju. Salaenna jareya reng-oreng buru ngeba keya pan-barampan buwana dalima ban buwana ara. 24Kennengngan jareya enyamae Cora Eskol polana ranca'na buwana anggur se eketthok oreng Isra'il e jadhiya.
25Saellana nalektegi nagara jareya pa' polo are abidda, ta-mata jareya abali ka nagarana, 26pas areppot ka Mosa, Harun ban sakabbinna oreng Isra'il se akompol e Kades, e ra-ara beddhi Paran. Reng-oreng jareya nyareta'agi pa-apa se etangale'e ban noduwagi wa'-buwa'an se ngeba dhari nagara jareya. 27Atorra reng-oreng jareya ka Mosa, “Abdina sakanca ampon nalektegi kabadha'anna nagara ka'issa'. Tanana landhu; ka'dhinto wa'-buwa'an sakone' dhari nagara gapaneka. 28Namong orengnga wat-kowat. Tha-kotthana ja-raja sareng badha bintengnga. Sarengngan pole, e ka'dhissa' kaula sadaja padha nengale reng-oreng toronanna buta. 29Oreng Amalek aenggun e bagiyan lao'na nagara gapaneka; oreng Het, Yebus sareng Amori e bagiyan se anong-gunong; dineng oreng Kana'an aenggun e salanjangnga paseser sareng e salanjangnga Songay Yordan.”
30Tape Kaleb nyellang cacana reng-oreng se aserro ka Mosa jareya, laju mator, “Nagara ka'issa' kodu eserrang sareng erebbu' samangken jugan; bangsa Isra'il cokop kowat kaangguy makala'a bangsa ka'issa'.”
31Tape reng-oreng se abali abareng Kaleb ngoca' kantha reya, “Bunten, sampeyan ta' kera sanggup nyerrang bangsa ka'issa'. Oreng e nagara ka'issa' akowadan dhari sampeyan.” 32Reng-oreng jareya laju mabalattra careta se lecegan e kalanganna oreng Isra'il parkara nagara se eta-matae rowa. Oca'na, “Hasella nagara ka'issa' ta' cokop ekakan oreng ka'issa' dibi' balakka'. Orengnga talebat ja-raja, 33#Kad. 6:4 la'-mala' kaula nengale reng-oreng se akadi buta, toronanna oreng Enak. Mon ebandhing bi' reng-oreng ka'issa', kaula arassa pera' padha ban balang, ban reng-oreng ka'issa' tanto nganggep sapaneka jugan ka kaula sadaja.”
Currently Selected:
ETONGAN 13: MAD
Highlight
Copy
Compare
Share
Want to have your highlights saved across all your devices? Sign up or sign in
