JUSAK 21
21
Tha-kotthana suku Lewi
1-2 #
Et. 35:1-8
E settong are para kapalana kalowarga e dhalem suku Lewi entar ka Silo e nagara Kana'an, ngadhep ka Imam Eleyazar, Yusak pottrana Nun, ban para kapalana kalowarga sakabbinna ku-suku Isra'il. Ca'na reng-oreng jareya, “Kalaban parantara'anna Mosa, PANGERAN makon sopaja reng-oreng Lewi eparenge tha-kottha se ebadhiya kennengnganna reng-oreng Lewi gapaneka, sareng lon-talon e sabingkerra tha-kottha gapaneka kaangguy ebinna.” 3Daddi oreng Isra'il ngestowagi dhabuna PANGERAN jareya. Dhari tana andhi'na reng-oreng Isra'il jareya badha tha-kottha bi' lon-talon e sabingkerra tha-kottha jareya se ebagi ka oreng Lewi.
4Se dha'-adha' narema tha-kottha jareya ga-kalowarga dhari kaom Kehat e dhalem suku Lewi. Ga-kalowarga toronanna Imam Harun eberri'i tello bellas kottha dhari dhaerana suku Yehuda, Simeyon ban Benyamin. 5Ga-kalowarga laenna dhari kaom Kehat eberri'i sapolo kottha dhari dhaerana suku Efraim, suku Dan sarta suku Manasye se e bara'na Songay Yordan.
6Kaom Gerson olle tello bellas kottha dhari dhaerana suku Isakhar, Asyer, Naftali ban suku Manasye se e temorra Songay Yordan.
7Ga-kalowarga dhari kaom Merari olle kottha dhubellas dhari dhaerana suku Ruben, Gad ban Zebulon.
8Reng-oreng Isra'il magi ka oreng Lewi tha-kottha jareya ban lon-talon e sabingkerra ngangguy ellot,#21:8 ngangguy ellot: Baca 14:2. menorot se edhabuwagi PANGERAN kalaban parantara'anna Mosa.
Tha-kottha se ebagi ka kaom Kehat
9-19Dhari kaom Kehat e dhalem suku Lewi, mam-imam toronanna Harun se dha'-adha' kadibi' narema tha-kotthana; kaom jareya eberri'i tello bellas kottha ban lon-talonna. Dhari suku Yehuda ban Simeyon, kaom jareya narema kottha sasanga', iya areya: Libna, Yatir, Estemoa, Holon, Debir, Ain, Yuta, Bet-Semes ban Arba, se enyamae ngala' nyamana eppa'na Enak. Kottha jareya, se sateya anyama Hebron, jareya kottha sowaka e pagunongan Yehuda. Gal-teggal ban sa-disana kottha jareya la ebagi ka Kaleb pottrana Yefune menangka andhi'na dibi'. Dhari suku Benyamin kaom jareya narema kottha pa'-empa', iya areya: Gibeyon, Geba, Anatot ban Almon.
20-26Ga-kalowarga laenna dhari kaom Kehat eberri'i kottha sapolo ban lon-talonna. Dhari suku Efraim, kaom jareya narema kottha pa'-empa', iya areya: Bet-Horon, Kibza'im, Gezer ban Sikhem; Sikhem jareya kottha sowaka e pagunongan Efraim. Dhari suku Dan kaom jareya narema kottha pa'-empa' iya areya: Elteke, Gibeton, Ayalon ban Gat-Rimon. Dhari suku Manasye se e bagiyan bara' kaom jareya narema kottha dhadhuwa', iya areya: Ta'anakh ban Gat-Rimon.
Tha-kottha se ebagi ka kaom Gerson ban Merari
27-33Settong kaom laenna dhari suku Lewi iya areya kaom Gerson. Ga-kalowarga e dhalem kaom Gerson jareya eberri'i kottha tello bellas ban lon-talonna. Dhari suku Manasye se e bagiyan temor kaom jareya narema kottha dhadhuwa', iya areya: Be'estera ban Golan, kottha sowaka e dhaera Basan. Dhari suku Isakhar kaom jareya narema kottha pa'-empa', iya areya: Kisyon, Dobrat, Yarmut ban En-Ganim. Dhari suku Asyer narema kottha pa'-empa' iya areya: Misal, Abdon, Helkat ban Rehob. Dhari suku Naftali narema kottha tatello', iya areya: Hamat-Dor, Kartan ban Kedes; Kedes jareya kottha sowaka e Galilea.
34-40Kaom karena e dhalem suku Lewi, iya areya kaom Merari eberri'i kottha dhubellas bi' lon-talonna. Dhari Zebulon kaom jareya narema kottha pa'-empa', iya areya: Yokneyam, Karta, Dimna ban Nahalal. Dhari suku Ruben narema kottha pa'-empa', iya areya: Bezer, Yahas, Kedemot ban Mefa'at. Dhari suku Gad narema kottha pa'-empa', iya areya: Mahana'im, Hesybon, Yaezer ban Ramot, settong kottha sowaka e Gileyad.
41-42Daddi dhari tana andhi'na oreng Isra'il badha kottha pa' polo ballu', tamaso' lon-talon e sabingkerra, se ebagi ka reng-oreng Lewi.
Kana'an ekaandhi' ommat Isra'il
43Daddi PANGERAN marengngagi ka ommat Isra'il sakabbinna tana se la ejanjiyagi kalaban sompa ka bangatowana ommat jareya. Saellana ngobasane ban ngennengnge nagara jareya, ommat Isra'il laju neptep e jadhiya. 44Daddi menorot apa se la ejanjiyagi PANGERAN ka bangatowana bangsa Isra'il jareya, tana jareya aman sabab elindhunge PANGERAN. So-mosona tadha' settonga se kowat ngadhebbi, sabab bi' PANGERAN oreng Isra'il epamennang ka sakabbinna mosona. 45PANGERAN neptebbi saneyap janjina ka ommat Isra'il; tadha' settonga se ta' eteptebbi.
