YESAYA ATOR MAMOLAN
ATOR MAMOLAN
Ketab paneka enyamae menorot asmana nabbi raja se odhi' e Yerusalim saamponna partengnga'anna abad se kapeng ballu' sabellunna Masehi. Sadajana ebagi daddi tello bagiyan:
1. Pasal 1–39 emolae dhari jaman e bakto Yehuda, karaja'an lao', eara Asyur, nagara tatanggana se talebat kowat. Yesaya apangrasa ja' babaja se saongguna monggu ka odhi'na bangsa Yehuda paneka banne kakowadanna Asyur, namong dusana bangsa Yehuda dibi', sabab bangsa gapaneka ta' ta'at sareng korang parcaja ka Allah. Kalaban dhabuna sareng lalakonna, Nabbi Yesaya ngajak ra'yat sareng para pamimpinna sopaja padha'a odhi' menorot kasokanna Allah sareng adil. Salerana maemot ja' ommadda Allah bakal calaka'a sareng bakal ancora manabi ta' poron merengngagi ka Pangeran. Yesaya jugan aramallagi kataremtemman e dunnya sareng toronanna Daud se bakal rabuwa, se bakal jumennengnga rato se cocok sareng pangaterrona oreng bannya'.
2. Pasal 40–55 emolae dhari bakto pambuwanganna reng-oreng Yehuda e Babil. Reng-oreng Yehuda gapaneka ancor ta' gadhuwan pangarebban. Yesaya apareng berta ja' Allah ampon para' mabebasa ommadda sareng abakta'a ommadda abali ka Yerusalim, kaangguy molae odhi' se anyar. Bab se penting e dhalem bagiyan paneka enggi paneka ja' Allah paneka Pangeran se ngobasane sajara, sareng ja' Salerana badhi ngotosa ommadda ka sadajana bangsa se badhi eberkadi kalaban parantara'anna Isra'il. Yat-ayat parkara “Abdina PANGERAN” kaetong sala settong bagiyan se paleng kalonta dhari Parjanjiyan Laju.
3. Pasal 56–66 kabannya'an etojjuwagi ka bangsa se ampon abali badha e Yerusalim pole. Reng-oreng gapaneka parlo eyakinnagi pole ja' Allah bakal neptebbana ji-janjina ka bangsa gapaneka. Se paleng eparlowagi enggi paneka carana odhi' se lerres sareng kaadilan; jugan parkara carana araya'agi are Sabat, ngatorragi kurban ban du'a. Yat-ayat se penting enggi paneka 61:1-2 se bi' Isa Almasih eagem kaangguy anyata'agi tugassa e bakto buru molae alampa'agi tugas gapaneka.
Essena Ketab
Parengeddan ban janji 1:1–12:6
Okoman ka sa-bangsa 13:1–23:18
Pangadilanna Allah ka dunnya 24:1–27:13
Parengeddan terrosanna ban janji 28:1–35:10
Rato Hizkiya dhari Yehuda ban reng-oreng Asyur 36:1–39:8
Dhadhabun se possa' bi' janji ban pangarebban 40:1–55:13
Parengeddan ban janji 56:1–66:24
Currently Selected:
YESAYA ATOR MAMOLAN: MAD
Highlight
Copy
Compare
Share
Want to have your highlights saved across all your devices? Sign up or sign in