YESAYA 61
61
Kabar nyaman parkara pambebasan
1 #
Mat. 11:5; Luk. 7:22 Kobasana GUSTE Allah Se Mahatenggi badha e sengko',
Salerana mele ban ngotos sengko'
kaangguy ngeba kabar bagus ka oreng mesken
ban mabaras oreng se remmok atena;
kaangguy ngomommagi ka oreng tahanan
ja' reng-oreng jareya bakal duli epabebasa,
ban ka reng-oreng e dhalem penjara
ja' aba'na bakal epakalowara. #Luk. 4:18-19
2 #
Mat. 5:4
Salerana ngotos sengko' kaangguy manapa' kabar
ja' la napa' baktona PANGERAN aparenga kasalameddan;
kaangguy alepor reng-oreng se sossa
ban males so-mosona;
3kaangguy magumbira ban maperak
ka oreng se sompek ban sossa;
kaangguy ngoba kasossa'anna reng-oreng jareya
epadaddiya lagu se amolja'agi asmana.
Reng-oreng jareya akantha ka'-bungka'an
se etamen dibi' bi' PANGERAN.
Reng-oreng jareya bakal ajalannagiya se becce' ban se teppa',
sampe' PANGERAN eagungngagi.
4Reng-oreng jareya bakal maddegga tha-kottha se la abit gujur
ban maddegga kennengngan-kennengngan se la abit seppe.
5He, tang bangsa, oreng manca bakal aladinana ba'na,
ngowana ebinna ba'na
ban agarabbagiya teggal sarta kebbun anggurra ba'na.
6Ba'na bakal esebbuda abdina Allah
ban enyama'ana imamma PANGERANna sengko' ban ba'na.
Ba'na bakal ngarassa'agiya kobassana kasogiyanna sa-bangsa
ban arassa gumbira lantaran dhi'-andhi'na reng-oreng jareya daddi andhi'na ba'na.
7Sarrena ba'na la olle malo tekel dhuwa',
ban kacemmerran sarta kaseya'an la daddi bagiyanna ba'na,
ba'na bakal narema'a sangkolan e nagarana se bannya'na tekel dhuwa'na
ban atena bakal sennengnga saterrossa.
8PANGERAN adhabu, “Sengko' senneng ka kaadilan
ban baji' ka panyeksa'an ban kajahadan.
Sengko' esto aberri' opa ka ba'na,
ban mabadha janji se langgeng ban ba'na.
9Toronanna ba'na kalonta e man-dhimman,
kasohor e antarana sa-bangsa.
Daddi kabbi oreng se nangale'e bakal ngakowana
ja' Sengko' la aberkadi bangsa reya.”
10 #
Why. 21:2
Yerusalim ngoca', “Sengko' perak lantaran PANGERAN,
Tang ate gumbira polana Allah.
Akantha pangantan lake' ban bine'
se ngangguy pareyasan se gus-bagus,
bariya keya sengko' bi' Pangeran
epangangguy kalambi kasalameddan ban kamennangan.
11Padha ban ne-bine se etabur e tana,
bakal tombuwa daddi men-tamennan,
bariya keya GUSTE Allah Se Mahatenggi matombu kasalameddan
ban sa-bangsa kabbi bakal ngagungngagiya Salerana.”
