YESAYA 59
59
Nabbi abasto sa-dusana bangsa jareya
1Ba'na ja' nyangka PANGERAN ta' andhi' kakowadan parana kaangguy masalamet ba'na, otaba ce' kopogga kaangguy meyarsa'agi paera'na ba'na. 2Polana kajahadanna ba'na Pangeran ta' meyarsa'agi e bakto ba'na adu'a ka Salerana. Sa-dusana ba'na se mesa ba'na dhari Allah. 3Ba'na sala polana lecek ban roce, polana ngalakone kakerrasan ban mate'e oreng.
4Ba'na aparkara ta' kalaban badha sababba ban motose ta' adil. Ba'na lecek ban ngandellagi se tadha' gunana; ba'na andhi' sajja macalaka'a oreng laen ban ngalakone kajahadan. 5-6Rancanana ba'na se hat-jahat madhateng maot akantha tellorra olar se mandi opassa. Mon tellor jareya epateddhas, pas kalowar olarra. Rancana jareya tadha' gunana sakale ka ba'na, akantha kalambi se ekagabay dhari tennonanna bang-sabang. 7#Rm. 3:15-17 Ba'na ros-terrosan arancana'agi barang se jahat, ban terro duliya ajalannagi jareya. Ba'na ta' mangmang mate'e oreng se tadha' salana. E dhimma'a bai se eentare ba'na, tanto ba'na marosagan ban mate'e oreng. 8Ba'na ta' aehteyar madhateng karokonan, ban lalakonna ba'na ta' adil kabbi. Jalanna ba'na alet-bulet, ban oreng se atoro' jalanna ba'na ta' kera taremtem odhi'na.
Bangsa jareya ngakone dusana
9Bangsa jareya mator ka Allah,
“Samangken abdidalem oneng
aponapa Junandalem me' ta' kasokan masalamet abdidalem sadaja
dhari reng-oreng se nendhes abdidalem sadaja.
Abdidalem sadaja te'-nante'an terrang,
namong se badha coma papetteng.
10Abdidalem sadaja ga'-raga'an akadi oreng buta;
e bakto beddhuk abdidalem sadaja tatandhung akadi e baja tengnga malem;
e nga'-tengnga'anna oreng odhi' abdidalem sadaja akadi oreng mate.
11Abdidalem katako'en sareng sossa;
abdidalem sadaja nyare kaadilan tape ta' manggi sakone'a;
ngarep kasalameddan, namong parcoma.
12Bannya' onggu kajahadan abdidalem ka Junandalem, GUSTE.
Sa-dusa abdidalem nyala'agi abdidalem.
Abdidalem apangrasa onggu ja' ampon alako jahat
sareng ampon oneng ka sa-dusana abdidalem sadaja.
13Abdidalem mongkere sareng aberonta' ka Junandalem, GUSTE,
sareng ta' poron atoro' ka Allahna abdidalem sadaja.
Abdidalem ampon nyek-ngenyek oreng laen sareng padha nyalethong;
pekkeran kalero, sareng caca lecek.
14Hokom se adil ampon epanyengla,
ban kaadilan ampon ebuwang ka jauna.
Kajujuran ta' eaji'i e sadajana kennengnganna oreng bannya',
kaehlasanna ate eanggep tadha'.
15Oreng se jujur, ampon tadha',
ban oreng se ajauwi kajahadan
aba'na dibi' daddi kurbanna kajahadan gapaneka.”
PANGERAN aya-sadhiya masalamedda ommadda
PANGERAN la ngoladi, ban panggaliyanna ta' senneng amarga kaadilan la tadha' sakale. 16#Yes. 63:5 Salerana getton amarga tadha' oreng se nyander nolonge. Daddi Pangeran ngagem kobasana dibi' kaangguy masalamet ban apareng kamennangan. 17#Ef. 6:14, 6:17; 1Tes. 5:8 Salerana ngagem kaadilan ban kasalameddan menangka rasogan besse ban topi baja. Salerana la nekat mabaliya kabadha'an akantha asalla ban malessa kata'adilan. 18Salerana males so-mosona menorot lalakonna. La'-mala' sa-bangsa e lo-polo se jau ta' lopot dhari okomanna. 19Kobasana ban kaagunganna bakal ekatako'ana sakabbinna oreng dhari temor sampe' ka bara'. Pangeran bakal rabuwa akantha songay se raja ban santer lantaran angen raja.
20 #
Rm. 11:26
PANGERAN adhabu ka ommadda, “Sengko' dhatengnga ka Yerusalim masalamedda ba'na kabbi se padha atobat dhari sa-dusana. 21Sengko' mabadha'a parjanjiyan ban ba'na: Bi' Sengko' ba'na eberri'ana Tang kobasa ban Tang pangajaran kaangguy salanjangnga. Ajarragi jareya ka na'-ana'na sopaja na'-ana'na ba'na jareya bisa'a ngajarragi terros ron-temoron dhari sateya sampe' salanjangnga.”
