HOSEYA 3
3
Hoseya ban rajina se ta' esto
1PANGERAN adhabu ka sengko', “Kassa' ba'na ajalan pole nyare babine' se dujan azina, pas kaleburi babine' jareya. Pataresna ka babine' jareya akantha Tang kataresna'an ka oreng Isra'il maske reng-oreng Isra'il jareya la nyenglae Sengko' ban nyemba ka la'-alla'an sarta dujan ngeba tor-ator jajan kismis ka la-brahala.”#3:1 ngeba tor-ator … la-brahala: Buwana anggur se la epakerreng egabay tor-ator kurban ka diba kalandhuwan se menorot kaparcaja'an bisa maongga hasella tamennanna reng-oreng se nyemba ka diba jareya.
2Daddi sengko' majar lema bellas pesse salaka ban gandum#3:2 gandum: se emaksod e dhinna' settong gandum se kwalitassa amaba'an. saratos saeket kilo kaangguy ngaolle babine' jareya. 3Sengko' ngoca' ka babine' jareya ja' aba'na kodu anante' sengko' sampe' abit. Sabatara jareya babine' buru ta' olle nyondel otaba azina, ban sengko' ta' olle nyemma'e aba'na. 4Kantha jareya kabadha'anna bangsa Isra'il; ce' abidda kodu odhi' ta' andhi' rato otaba pamimpin, ta' ngangguy kurban ban gu-tugu karamat, ta' ngangguy la-brahala otaba mat-jimat se mokka' roseyana jaman se bakal dhateng. 5Tape bakal napa'a baktona bangsa Isra'il abali pole ka GUSTE Allahna, ban abali ka ratona se asalla dhari toronanna Daud. Saellana jareya reng-oreng Isra'il bakal tako'a ban bakal hormada ka PANGERAN, sarta narema kat-berkadda.
