KADADDIYAN 23
23
Sara seda pas esareyagi
1E bakto yuswana saratos petto lekor taon, 2Sara seda e Hebron e tana Kana'an. Ibrahim sossa, laju molar polana rajina seda.
3Saellana jareya jinazana edinggallagi. Ibrahim laju meyos manggi'i reng-oreng Het se badha e nagara jareya, dhabuna, 4#Car. 7:16; Ibr. 11:9, 13 “Kaula e ka'iya oreng manca; kaula nyo'ona tolong, ngobangana tanana sampeyan, kaula parlo ngoburragiya raji kaula.”
5-6Sambidda reng-oreng jareya, “Panjennengngan ka'dhinto pamimpin raja se badha e ka'dhinto; daddi ngereng sareyagi rajina e pasareyan se paleng sae gadhuwanna bangsa abdina. Bangsa abdina padha perak kengeng nyadhiya'agi pasareyan kaagem rajina panjennengngan.”
7Saellana jareya Ibrahim pas asojud e adha'anna reng-oreng Het jareya, 8pas adhabu, “Manabi sampeyan ehlas raji kaula ekoburragi e ka'iya, kaula nyo'ona tolong so'onnagi ka Efron, pottrana Zohar, 9Guwa Makhpela kaagunganna, se badha e penggirra teggalla ka'issa', bi' kaula eobangana, saponapa'a saos argana. Tana ganeka sareng kaula ebadhiya tana koburan.”
10E bakto jareya Efron dibi' teppa'na badha e jadhiya, toju' bi' reng-oreng Het laenna e kennengnganna kompolan e labang sakethengnga kottha jareya. Efron nyaot, esakse'e reng-oreng se badha e jadhiya, oca'na, 11“Ampon ta' osa obange; teggal sareng guwa ka'issa' sareng abdina eatorragiya ka panjennengngan, badhi pasareyanna rajina panjennengngan; bangsa abdina menangka saksena.”
12Ibrahim ngendhep e adha'na reng-oreng Het jareya, 13laju adhabu ka Efron, ekaedhing bi' reng-oreng se badha e jadhiya, “Ngereng peyarsa'agi. Teggal ganeka sareng kaula eobangana. Ngereng tarema obangnga, daddi kaula bisa ngoburragi raji kaula e ka'issa'.”
14Saodda Efron, 15“Tana se argana namong pa' ratos pesse salaka, ponapa artena ka panjennengngan sareng ka abdina? Ampon, eatore, rajina sareyagi e ka'issa'.” 16Ibrahim saroju' ka argana, laju ngetong pesse salaka se bannya'na esebbuttagi bi' Efron, iya areya pa' ratos pesse salaka, menorot tembangan se eangguy para sodagar, esakse'e reng-oreng Het se padha badha e jadhiya.
17Daddi tanana Efron se badha e Makhpela e temorra Mamre jareya pas ekaandhi' Ibrahim. Tamaso' teggalla ban guwana sarta ka'-bungka'anna, bariya keya ka'-bungka'an se badha e tes-batessa. 18Tana jareya epassra'agi ka Ibrahim, esakse'e reng-oreng Het se hadir e kompolan e labang sakethengnga kottha jareya.
19Saellana jareya Ibrahim laju nyareyagi Sara, rajina, e guwa Makhpela, iya areya e Hebron, e tana Kana'an. 20Daddi teggal ban guwana oreng Het jareya pas ekaandhi' Ibrahim, epadaddi tana koburan.
Currently Selected:
KADADDIYAN 23: MAD
Highlight
Share
Copy
Want to have your highlights saved across all your devices? Sign up or sign in